Ezra 5

Sotho 1951 (BIBELE)

← Chapter 4 Jump to: Chapter 6 →

1Gwa porofeta moporofeta Hagai le moporofeta Sakaria morwa wa Ido, ba bolela le Bajuda le ba Jerusalema Leineng la Modimo wa Isiraele.

2Ke mo Serubabele morwa wa Sealathiele, le Jeshua morwa wa Jotsadaka, ba tsogilego ba thoma go aga Ngwako wa Modimo motseng wa Jerusalema, ba na le baporofeta bao ba Modimo ba ba bego ba ba tlatša.

3Gwa tla Thathanai mokgoma wa mošono wa noka, a na le Setharabosonai le bagwera ba bona, ba tla ba re: Le laetšwe ke mang go aga ngwako wo le go tsoša morako wo?

4Ra ba botša maina a banna bao ba ba bego ba aga moago woo.

5Gomme bagolo ba Juda ba be ba lebeletšwe ke leihlo la Modimo wa bona; banna bao ba lesa go ba thibela; ba thoma go iša taba yeo go Dario, gwa letelwa phetolo ya yona.

6Ditaba tša lengwalo la Thathanai mokgoma yeo wa naga ya mošono wa noka, le Setharabosonai le bagwera ba bona ba Afaraseka ba mošono wa noka, le ba le rometšego kgoši Dario, šedi.

7Ba mo rometše taodišo ye e ngwadilwego gwa thwe: Kgoši Dario! Khutšo mo go fela!

8A kgoši a ke a tsebe gore re be re sepeletše dileteng tša Juda, kua go lego Ngwako wa Modimo o mogolo. O agiwa ka maswika a magolo; maboto a manegwa ka dikota; gomme modiro woo o dirwa ka tlhokomelo le ka go akgofa.

9Ra botšiša ba bagolo ba gona ra re: Le laetšwe ke mang go aga ngwako wo le go tsoša merako ye?

10Ra botšiša maina a bona, gore re kgone go go tsebiša; ra ngwala maina a banna ba e lego babuši ba bona.

11Bona ba fetola ba re: Rena re bahlanka ba Modimo wa legodimo le lefase. Re tsoša Ngwako wo o bego o agilwe kgale ke kgoši e nngwe e kgolo ya Isiraele, wa fetša nywaga e mentši o le gona.

12Ya na ya re ge botatawešo ba befedišitše Modimo wa bona, a ba gafela diatleng tša Nebukadinetsara kgoši ya Babele ya Kaladea; yena a šwalalanya motse woo, a khudušetša setšhaba kua Babele.

13Gona ka ngwaga wa pele wa pušo ya Korese kgoši ya Babele, yena kgoši Korese a laela a re Ngwako woo o tsošwe.

14A ntšha le dibjana tša Ngwako woo wa Modimo, tša gauta le tša silifere, tše Nebukadinetsara a di tšerego Ngwakong woo wa Jerusalema a di iša ntlong ya modimo wa gagwe kua Babele. Korese a di tšea moo, tša newa e mongwe yo leina la gagwe e lego Sesebatsara yo a bego a mmeile ya ba mokgoma;

15a mo laela a re: Tšea dibjana tše, o ye o di iše Ntlongkgethwa ya Jerusalema; gore Ngwako woo wa Modimo o tsošwe setsheng sa wona.

16Ke mo Sesebatsara a tlilego a bea motheo wa Ngwako wa Modimo wa Jerusalema. Gomme go tloga moo go sa fela go agiwa le nankhono; fela, ga o ešo wa phethwa.

17Bjale ge e ke kgoši e a rata, gona a go tsomišwe mo ngwakong wa matlotlo wa kgoši ya Babele, gore go bonwe ge e le ge kgoši Korese a laetše go aga Ngwako wa Modimo fa Jerusalema; re be re romelwe phetolo yak kgoši tabeng ye.

← Chapter 4 Jump to: Chapter 6 →

Recommended Reading

Commentary Ezra Commentaries → Devotional Ezra Devotional Guide → Get This Bible BIBELE Study Bible →