Ezra 2

Sotho 1951 (BIBELE)

← Chapter 1 Jump to: Chapter 3 →

1Šeba batho ba dilete tša Juda, ba ba boilego kgolegong, e le mathopša a bego a thopilwe ke Nebukadinetsara kgoši ya Babele a ba iša Babele, mme bjale ba boela Jerusalema le Juda magaeng a bona.

2Ke ba ba tlilego le Serubabele, le Jeshua, le Nehemia, le Seraya, le Reelia, le Morodekai, le Bilisama, le Misipara, le Bigifai, le Rehuma, le Baana. Palo ya banna ba setšhaba sa Isiraele še:

3Ba ga Pareose e be e le ba dikete tše pedi le lekgolo le nago le masome a šupago a metšo e mebedi.

4Ba ga Sefatya e be e le ba makgolo a mararo a nago le masome a šupago a metšo e mebedi.

5Ba ga Ara e be e le ba makgolo a šupago a nago le masome a šupago a metšo e mehlano.

6Ba ga Jeshua le Joaba le ba ga Phahathe-Moaba e be e le ba dikete tše pedi le makgolo a seswai a nago le lesome la metšo e mebedi.

7Ba ga Elama e be e le ba sekete le makgolo a mabedi a nago le masome a fetšago seatla a metšo e mene.

8Ba ga Sathu e be e le ba makgolo a senyane a nago le masome a mane a metšo e mehlano.

9Ba ga Sakai e be e le ba makgolo a šupago a nago le masome a selelago.

10Ba ga Bani e be e le ba makgolo a selelago a nago le masome a mane a metšo e mebedi.

11Ba ga Bebai e be e le ba makgolo a selelago a nago le masome a mabedi a metšo e meraro.

12Ba ga Asikadi e be e le ba sekete le makgolo a mabedi a nago le masome a mabedi a metšo e mebedi.

13Ba ga Adonikama e be e le ba makgolo a selelago a nago le masome a selelago a metšo e selelago.

14Ba ga Bigifai e be e le ba dikete tše pedi le masome a mahlano a metšo e selelago.

15Ba ga Adina e be e le ba makgolo a mane a nago le masome a mahlano a metšo e mene.

16Ba ga Atere, ba ga Hiskia e be e le ba masome a senyane a metšo e seswai.

17Ba ga Betsai e be e le ba makgolo a mararo a nago le masome a mabedi a metšo e meraro.

18Ba ga Jora e be e le ba lekgolo le nago le lesome la metšo e mebedi.

19Ba ga Hasuma e be e le ba makgolo a mabedi a nago le masome a mabedi a metšo e meraro.

20Ba ga Gibara e be e le ba masome a senyane a metšo e mehlano.

21Ba Betlehema e be e le ba lekgolo le nago le masome a mabedi a metšo e meraro.

22Banna ba Netofa e be e le ba masome a mahlano a metšo e selelago.

23Banna ba Anathothe e be e le ba lekgolo le le nago le masome a mabedi a metšo e seswai.

24Ba ga Asimafethe e be e le ba masome a mane a metšo e mebedi.

25Ba Kireathe-Jearima le ba Kafira le ba Beerothe e be e le ba makgolo a šupago a nago le masome a mane a metšo e meraro.

26Ba Rama le ba Geba e be e le ba makgolo a selelago a nago le masome a mabedi a motšo o tee.

27Banna ba Mikimasa e be e le ba lekgolo le nago le masome a mabedi a metšo e mebedi.

28Banna ba Bethele le ba Ai e be e le ba makgolo a mabedi a nago le masome a mabedi a metšo e meraro.

29Ba Nebo e be e le ba masome a mahlano a metšo e mebedi.

30Ba ga Makabisi e be e le ba lekgolo le nago le masome a mahlano a metšo e selelago.

31Ba ga Elama e mongwe e be e le ba sekete le makgolo a mabedi a nago le masome a mahlano a metšo e mene.

32Ba ga Harima e be e le ba makgolo a mararo a nago le masome a mabedi.

33Ba ga Lodi le Hadidi le Ono e be e le ba makgolo a šupago a nago le masome a mabedi a metšo e mehlano.

34Ba Jeriko e be e le ba makgolo a mararo a nago le masome a mane a metšo e mehlano.

35Ba ga Senaa e be e le ba dikete tše tharo le makgolo a selelago a nago le masome a mararo.

36Baperisita šeba: Ba ga Jedaya le ba leloko la Jesua e be e le makgolo a senyane a nago le masome a šupago a metšo e meraro.

37Ba ga Imere e be e le sekete se se nago le masome a mahlano a metšo e mebedi.

38Ba ga Phasuri e be e le ba sekete le makgolo a mabedi a nago le masome a mane a metšo e šupago.

