Ephesians 2

Sotho 1951 (BIBELE)

← Chapter 1 Jump to: Chapter 3 →

1Le lena ba le bego le hwetše dikarogong le dibeng, o le phedišitše,

2le be le ile le tšona ka mokgwa wa lefase leno, le bušwa ke mmuši wa mmušo wa sebakeng, ke moya wo mehleng yeno o dirago ka maatla mo baneng ba go se kwe.

3Le rena ka moka re be re ile le bona ka dikganyogo tša nama ya rena, re sa dira se se bego se ratwa ke nama le maikwelo a rena, re sa le bana ba ba swanago le ba bangwe bao ba ba tswaletšwego go tlo galefelwa.

4Gomme Modimo, yena mohumi wa dikgaugelo, o re ratile ka lerato le legolo la gagwe.

5Le rena ba re bego re hwetše dikarogong, o re phedišitše gammogo le Kriste. Le baphološwa ka kgaugelo.

6Le rena o re tsošitše a re dudiša mo go tša magodimong ka Jesu Kriste.

7E be e le gore mehleng e tlogo tla a bonagatše lehumo le legologolo la kgaugelo ka botho bja go re tlela ka yena Kriste Jesu.

8Le baphološwa ka kgaugelo ka tumelo; ga la ka la iphološa; e fo ba mpho ya Modimo.

9Ga la ka la e bona ka mediro, gore go se be le e a kago itumiša.

10Re babopša ba gagwe bao ka Kriste ba bopetšwego mediro e botse, ye Modimo a e buletšego tsela gore e be ye re tlogo ya ka yona.

11Bjale le se ke la lebala gore ka nama le be le le bantle kgale; ba lebollo la go dirwa ka diatla nameng, ba re le ba go se bolle.

12Le se lebale gore lebakeng leo le be le se na Kriste; le be le se ba mmušo wa Isiraele; Le be le se ba dikgwerano tša dikholofedišo; le be le phela lefaseng le se na kholofelo, le se na Modimo.

13Bjale lena ba le bego le le kgole, le batameditšwe ka Kriste Jesu, ka madi a Kriste.

14Ke yena mokhutšiši wa lena; ba e bego e le ba babedi, o ba dirile batee, a phušola leboto le le bego le thibile,

15a tloša bonaba, a le nameng a fediša Molao wa ditaelo tša mekgwa, gore ba e bego e le ba babedi a ba dire mmopo o tee, e be motho e mofsa ka yena, ya ba gona go tliša khutšo.

16Ya ba gona go boelanya ba e bego e le ba babedi, mme ya ba mmele o tee; a ba boelanya le Modimo ka sefapano, a bolaya bonaba ka sona.

17A re go tla, a tsebatša Ebangedi ya khutšišo mo go lena ba kgole; le bao ba kgauswi a ba tsebiša yona khutšišo.

18Gobane ka yena re buletšwe tsela bohle bobedi bja rena; ra batamela Tata wešo ka Moya o tee.

19Bjale ga le sa le mathoko le badiiledi; le ba selete se tee le bakgethwa, le bana ba gae, le bana ba Modimo.

20Le agišitšwe godimo ga motheo wa Baapostola le Baporofeta, mo lebje le le thekgilego e lego yena Jesu Kriste.

21Moago ka moka o ema ka yena, o katologa ka yena ya ba Ntlokgethwa Moreneng.

22Ka yena le kgotlagantšwe le ba bangwe, la ba boago bja Modimo Moyeng.

← Chapter 1 Jump to: Chapter 3 →