Ezra 3

Sotho 1951 (BIBELE)

← Chapter 2 Jump to: Chapter 4 →

1Ge go balama kgwedi ya go šupa Baisiraele ba le metseng ya bona, setšhaba sa phuthegela Jerusalema boka monna o tee.

2Jeshua morwa wa Jotsadaka, le bana babo ba baperisita, le Serubabele morwa wa Sealathiele le bana babo, ba tsoga ba aga aletare ya Modimo wa Isiraele, ya go tliša dihlabelo go yona ka mo go ngwadilwego molaong wa Moshe monna wa Modimo.

3Aletare yeo ba e agile bodulong bja yona bja kgale; ba dira ba swerwe ke poifo ka baka la ditšhaba tša naga yeo, ba tlišetša Morena dihlabelo mo go yona ka moswana le ka mantšiboa.

4Ba dira monyanya wa mešaša ka mo go ngwadilwego; le dihlabelo ba di tliša ka mehla ka palo ya tšona, ka mo di swanetšego matšatši ka moka.

5Go tloga moo gwa dirwa sehlabelo sa ka mehla, le sa dikgwedi tše mpsha le sa menyanya e mekgethwa ka moka ya Morena, le sa mang le mang e a tlišetšago Morena sebego ka go ithapa.

6Ba thomile ka tšatši la pele la kgwedi ya go šupa go direla Morena dihlabelo; ke ge motheo wa Ntlokgethwa o sešo wa bewa.

7Fela, ba ntšhitše tšhelete ba nea babetli ba maswika le ba dikwata, ba e nea Basidoni le Batiro le dijo le dinwewa le makhura, gore ba tliše dikwata tša morokwana tša dithabeng tša Libanoni; ba di tliša Jafo lewatleng, ka mo ba bego ba dumeletšwe ke Korese kgoši ya Peresia.

8Ka kgwedi ya bobedi ya ngwaga wa bobedi wa ge ba boetše Jerusalema Ngwakong wa Modimo, ke mo Serubabele morwa wa Sealathiele, le Jeshua morwa wa Jotsadaka, le ba bangwe ba gabo ba baperisita le Balefi, le bohle ba ba boetšego Jerusalema ba etšwa kgolegong, ba beilego Balefi ba ba nago le ngwaga e masome a mabedi le ye e fetago yeo, gore ba hlapetše modiro Ngwakong wa Morena.

9Jeshua le barwa ba gagwe le bana babo, le Kadimiele le barwa ba gagwe ba leloko la Juda, ba hlapetša badiri Ngwakong wa Morena, ba na le barwa ba Henadada le barwa ba bona, le bana ba bobona ba Balefi.

10Ya re ge baagi ba thea Ntlokgethwa ya Morena, baperisita ba ema ba apere dikobo tša bona ba swere diphalafala, Balefi barwa ba Asafa ba swere diletšo tša go reta Morena ka mokgwa o beilwego ke Dafida kgoši ya Isiraele,

11ba reta Morena ka go šielana sebaka, ba mo tumiša ka go re ke yo botse wa go dira Isiraele ka botho neng le neng, setšhaba ka moka sa goba mogobo o mogolo wa go leboga Morena ka baka la ge Ngwako wa Morena o thewa.

12Gomme ba bantši ba baperisita le Balefi, ba e bego e le bagolo melokong ya bona, ba bakgalabje ba ba bonego Ngwako wola wa kgale, ge bona ba bona Ngwako wola wa kgale, ge bona ba bona Ngwako wo o thewa ba lebeletše, ba hlaboša mantšu ba lla o bohloko; mola ba bantši ba gobela ba kwatša mekgolokwane.

13Setšhaba sa šitwa go hlaologanya mantšu a tlhalalo le mantšu a dillo, gobane setšhaba se be se goba megobo e megolo, legoa la kwiwa ke ba kgole.

← Chapter 2 Jump to: Chapter 4 →

Recommended Reading

Commentary Ezra Commentaries → Devotional Ezra Devotional Guide → Get This Bible BIBELE Study Bible →