39Ba ga Harima e be e le ba sekete se se nago le lesome la metšo e šupago.

40Balefi šeba: Ba ga Jesua le Kadimiele ba leloko la Hodafya e be e le ba masome a šupago a metšo e mene.

41Baopedi ba leloko la Asafa e be e le ba lekgolo le nago le masome a mabedi a metšo e seswai.

42Ba meloko ya baletakgoro e be e le ba ga Salume, le ba ga Atere, le ba ga Talamone, le ba ga Akuba, le ba ga Hatita, le ba ga Sobai; ka moka ga bona e be e le ba lekgolo le nago le masome a mararo a metšo e senyane.

43Bahlanka ba Ntlokgethwa šeba: Ke ba ga Tsia, le ba ga Hasuba, le ba ga Tabaothe,

44le ba ga Kerose, le ba ga Siaka, le ba ga Padone,

45le ba ga Lebana le ba ga Hakaba, le ba ga Akuba,

46le ba ga Hakabe, le ba ga Samalai, le ba ga Hanana,

47le ba ga Gidele, le ba ga Gahara, le ba ga Reaya,

48le ba ga Retsini, le ba ga Nekoda, le ba ga Gasama,

49le ba ga Usa, le ba ga Pasea, le ba ga Besai,

50le ba ga Asena, le Ba Meuni le ba ga Nefisi,

51le ba ga Bakabuke, leba ga Hakufa, le ba ga Harahuri,

52le ba ga Basaluthi, le ba ga Mehida, le ba ga Haresa,

53le ba ga Barakose, le ba ga Sisera, le ba ga Thama,

54le ba ga Netisa, le ba ga Hetifa,

55le ba leloko la bahlanka ba Salomo: Ba ga Sotai, le ba ga Hasoferethe, le ba ga Peruda,

56le ba ga Jaala, le ba ga Darikone, le ba ga Gidele,

57le ba ga Sefatya, le ba ga Hatili, le ba ga Pokerethe-Hatsebaimi, le ba ga Ami.

58Bahlanka ba ba Ntlokgethwa le bahlanka ba Salomo ka moka ga bona e be e le ba makgolo a mararo a nago le masome a senyane a metšo e mebedi.

59Ba bangwe šeba ba ba boilego ba etšwa Thelemela, le Theleharasa, le Keruba, le Adami, le Imere; fela, ga ba ka ba kgona go laetša leloko la bona le mohuta wa bona ge e le Baisiraele.

60Ke ba ga Delaya, le ba ga Tobia, le ba ga Nekoda. E be e le ba makgolo a selelago a nago le masome a mahlano a metšo e mebedi.

61Ba leloko la baperisita šeba: Ke ba ga Hakotsi, le ba ga Barasilai e a bego a tšere morwedi wa ba ga Barasilai yola wa Gileada, mme a bitšwa ka leina labo.

62Bona ba kile ba tsoma tokologano ya meloko ya bona; ba e hloka mme ba tšwa boperisiteng.

63Molakanaga a ba botša a re: Le se ke la ja sekgethwa, go be go tšwelele moperisita e a nago le Seetša le Toko.

64Setšhaba mokeng wa sona e be e le dikete tše masome a mane a metšo e mebedi, le makgolo a mararo a nago le masome a selelago,

65go sa balwe balata ba bona ba banna le ba basadi; bona e be e le ba dikete tše di šupago le makgolo a mararo a nago le masome a mararo a metšo e šupago. Baopedi ba banna le ba basadi e be e le ba makgolo a mabedi.

66Dipitsi tša bona e be e le tše makgolo a šupago le masome a mararo a metšo e selelago; le dimeila e be e le tše makgolo a mabedi a nago le masome a mane a metšo e mehlano.

67Dikamela tša bona e be e le tše makgolo a mane a nago le masome a mararo a metšo e mahlano; dipokolo e be e le tše dikete tše di selelago, le makgolo a šupago a nago le masome a mabedi.

68Ge ba fihla Ngwakong wa Morena kua Jerusalema, ba bangwe ba bagolo ba meloko ba ntšhetša Ngwako wa Modimo dineo ka go ithapa, gore o tsošwe lešopeng la wona.

69Ba tšhela polokelong ya tšhelete ya modiro woo ka mo ba kgonnego, ya ba diponto tše dikete tše masome a selelago a motšo o tee, le silifera e lekanago diponto tše dikete tše masome a mararo, le dikobo tše lekgolo tša baperisita.

70Gomme baperisita le Balefi, le ba setšhaba, le baopedi, le baletakgoro, le bahlanka ba Ntlokgethwa, ba ya ba dula metseng ya gabobona; le Baisiraele ka moka ba ya ba dula metseng ya gabobona.

← Chapter 1 Jump to: Chapter 3 →