Micah 4

Sukuma 2019

← Chapter 3 Jump to: Chapter 5 →

1Ū mu shikū ja kū būkalīkījo ū lūgūlū lwa hekalu ya ng'wa SEEBA lūkūbiza lūtaale no, lūkūgūngūhiwa kūkīla ngūlū jose, nhaale na ndo; hūna a banhū bakūhūūma bajile koi.

2Mahanga mingī gakwiza kūnū gakwiwīlaga, “Nzūgi tūje tūkalinhe mu lūgūlū lwa ng'wa SEEBA, kū numba ya ng'wa Mulungu o ng'wa Yakobo. Akūtūlanga ī nzīla jakwe, tūbize na būdūla wa kūshimīzīla mu katongeelele kakwe.” Ī shilagīlo shikūfuma mu Sayuni, ū mhayo go ng'wa SEEBA gūkūfuma Yelusalemu.

3Mahanga mingī akūgalamula, na kūyangūla wilemeelwa wa mahanga ga nguzu hose pyī ūko galī. Ī shū jabo bakūjisula jibize magembe na a machimu gabo gabize mihoolo. Lītūbiza ho ihanga lya kūbūūcha shilanga kūjūdumīla ihanga līngī, bakooya kwilanga mihayo ya būlūgū.

4Būlī munhū akūlembeela mu mbeho ya nzabibu gwakwe, na mu mbeho ya ntiini gwakwe; na atilonga wa kūbogohya, nguno ū SEEBA wa Būdūla bose hū ng'wene alīhaya.

5A mahanga a gose ni gashimīzīlage mu lina lya bamulungu baago; a bise nise tūkūshimīzīla mu lina lya ng'wa Seeba Mulungu wise welelo na welelo.

6Ū Seeba alīhaya gīkī, “Ū mu lūshikū lwenūlo nakūbabilinga a balemehazu; nabenhe pye abo balī kū būsaamiwa, abo nabapīnīhaja.

7A balemehazu h'abo nakūbīīta babize būshiigo wa kūpīla, abo baasaamiwa bakūbiza ihanga lya nguzu. Ū SEEBA akūbiza nsugi wabo ū mu lūgūlū lwa Sayuni, kūfuma lūshikū lwenūlo na kūshisha welelo bose.

8Hūna ū bebe lūgūlū lwa Sayuni, ng'hambī ya balang'hani ba ng'holo; īyo wisagījiwa īkūshikīīla. Ūkūshokejiwa ū būtaale wako, ū būtemi būkwiza Yelusalemu hangī.”

9Nibūlī ūlīhūlūūla gīko ī haha? Ūtī na ntemi nūūlū wa kūkūganikīla, kūshisha nose ūlīminyiwa būsūngū gītī nkīma ng'wikanza lya kūbyala?

10Bebe Sayuni līlaga ng'hana, nīyo yoganyaga gītī nkīma alī ng'wikanza lya kūbyala, nguno ī haha shikwigelile ūfume ū mu nzengo, ūkūja kū matogolo ūkatūūle ng'hambī kwenūko. Ūkūja Babuloni, h'ūko ū kūjūpīlīla; ū SEEBA akūkūpīgīja kwenūko akwīnje ū mu makono ga banisha bako.

11Alīyo ī haha mahanga mingī gakwitingije. Gakwiwīlaga, “Leki atowe ū Sayuni a miso gise gabone galūmbe!”

12Gwike a maganiko ga ng'wa SEEBA batagamanile; batīdeebile īyo ayīhelile ūyo akababilingaga gītī būsīga bo kūtūla ha lūbūūga.

13“Bebe Sayuni būkaga ūtūle, nguno nakūkwinha mapembe ga chūma; nakūkwinha chūūga ja shaba ūtobagūle mahanga mingī.” Īsho baapandīka mu wiboneeji ūkūshikomanya kūlwa ng'wa SEEBA, Ī sabo jabo jikūbiza ja ng'wa SEEBA wa sī yose.

← Chapter 3 Jump to: Chapter 5 →