Zechariah 13

Sukuma 2019

← Chapter 12 Jump to: Chapter 14 →

1“Ū mu lūshikū lwenūlo lūzwīlo lwa minzī lūkūlugūlwa kū nguno ya numba ya ng'wa Daūdi na a bikaji ba mu Yelusalemu, kūlwa kūbeeja ī shibi shabo na kūbīngīja ū būsoso wabo.

2“Ū mu lūshikū lwenūlo nakūgīnja a mina ga shiikolile sha kūlamiwa ū mu sī, na ng'hana shitizūkīlwa hangī.” Alīhaya SEEBA wa Būdūla bose. “A bahangi nakūbīnja ū mu sī, nū moyo gwa būsoso.

3Nīyo ūlū munhū wikala ataalī akūhangaga, a ba ise na nina abo bamyala, bakūng'wīla gīkī, ‘Ū bebe shiigelile ūche, nguno ūlīhaya būlomolomo mu lina lya ng'wa SEEBA.’ Ūlū ūhanga a babyaji bakwe bakūnchima ache.”

4Ū mu lūshikū lwenūlo būlī ng'hangi akūgooka kūlwa mihayo yakwe īyo akwīfunya mu koolekejiwa mu nzīla ya būhangi. Atilonga wa kūzwala shizwalo sha nyahangi sha booya, gīkī alembagūle banhū.

5Akūhaya, “Ū nene nalī nīmi natī ng'hangi; kūfuma ha būnīgīnī bone ū nīīlo gwane nakapandīkīlaga mu kūlīma sī gīkī dūhū.”

6Ūlū munhū ūmūja gīkī, “Al'a magulaagīje ayo galī a ha mīlī gwako ga mbika kī?” Akūshosha alīhaya, “A magulaagīje nakagapandīkīla ha kaya ya banwani bichane.”

7Ū SEEBA wa Būdūla bose alīhaya: “Bebe līlūshū, mishaga wilwishe nū ndīīmi wane, wilwishe nang'hwe ū nwani ng'wichane wa bbihī no no no!” “Ntūlage ū ndīīmi jikūbbalasana Ī ng'holo, hūna ū nang'ha gwane nakūgūgalukīja ū kū ndo do do.”

8Ū SEEBA alīhaya gīkī, “Hose pyī ū mu sī selusi ibīlī ja banhū bakūtūlwa bayagaale; alīyo īkūlekeelwa moi selusi īmò.

9A banhū ba selusi īmò benaba nakūbabītya mu moto; nakūbeeja gītī feza, nakūbagema gītī zahabu. Bakūniitana mu lina lyane nane nakūbidīka; nakūhaya, ‘A benaba banhū bane,’ nabo bakūhaya, ‘Ū SEEBA alī Mulungu wise.’”

← Chapter 12 Jump to: Chapter 14 →