Micah 1

Sukuma 2019

Jump to: Chapter 2 →

1Ūyū gwene mhayo go ng'wa SEEBA ūyo gūkang'wizīīla Mika muna Moleshesi mu makanza ga būsugi wa batemi ba mu sī ya Yuda; ba Yotamu, Ahazi na Hezekia. Shalī shakoolechiwa īsho akashibona kūlwa mihayo ya Samalia na Yelusalemu.

2Bing'we banhū igwagi, degelekagi bose pye; bebe sī nī shose īsho shilī mulī bebe, lembeelagi ū Seeba MULUNGU amukaanīlīje; ū ū SEEBA kūfuma mu hekalu yakwe neela.

3Ū SEEBA aliza kūfuma kwipande lya wikalo bokwe. Izile, alika akūpandaga ha mapande ga higūlya ga sī.

4Ī ngūlū akūjipandaga jaaba gītī būgondo bokuumiwa moto, na njonga jikūdūlīkaga gītī minzī gakūholoolaga galīholongota ha ntulumenho.

5Pyī ī yenīyī īlī kūlwa nguno ya būkenaagūji bo ng'wa Yakobo, nguno ya shibi sha numba ya Isilaeli. Ū būkenaagūji bo ng'wa Yakobo ni kī? Būtī Samalia? Al'ī lipande lya higūlya lya Yuda h'ī kī? Ītī Yelusalemu?

6“Alilūūlū ī Samalia nakwīgalūcha kūbiza matūūgo ga makambagūkīle, ipande lya migūnda ya mizabibu. A mawe gaamo nakūgasalang'hanīja mu njonga, Ī misingi nakwīsīmbīīla yitende ha ng'wape.

7Ī shiikolile sha kūlamiwa shaamo shikūpondagūlwa shibelagūke; pye a manong'ho ga mu hekalu gakūpya moto. Mashigīmbo gaamo nakūgakenaagūla pye a gose. A manong'ho gaamo gakilongaga mu kwanukūla mheela ja būmalahya, gakūtūmama hangī kūlwa nīmo gwa būmalahya.”

8Kūlwa yose yenīyī nakūlīla, nakūtūla ng'hūngū; nīyo nakūshimīza nalī dūūhū, ndūhū nūūlū shilatū ū kū mhambala. Nakwimookula gītī nyamhawa, hangī nakūhiimīla gītī ging'hi.

9Nguno a magulaagīje ga Samalia gatī na būpīlile, nīyo gaashikile nī Yuda. Gaashikile kū mibita ya banhū bane, galī Yelusalemu henekīlī.

10Ī yenīyī mutizīkumūcha ū mu Gaasi; yaya gete ū kūlīla. Ū mu Beti-ofula gala galagi mu lūbuubu.

11Bing'we bana Shafili shimīzagi dūūhū, jagi na magooke ging'we, a bana Zaanani batūfuma ī hanze. Ī Beti-Ezeli īlīīlīla ng'hūngū, yataajiwe ū būdūla bo kūkūlang'hana.

12A bikaji ba Malosi balīīgalagala kūlwa kūsaatwa kūtaale, balindīīlile būgunanhwa; būkenaagūji wizile kūfuma kūlī SEEBA, booshikile kū mita gwa Yelusalemu.

13Bing'we bana Lakishi jitungīlījagi magogoteni ī falasa, nguno a bing'we hū ng'walī bandya ba shibi ū mu Sayuni, ū būkenaagūji bo mu Isilaeli būkandīja mu bing'we.

14Alilūūlū, ū nzengo gwa Moleshesi-gasi mukūgūlekela shakwinha sha kwilaga nago. Ū nzengo gwa Akizibu gūtūbiza na būgunanhi ū kū batemi ba Isilaeli.

15Nakūsamīlīja mpyeni amusange a bing'we bikajia ba Molesha. Ūyo al'ikūjo lya Isilaeli akwiza ī Adulamu.

16Imoogagi mapala kūlwa būpīna nguno ya baana bing'we abo mubatogilwe; ihalūlagi mubize na wanga gītī mbeeshi, nguno bakūng'wīngīla, bakūtwalwa mu būsaamiwa.

Jump to: Chapter 2 →