Micah 3

Sukuma 2019

← Chapter 2 Jump to: Chapter 4 →

1Hūna nūhaya, “Degelekagi bing'we batongeejai ba ng'wa Yakobo, bing'we abo mulī basugi ba numba ya Isilaeli. A bing'we ītang'wigeleelilwe mumane kalamulīle kagoloolile?

2Nguno ū wiza mubūkolilwe ng'ūbūtogwa ū būbi, a banhū bane mukabakuubūlaga makūnza ng'wayūjidutūūla ī nofu a ha maguha gabo;

3mukalyaga nofu ja mibīlī ya banhū bane, na kūbasaanula ikūnza lyabo. Na a magūha gabo mukagabīnzagūlaga, ng'wayūbabbutagūla mapingili mapili gītī nyama ja kūzuga mu sabiga!”

4A henaho bakūnīlīīla ū SEEBA, alīyo atūbashokeja. Ū ng'wikanza lyenīlo akūbūbisa ū būshū bokwe ū kūbo kūlwa būbi ūbo bawīta.

5Ū SEEBA alīhaya gīkī, “Balīho bahangi bakabajimīījaga a banhū bane kūlwa kūhaya ‘mhola’, ūlū būpandīka ilya; alīyo ūyo ūleka kūbinha shose shose bakamūūkījaga wanishi.

6A bing'we mukūsangwa būjikū būtī wa kūpandīka shakoolechiwa, mukūgīlwa giiti shitī sha kūbona nūūlū mu nzīla ya būchūja. Ī līīmi līkūbagwīla a bahangi benabo, ū lūshikū lūkūbiza giiti ū kūbo.

7A baboni bakūding'wa minala na a bachūja bakūgooka. Pye a bose bakwikundīkīja ū būshū, nguno lītīho ishosho lya kūfuma kūlī Mulungu.”

8Alīyo ū nene nookalile būdūla, hangī nalī na Moyo o ng'wa SEEBA, na kalamulīle kagoloolile, hamò na nguzu kūlwa kūnkumūkīja Yakobo būkenaagūji bokwe, kūng'olekeja Isilaeli shibi shakwe.

9Igwagi bing'we batongeeji ba numba ya ng'wa Yakobo, bing'we basugi ba numba ya Isilaeli, abo mukagayīlījaga būlamuji būgololoku, na kwīchamya pyī īyo ītūngīlīgije;

10abo mukīzengaga ī Sayuni mu nzīla ja kūbūlaga banhū, nī Yelusalemu mu nzīla jabūbi.

11A batongeeji baamo bakalamulaga kūlwa kūhongwa, a bagabīji baamo bakalangaga kūlwa kwinhwa mheela, na a bahangi baamo bakahangaga kūlwa kwanukūla hela. Alīyo bakansendamīlaga SEEBA kūnū bakūhayaga, “Ū SEEBA atī hamò nise? Ndūhū gwabūbi gwa kūtūgwīla.”

12Alilūūlū, kūlwa nguno ying'we Ī Sayuni īkūlīng'wa gītī ilaale, ī Yelusalemu īkūbiza matūūgo ga makambagūkīle, ū lūgūlū lwa hekalu gītī shigūlū shokalīīlwa masaka.

← Chapter 2 Jump to: Chapter 4 →