Micah 5

Sukuma 2019

← Chapter 4 Jump to: Chapter 6 →

1Bebe nzengo gwa mabità, gakobyage a mabità gako, nguno ī haha tūgobanījiwe. Ū nsugi wa Isilaeli bakūntūla nang'ha h'itama.

2Ee Betelehemu ya Efulata, ahene ūlī ndo ū mu basugi ba Yuda, alīyo ū mulī bebe akwilonga nsugi wa kūbasuga a Baisilaeli kūlwa nguno yane; ū wei alīho kwīngīīla kale na kale, wa shikū ja welelo na welelo.

3Hūna lūūlū ī Isilaeli īkūlekwa, kūshisha līshike ī likanza lya kūbyala kwakwe ūyo alī nda, na a baana ba ng'wawe bize kwisangīja na a Baisilaeli.

4Akwīmīīla alīdīīme ī lidaale lyakwe mu nguzu ja ng'wa SEEBA, mu būdūla bo lina lya ng'wa SEEBA Mulungu wakwe. Bakwikala mu mhola, nguno ū būtaale bokwe būkūshika kū ngelelo ya sī.

5Ū wei akūbiza mhola yabo. A Baashulu ūlū biza kwīdumīla Ī sī yise, gīkī baje bakūjidimaga ī ng'hambī jise ja bashilikale, tūkūbabūūkīja badīīmi mpungatī, na batongeeji banaane ba banhū.

6Ī sī ya Ashulu bakwīsuga bo līlūshū, ī sī ya ng'wa Nimulodi bakwīsuga bo shilanga. Ū SEEBA akūtūpīja ū kū Baashulu ūlū bīdumīla ī sī yise hose pyī ū mu mbīmbī jise.

7A ba būshiigo wa babyalwa ba ng'wa Yakobo abo basambaalile mu banhū bingī bakūbiza gītī lūme lwa kūfuma kūlī SEEBA, gītī iswaalala kū maswa managana, Īlo lītalindaga kūlagīlwa na munhū, nūūlū lītagataga kūlwa kūhang'wa na munhū.

8A ba būshiigo wa babyalwa ba ng'wa Yakobo bakwiguulanya mu mahanga, mu banhū bingī, bakūbiza gītī shimba mu ndimu ja mu mapoolu, gītī shimba songi mu madaale ga ng'holo, ūmo īkatandagūlīlaga būlī kwene ūko yūgalūkīla, na atīho wa kūgunanha.

9Ū nkono gwing'we gūkūbiza higūlya ya banishi bing'we; pye a baluhya bing'we bakūkenaagūlwa.

10Ū SEEBA alīhaya gīkī, “Ū mu lūshikū lwenūlo nakūjibūlaga ī falasa jing'we jing'wīnge, na a magogoteni ging'we ga būlūgū nakūgabīnzagūla.

11Ī mizengo ya mu sī ying'we nakwīkenaagūla, nī ng'hambī jing'we ja bashilikale nakūjikambagūla.

12Ū būlogi wing'we nabo nakūbūkenaagūla, mukooya ū kūchemba ī ngoko.

13Ī shigīmbo shing'we sha kūpūnza nakūshikenaagūla, na a mawe ging'we ga kūlamiwa nakūng'wīngīja; mutikala mukwinamaga kū būtongi bo milīmo ya makono ging'we.

14Ī ng'hīngī jing'we ja Maashela nakūjidubbūla najīnje ū mu bing'we, nī mizengo ying'we nīsambaagūle.

15A mahanga ayo galemile kūniigwa nakūgamalīla shiilī mu būpelanu na būdaki.”

← Chapter 4 Jump to: Chapter 6 →