Job 33

Sukuma 2019

← Chapter 32 Jump to: Chapter 34 →

1Alilūūlū bebe Ayubu, īdegelekage ī mihayo yane, wīdīlīīle pyī īyo nalīyīsomboola.

2Ī haha nane lyashika ī likanza lya kūyomba na nomo gwane; ū lūlīmi lwane lookalaga mihayo.

3Ī mihayo yane īlīfuma mu ng'holò yape, ū nomo gwane gūkwīyomba mu ng'hana īyo nīmanile.

4Ū Moyo o ng'wa Mulungu h'ūyo wanibūmba, ī myūyī ya Ndūji wa shose Īkūninhaga būpanga.

5Ūlū ūlaadūle kūnishokeja ūkūshosha, īmīīlaga nyagosha ūnihelele Ī mihayo yako.

6Ū bebe nū nene tūtikīlile ū kūlī Mulungu, nane nabūmbilwe kūfuma mu malongo ga hasī.

7Ū nene natī na mhayo gose gose gwa kūkogohya, nūūlū natizūkūbuna no kūlwa mihayo yane.

8Alīyo wasomboolile mingī nalīdegeleka, ī mihayo ya kūfuma ng'wilaka lyako nīyigwile.

9Wayombile, “Ū nene nalī ng'wela, natī na shibi; nalī wape, natī na shilingo.

10Ū wei dūhū ū Mulungu wanibonile būbi ū nene, wabizilūniisaaba gīkī nalī ng'wanishi wakwe.

11Wanibohije mbohyo a magūlū gane, būlī kwene ūko nakūbītīlaga anilolile dūhū.”

12Alīyo leka nakūshokeje gīkī, ū mu mhayo gwenūyū ūlīhūbīla, nguno ū Mulungu ntaale no kūtinda banhū.

13Nibūlī ūkūndugumīlaga ūhaya gīkī, “Ū Wei atashoshaga nūūlū ūmūje Īyo akwīyītaga?

14Ū Mulungu akayombaga mu nzīla ningī, nūūlū īkī ū munhū adūgije kūduuma ū kwitegeleja.

15Makanza gangī akayombaga mu nzīla ya shilooti, nūūlū mu koolekegeje ka būjikū, banhū balī mu būlīīlī baabītagwa tūlo ndito;

16ashikile kūlūngalūnga mu matū ga munhū, ūng'ogohya mu mihayo ya kūng'hūgūla,

17gīkī angalūche īnge ū mu būhūbi, na kūnang'hana atizūgwa mu wikumīlīja,

18ayīpīje ī ng'holò yakwe ītizūhombokela ng'wichongo, nū būpanga bokwe būtizūyagajiwa bo līlūshū.”

19Makanza gangī ū munhū akataalagwa manasu washoka mu ndīlī, na kūmaniyiigwa maguha gakūbugumaga būlī gwa;

20nose ī ng'holò yakwe yakolwa Ī shilīwa, na a mate gakwe gooya ū kūshilūmba Ī shilīwa h'ūmo shikasandūkīla.

21Ū mīlī gwakwe gūkaseedeekaga gwashila gete, a maguha gakwe ayo galibījiwe nofu gitenda ha ng'wape.

22A henaho numho ī ng'holò yakwe yegeela kūhombokela ng'wichongo; ū būpanga bokwe wegeelaga kū bafu.

23Alīyo ūlū ūbizaho malaika wa kūnombela, ūmò mu shihūmbī kūlwa kūntonga munhū īyo īng'wigeleelilwe;

24ū ng'wenūyo ūlū ūnchīla shigongo akūhaya, “Mpījagi atizūhombokela ng'wichongo, napandīkaga shikomoolelo kūlwa nguno yakwe.”

25A henaho ū mīlī gwakwe gūkūshoshiwa būpya gūbize gītī go ng'wana, gūkūshoshiwa ūmo walī mu shikū ja walūki bokwe.

26Hūna akūnomba ū Mulungu ang'wanukūle; akūbūbona ū būshū bo ng'wa Mulungu atūle lūpūndū kūlwa būyegi, nguno ū Mulungu wanshoshaga hangī ū mu būtūngīlīja bokwe.

27Akwīmīīla kū būtongi wa banhū ahaye gīkī, “Naalī nīītile shibi nībipya Īyo ītūngīlīgije; alīyo natalīpīlilwe īyo īnigeleelilwe.

28Wīkomoolaga ī ng'holò yane Ītizūhombokela ng'wichongo, ū būpanga wane būkūlīyegela ī lisana.”

29Ū Mulungu akang'wītīlaga ū munhū pyī ī yenīyī, akūshisha ng'hangala ibīlī nūūlū idatū,

30gīkī ayīshoshe ī ng'holò yakwe Ītizūgwīla ng'wichongo; ī lisana lya būpanga līng'wakīīle.

31Dīlīīlaga Ayubu ūnidegeleke, huumūlaga nayombe.

32Hanuma ūlū ūlī na mhayo ūkūnishokeja; nīyo ūhabūle, nguno natogilwe wīnge ū mu mahane hane.

33Alīyo ūlū ītī chene nidegelekage dūhū lūūlū ū bebe; huumūlaga sele nakūlange masala.

← Chapter 32 Jump to: Chapter 34 →