Micah 2

Sukuma 2019

← Chapter 1 Jump to: Chapter 3 →

1Balī mu kwihīga abo bakadosaga mihayo mibi, abo bakahelaga yabūbi aho balaalile mu būlīīlī! Ūlū būleela dūhū ī gīkī bīshikīlīja nguno balī nabo ū badūla wa kwīyīta.

2Bakikūmbagwa malaale ga banhū na ng'hana baagadaatya; nūūlū numba ja bichaabo bakajisolaga gete. Bakang'wiboneelaga munhū na kaya yakwe, munhū ng'wichabo banyeekeja pyī ū wingīji bokwe.

3Alilūūlū, ū SEEBA alīhaya gīkī, “Nalīhela būkenaagūji kūlwa nguno yabo a banhū benaba, būkenaagūji ūbo mutūbūpūlūgūka. Mutikala mukūshimīzaga nyadooshi, nguno līkūbiza ikanza lya mayanga.

4Ū mu lūshikū lwenūlo a banhū bakūmugīmba nyachilū; bakūyūng'wineelegeja bakwīmbaga mīmbo na kūlīla ng'hūngū mu kūsaatwa kūtaale, balīhaya: ‘Aga twashila būlī; ū wingīji wa banhū bane bogabanhyiwe. Wanitaagīgije ū nene! A malaale gise wabinhile biboneeji bise.’”

5Hūna lūūlū, ū mu kwibilinga kwa banhū ba ng'wa SEEBA, ū bebe ūtūbiza na ose ose wa kūtūlīja mbale kūgaba sī.

6A bahangi babo bakahayaga, “Yaya ū kūhanga, ūtikalage wīhanga ī mihayo yenīyī; tūtīko kūgwīlwa magooke a bise.”

7Bing'we numba ya ng'wa Yakobo, twibūūje hamo gīkī, “Ū Moyo o ng'wa SEEBA wapelanile? Akīītaga na mihayo īlī gīko? Ī mihayo yane ītang'wītīlaga yawiza ūyo nzīla jakwe jitūngīlīgije?

8Ū mu shikū jenīji a banha bane balīta ī mihayo gītī banishi. A babīti mulīyūbazuuja ī shizwalo Ī shisoga mu būtūdīlīla, gītī banhū bafumile kū būlūgū.

9A banhū bane a bakīma mukūbapeejaga ū mu numba jabo ī nsoga; a baana babo ng'wabīngīja ilalī Ī jane.

10Būūkagi ng'wīnge a henaha! Ī lyenīlī līt'ipandī ling'we lya kwifuulīla, nguno lyasosohalile no; lyakenaagūkile lītī na kapīlīle.

11Ūlū nomolomo nūūlū nembagūji wiza alīhaya, ‘Nakūmuhangīla divai na walwa,’ ū ng'wenūyo h'akūbiza ng'hangi wabo a banhū aba!”

12Ee Yakobo, nakūmubilinga bose pye; na ng'hana nakūwenha pyī ū būshiigo wa Baisilaeli. Nakūbenha pye a bose gītī kwenha ng'holo mu numba yajo, gīt'idaale lya ng'holo kū madīīmīlo galyo; ī lipandī līkookala banhū.

13Kalongoji akūchibūla nzīla hūna abatongeele; bakūtwinya a ha mita bafume hanze. Ū ntemi wabo akūtonga ū kūfuma, ū kū būtongi wabo alīko SEEBA.

← Chapter 1 Jump to: Chapter 3 →