bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
Zechariah 1
Zechariah 1
Sukuma 2019
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 2 →
1
Mu ng'weji gwa kanaane ng'waka gwa kabīlī gwa būsugi bo ng'wa Dalio, mhayo go ng'wa SEEBA gūkiza kūlī ng'hangi Zakalia ng'witūnja o ng'wa Belekia ng'wana Ido; gūhaya gīkī.
2
“Ū SEEBA walī wabadakīīla no a bakūlūgenji bing'we.
3
Alilūūlū, bawīlage a banhū, Ū SEEBA wa būdūla bose alīhaya gīkī, ‘Nishokelagi nene,’ alīhaya SEEBA wa Būdūla bose, ‘nū nene nakūmushokela a bing'we,’ alīhaya SEEBA wa Būdūla bose.
4
Yaya ū kūbiza gīt'ūmo baalī a bakūlūgenji bing'we, abo bahangi ba kale bikalaga bakūbawīlaga, Ū SEEBA wa Būdūla bose alīhaya gīkī, ‘Galūkagi mulekane nī nzīla jing'we ī jabūbi, nī shīītīle shing'we ī sha malofu.’ Alīyo batabigwile, nūūlū kūnidīlīla ū nene yaya, alīhaya SEEBA.
5
Al'ī haha balī halī lūūlū a bakūlūgenji bing'we? Nūūlū a bahangi, balī ba kūshinga ilalī?
6
Alīyo īyo nīlagīlaga mu mihayo yane na shilagīlo shane, ītabapandīkile a bakūlūgenji bing'we gīt'ūmo nabalagīīlīlaga batūmami bane a bahangi? “A henaho būshosha balīhaya, ‘Ū SEEBA wa Būdūla bose watwītīla īyo ītwigeleelilwe kūlwa nzīla na nhūngwa jise, gīt'ūmo walī ahelelile kwīta we ng'wenekīlī.’”
7
Lūshikū lwa makūmi abīlī n'inè ng'weji gw'ikūmi na gūmò, ūyo gūkitanagwa ng'weji gwa Shebati; gwalī ng'waka gwa kabīlī gwa būsugi bo ng'wa Dalio, mhayo go ng'wa SEEBA gūkiza kūlī ng'hangi Zakalia ng'witūnja o ng'wa Belekia ng'wana Ido.
8
Nakabona shakoolechiwa mu makanza ga būjikū; kwimanīla ū kū būtongi bone wīmīīla munhū adamhīlile falasa yaaza! Walī wīmīīla mu mitī ya bonji būsoga, mu ntubīlo gwa longa lo minzī. Ū kū numa yakwe jalīho na falasa jingī, jaza, ja buluge, na jaape.
9
Nūbūūja, “Baba kī ī jenīji?” Ū malaika ūyo waniyombyaga ūniwīla, “Lembeeshaga nakoolekeje balī ba nani a benaba.”
10
Ū munhū ūyo olī wīmīīla mu mitī ya bonji ūshosha alīhaya, “A benaba balī abo SEEBA walī wabatūma kūja hose hose ū mu sī.”
11
Hūna būng'wenhela mhola ū malaika ūyo walī wīmīīla mu mitī ya bonji; būhaya, “Twamala ū kūbīta hose pye ū mu sī, twabona gīkī pyī ī sī īlembeelile, hangī īlī mu mhola na kaholele.”
12
Hūna ū malaika o ng'wa SEEBA ūhaya, “Ee SEEBA wa Būdūla bose, kūshisha nanalī ūkwikala ūtūgūsaatagwa ū nzengo gwa Yelusalemu nī mizengo ī yīngī ū mu Yuda, īyo washishaga myaka makūmi mpungatī wīpelanīlile?”
13
Hūna ū SEEBA ūtūmamīla mihayo milyehu na ya kūlūngūja, akūng'wīlaga ū malaika ūyo walūngalūngaga nū nene.
14
Na ng'hwe ū malaika ūyo walūngalūngaga nane; ūniwīla “Gūūyū mhayo gūhayage, Ū SEEBA wa Būdūla bose alīhaya gīkī, ‘Nalī na wilu būtaale no kūlwa nguno ya Yelusalemu na Sayuni,
15
alīyo nagapelanīlile no a mahanga ayo gakwibonaga galī mu mhola. Nguno ū nene naalī naasaaya ī chene, alīyo hado dūhū; lelo a mahanga genayo gūūbongegeja no ū būluhi wabo.’
16
“Alilūūlū ū SEEBA alīhaya gīkī, ‘Ī Yelusalemu yanisaatile no nalīyīshokela, ī numba yane īkūzengwa mo hangī. Ī Yelusalemu īkūzengwa bo kūgoloolwa na lūgoye lo bazengi,’ alīhaya SEEBA wa Būdūla bose.
17
“Ongejaga kūhaya hangī gīkī, Ū SEEBA wa Būdūla bose alīhaya, ‘Ī mizengo yane īkūbeela no, ū SEEBA akwīlūngūja hangī ī Sayuni, akwīsola ī Yelusalemu.’”
18
Kūponya hangī ī liso ī gīkī nūbona ū kū būtongi bone mapembe ane!
19
Ū malaika ūyo waniyombyaga nūmūjū, “Ma kī nago a genaya?” Ūnishokeja alīhaya, “A genaya h'a mapembe ayo gīsambaaja ī Yuda nī Isilaeli, pyī nī Yelusalemu.”
20
Hūna ū SEEBA ūnoolekeja basuji bane.
21
Nūbūūja, “A benaba baliza kwīta kī?” Ūnishokeja alīhaya, “A genaya h'a mapembe ayo gīsambaaja ī Yuda, nose atīho wa kūbūūcha ntwe gwakwe hangī. Alīyo a basuji benaba bizaga kūgapeeja a mapembe, na kūgaponanja a mapembe ga mahanga ayo gigūngūhya kūlwa kwīyūbūkīla ī sī ya Yuda na kūbasambaaja a banhū baamo.”
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 2 →
All chapters:
1
2
3
4
5
6
7
8
9
10
11
12
13
14