Ephesians 3

Sotho 1951 (BIBELE)

← Chapter 2 Jump to: Chapter 4 →

1Ke ka baka leo nna Paulo ke lego mogolegwa wa Jesu Kriste ka baka la lena bantle.

2Ge e le tša bolaki, bjo ke bo filwego ka baka la lena, le di kwele; ke ra bolaki bja kgaugelo ya Modimo.

3Le kwele gore tše e bego e le thopa, ke di tsebišitšwe ka kutollo, ka mo nkilego ka le ngwalela ka boripana.

4Moo, ge le bala, le ka lemoga gore thopa ya Kriste ke a e tseba.

5Ke thopa ye e bego e sešo ya tsebišwa bana ba batho ba mabaka a mangwe ka mokgwa wo wa ge e utollelwa Baapostola ba bakgethwa le Baporofeta ka Moya mehleng yeno.

6Ke yona thopa yeo ya go re bantle le bona ke baji ba bohwa, le bona ke ditho tša mmele o tee le rena, le bona ba lebanwe ke dikholofedišo ka Kriste Jesu, ka Ebangedi.

7Ke yona Ebangedi ye nna ke lego motseta wa yona ka neo ya kgaugelo ya Modimo, ye ke e filwego ka tiro ya maatla a gagwe.

8Nna, ke lego e monyenyane go bakgethwa bohle, ke seditšwe ka kgaugelo ye ya go re bantle ke ba anegele Ebangedi ya lehumo le le sa latišegego la Kriste;

9e be go ba bonegela bohle gore ba bone pušo ya thopa ya Modimo, ye e bego e utilwe go tloga mehleng ya kgalelele, e le thopa ya Modimo Mohlodi wa tšohle ka Jesu Kriste,

10ya go re mehleng yeno bohlale bja Modimo bja mehutahuta bo tsebje ke babuši le ba maatla ka tša magodimong ka phuthego.

11Gore go phethege tše a bego a rerile go di dira ka Jesu Kriste Mong wa rena.

12Ka yena re na le mafolofolo, re na le botseno re holofetše, re dumetše yena.

13Ke ka baka leo ke le rapelago gore le se ke la lapišwa ke ditlaišego tša ka di nkwetšego ka baka la lena, tše le kago kgantšha tšona.

14Ke tšona tše di nkhunamišago ka matolo, ke khunamela Tatago Mong wa rena Jesu Kriste,

15yena tlhago ya botate bjohle bjo bo kago bolelwa legodimong le lefaseng.

16Gore ka lehumo la letago la gagwe a le fe go tielela maatla mothong wa teng ka Moya wa gagwe.

17Gore Kriste a age dipelong tša lena ka tumelo, le be ba ba tsemilego medu leratong.

18Ke mo le tlogo kgona go lemoga lerato la Kriste, bophara bja lona, le botelele bja lona, le go iša ga lona, le go phagama ga lona; la di lemoga le bakgethwa bohle.

19Ke mo le tlogo tseba lerato la Kriste ge e le lebalatsebo, la tlatšwa botlalomoka bja Modimo.

20Gomme yena a kgonago go dira tše di fetišago kgolekgole tše re di kgopelago, le tše re di naganago, ka maatla a a dirago mo go rena,

21a a retwe phuthegong ka Kriste Jesu ke ba meloko yohle ya mehleng ya neng le neng. Amene.

← Chapter 2 Jump to: Chapter 4 →