Revelation 20

Shekhawati

← Chapter 19 Jump to: Chapter 21 →

1इकै पाछै मनै ईस्बर नगरीऊँ एक ईस्बर नगरी दुत तळै उतरता दिख्यो। बिकै हात म पताळ की चाबी अर एक बडीसारी साँकळ ही।

2बो बि अजगरनै जखो पुराणो साँप, दुस्ट अर सेतान खुवावै ह बिनै पकड़र एक हझार बरस ताँई साँकळऊँ बांद दिओ।

3बो बिनै पताळ म गेर'र बिकै ताळो लगा दिओ। अर बिकै उपर म्होर लगादि जिऊँ बो एक हझार बरसा ताँई मिनखानै कोनी भंगरा सकै। पण एक हझार बरसा क पाछै बिनै क्युंक टेम ताँई छोड्यो ज्यासी।

4जणा म क्युंक सिंघासन देख्या बापै क्युंक मिनख बेठ्या हा। बानै न्याय करबा को अधिकार दिओ गयो हो। अर म बा मिनखा की आत्मानै जाका सीर ईसु मसी की गुवाई देबा की बजेऊँ अर परमेसर को बचन सुणाबा की बजेऊँ काट्या गया ह, अर बा मिनखानै जखा बि खुखार ज्यानबर अर बिकी मूरतीनै कोनी धोक्या अर नइ बिका आंकनै आपकै माथा अर हात प लगाया हा देख्यो। बे ओज्यु जिंदा होगा अर एक हझार बरस ताँई मसी क सागै राज कर्या।

5बाकी का मिनख जद ताँई एक हझार बरस कोनी बितगा बे जिंदा कोनी होया। ओ पेलो मर्या पाछै ओज्यु जिंदो होबो ह

6बे मिनख भागहाळा अर पबितर ह जखा पेला मर्या पाछै ओज्यु जिंदा होबा का भागी होसी। आ मिनखा प दुसरी मोत को कोई बस कोनी। पण अ मिनख परमेसर अर मसी का याजक होसी अर बिकै सागै एक हझार बरस ताँई राज करसी।

7पण जद एक हझार बरस पूरा होज्यासी जणा सेताननै केद मऊँ छोड्यो ज्यासी।

8अर बो धरती का सगळा देसा का मिनखानै भंगराबा ताँई जासी अ गोग अर मागोग का नामऊँ जाण्या जावै ह। बो बानै युद करबा ताँई भेळा करसी। अर बे समदर की रेत की जंय्यां अणगीणत होसी।

9सेतान की सेना सगळी धरती प फेल ज्यासी। अर बे परमेसर का मिनखा का डेरा अर बिकी लाडली नगरीनै घेर लेसी पण बापै आग बरससी अर बानै बाळ गेरसी।

10अर बि सेताननै जखो बानै भंगरातो हो बि तिजाब हाळा नरक का भबकता आग का कूंड म जिकै मांयनै बि खुखार ज्यानबर अर झूठा परमेसर की खेबाळानै गेर्यो गयो हो बिकै मांयनै गेर दिओ ज्यासी। अर बानै सदा-सदाई दिन-रात बिकै मांयनै तड़पायो जासी।

11इकै पाछै म बडोसारो धोळो सिंघासन अर बिकै उपर जखो बेठ्यो हो बिनै देख्यो। बिकै सामैऊँ आसमान अर धरती भाग छुट्या अर बाको नामो निसानई कोनी रिह्यो।

12इकै पाछै म छोटाऊँ लेर बडा ताँई का सगळा मरेड़ा मिनखानै देख्यो। बे बि सिंघासन क सामै खड़्या हा , जणा क्युंक पोथ्या खोली गई। आकै पाछै एक ओर पोथी खोली गई, जखी जीवन की पोथी ह। अर बाका करमा गेल जखा इ पोथी म मांड्या गया हा, मरेड़ा को न्याय कर्यो गयो।

13जखा मिनख समदर म मरगा हा, बानै समदर दे दिओ अर मोत अर पताळ बी मरेड़ा मिनखानै दे दिआ। अर बा हरेक को न्याय बाका करमा गेल कर्यो गयो।

14इकै पाछै मोतनै अर पताळनै आग का कूंड म गेर दिओ गयो। ओ आग को कूंडई दुसरी मोत ह।

15अर जिको बी नाम जीवन की पोथी म मांडेड़ो कोनी मिल्यो बिनै बी इ आग का कूंड म गेर दिओ गयो।

← Chapter 19 Jump to: Chapter 21 →