Revelation 15

Shekhawati

← Chapter 14 Jump to: Chapter 16 →

1इकै पाछै म ईस्बर नगरी म एक ओर ताजूबभरी निसाणी देखी, इबकै म देख्यो क सात ईस्बर नगरी दुत आखरी सात म्हामार्या क सागै हा। क्युं क आकै होबा क सागैई परमेसर को परकोप बी पूरो होज्यासी।

2इकै पाछै मनै काच की जंय्यां को समदर दिख्यो बो अंय्यां दिखै हो जंय्यां क बिकै मांयनै आग बळरी हो। जखा मिनख बि डरावना जानबर की मूरती अर बिका नाम का आंकऊँ जीतगा हा बानै बी काच का समदर क सारै खड़्या देख्या। बे परमेसर की देयड़ी बीणा ले राखी ही

3बे मिनख परमेसर का दास मूसा अर उन्या का गीत गावा हा, “परबु परमेसर थे सऊँ सक्‍तिसाली हो। थारा काम बडा अर ताजूबभर्या हीं। ओ जुग-जुग का राजा। थारो गेलो सचो अर धारमिक ह।

4ओ परबु, बस थेई पबितर हो! देस-देस का मिनख थारै कनै आसी अर थारी जे-जैकार करसी। सगळा थारूँ डरसी अर थारो मान करसी, क्युं क थारी धारमिक्‍ता परगट होई ह।”

5इकै पाछै म ईस्बर नगरी म मनदरनै देख्यो जखो बि तम्मूनै दिखावै ह जिमै दस हुकम धरेड़ा हा। इ मनदर का कुआड़ खोल्या गया।

6बिकै मांयनैऊँ बे सात ईस्बर नगरी दुत बा सात म्हामार्या क सागै बारनै आया। बे साप अर चमकीला धोळा गाबा पेरमाल्या हा अर आपका सीना प सोना का पटा बांद माल्या हा।

7जणा बा च्यारू जीवता पराण्या मऊँ एक जणो बा सात्यु ईस्बर नगरी दुतानै एकेक सोना को प्यालो दिओ जखो अमर परमेसर का परकोपऊँ भरेड़ा हा।

8बो मनदर परमेसर की मेमा अर सक्‍ति का धुँआऊँ भरेड़ो हो। अर जद ताँई बे सात ईस्बर नगरी दुत बा सात म्हामार्यानै पूरी होबा ताँई कोनी भेजी बि मनदर म कोई कोनी बड़ सक्यो।

← Chapter 14 Jump to: Chapter 16 →