Revelation 1

Shekhawati

Jump to: Chapter 2 →

1इ पोथी म बे बाता मांडी गई जखी ईसु मसी दरसाव क जरिए बताई ह। अ बाता ईसु मसीनै परमेसर बताई ह जिऊँ बो आपका दासानै, दरसावा क जरिए बतावै क आबाळा टेम म काँई होबाळो ह। ईसु मसी आपका ईस्बर नगरी दुतनै यहून्ना क कनै भेजर अ बाता बताई।

2जणा यहून्नानै जोक्यु दरसाव होया बो बा बाता क बारां म मांड्यो। अर आ बा सचाई ह जखी ईसु मसी बतायो हो। अ परमेसर क कानिऊँ आएड़ा समचार हीं।

3भागहाळो ह जखो परमेसर क कानिऊँ आएड़ा इ समचारनै बाचै अर भागहाळा हीं बे जखा इ पोथी म मांडेड़ी बातानै सुणै अर मानै क्युं क बो टेम सांकड़ैई ह जद अ बाता पूरी होसी।

4म यहून्ना, एसिया परदेस की सात्यु बिस्वासी मंडळ्यानै मांडू हूँ , परमेसर जखो ह, हो अर आबाळो ह बिकै कानिऊँ, अर सात्यु आत्मा जखी बिकै सिंघासन क सामै ह बाकै कानिऊँ, अर बिस्वास जोगो गुवा, अर मरेड़ा मऊँ जीबाळो पेलो अर इ धरती का राजा प राज करबाळा ईसु मसी कानिऊँ थार प दया अर सुक-स्यांती होती रेह्‍वै। बो आपणाऊँ परेम करै ह अर आपका लोयऊँ आपानै आपणा पापऊँ सुद करबा ताँई मर्यो ,

6अर आपानै अंय्यां की परजा अर याजक बणाया जखी परमेसर अर परम-पिता की सेवा करै। बिकी मेमा सदाई होवै! अंय्यांई होवै।

7“देखो, बो बादळा क सागै आर्यो ह,” अर “हरेक आँख बिनै देखसी, अठै ताँई बे बी जखा बिनै मार्या हा।” अर धरती का सगळा कूणबा का मिनख “बि ताँई छाती पिटसी।” अंय्यांई होसी! अंय्यांई होवै।

8परबु परमेसर, जखो ह, जखो हो अर जखो आबाळो ह, जखो सऊँ सक्‍तिसाली ह बो खेवै ह, “मई अलफा अर ओमेगा हूँ।”

9म यहून्ना थारो बिस्वासी भाई हूँ, म आपणा ईसु मसी म पिड़ा, थ्यावस अर राज म थारो साती हूँ। मनै परमेसर का बचन अर ईसु मसी की गुवाई देबा की बजेऊँ देस निकाळो देर पत्तमुस नाम का टापू प भेज दिओ गयो हो।

10अरामहाळा दिन म परबु की जे-जैकार करर्यो हो जणा म पबितर आत्माऊँ भरगो अर म मेरै गेलनै नरसिंगा की उवाज सुणी ,

11अर बि उवाज म अंय्यां हेलो आर्यो हो क, “तू जोक्यु बि देखर्यो ह बिनै एक पोथी म मांडतो जा अर बिकै पाछै आ बातानै इफिसुस, स्मुरना, परगमुम, थुआतिरा, सरदिस, फिलीदिलफिआ अर लोदिकीया की सात्यु बिस्वासी मंडळ्यानै भेज दिजे।”

12म बिनै देखबा ताँई जखो मेरूँ बोलर्यो हो गेलनै मुड़्यो जणा मनै सात सोना का दिपदान दिख्या।

13अर बा दिपदाना क बिचमै एक मिनख दिख्यो जखो मिनख का बेटा की जंय्यां हो अर बो पगा ताँई चोळो पेर राख्यो हो। अर बिकै सीना प सुनेरा रंग को कमरबंध बंदर्यो हो।

14बिका सीर का बाळ दुदऊँ बी धोळा धप हा अर बिकी आँख आग की लपटा की जंय्यां ही।

15बिका पग ताजाई तपाईड़ा काँसा की जंय्यां चमकर्या हा अर बिकी उवाज झरना का पाणी की जंय्यां ही।

16अर बो आपका दाया हात म सात तारा ले राख्या हा। बिका मुंडाऊँ दोधारी तलवार बारनै निकळरी ही। अर बिकी सकल दोपारी का भळकता सूरज की जंय्यां ही।

17जद म बिनै देख्यो जणा बिका पगा म मरेड़ा मिनख की जंय्यां पड़गो। अर बो आपको दाइणो हात मेर प धर मेरूँ बोल्यो, “डरै मना। म पेलो अर आखरी हूँ।

18म बोई हूँ जिकनै जीवन ह। म पेली मरगो हो पण इब सदा-सदा ताँई जिंदो हूँ, मोत अर पताळ की ताळ्या मेरै कनै ह।

19“इ ताँई जखी बाता तू देखी ह, जखी बाता होरी ह अर जखी बाता होबाळी ह बा सगळ्यानै मांडले।

20बा सात तारा, जिनै तू मेरै दाया हात म देख्यो हो अर बा सात सोना का दिपदाना को भेद ओ ह क बे सात तारा बिस्वासी मंडळ्या का सात ईस्बर नगरी दुतानै दिखावै अर बे सात दिपदान सात बिस्वासी मंडळ्यानै दिखावै ह।

Jump to: Chapter 2 →