Revelation 12

Shekhawati

← Chapter 11 Jump to: Chapter 13 →

1इकै पाछै आसमान म एक बडी सेलाणी परगट होई। मनै एक लूगाई दिखबा म आई बा सूरजनै धारण कर राखी ही अर चंदरमा बिकै पगा तळै हो। बिकै माथा प बारा तारा को ताज हो।

2बा पेटऊँ ही अर बा दरदऊँ अंय्यां चिलाटी घालरी ही क इबारई बिकै टाबर होबाळो होवै।

3ईस्बर नगरीऊँ एक ओर सेलाणी परगट होई, मेरै सामै एक लाल रंग को बडोसारो अजगर खड़्यो हो बिकै सात सीर अर दस सींग हा अर बिकै सात सीरां प सात ताज हा।

4बो आपकी पूंछऊँ सपाटो मार'र आसमानऊँ एक तिहाई तारानै धरती प फेक दिओ। अर बो बी लूगाई क सामै जखी टाबर जलम्बाळी ह खड़्यो होगो जिऊँ जद बा टाबर जलमै जणा बो बि टाबरनै निगळज्या।

5बा लूगाई एक छोरानै जलम दिनी बो लौ का राजदंड क सागै सगळा देसा का मिनखा प राज करबाळो हो। अर बि लूगाई का टाबरनै हात्युहात परमेसर अर बिका सिंघासन क सामै लेज्यायो गयो।

6अर बा लूगाई उजाड़ म भागगी। बा अंय्यां की झघा ही जिनै परमेसर बि ताँई त्यार कर्यो जठै बा एक हझार दो सो साठ दिना ताँई जिंदी राखी जा सकै।

7इकै पाछै ईस्बर नगरी म राड़ छिड़गी। जिमै मुखियो ईस्बर नगरी दुत मीकाईल अर बिका दुत बि बडासारा अजगरऊँ, अर बो अजगर अर इका दुत बाऊँ लड़्यो।

8पण बो अजगर बानै हरा कोनी सक्यो, जिऊँ ईस्बर नगरी म बिकी झघा कोनी बची।

9अर बि बडासारा अजगरनै धरती प फेक दिओ गयो, ओ बोई पुराणो बडो नाग ह जिनै दानव, सेतान बोल्यो गयो ह। ओ सगळा जगत का मिनखानै भंगरावै ह। बो आपका दुता क सागै धरती प फेक दिओ गयो।

10इकै पाछै मनै ईस्बर नगरीऊँ जोरको हेलो सुण्यो, “इब म्हारा परमेसर को छुटकारो, सक्‍ति, अर बिको राज अर मसी को अधिकार परगट होयो ह। क्युं क म्हारा भाईड़ा प दोस लगाबाळो, जखो रात-दिन म्हारा परमेसर क सामै बापै दोस लगाया करतो हो, बिनै तळै फेक दिओ गयो ह।

11बे उन्या का लोयऊँ अर खुदकी गुवाईऊँ, बिपै जीत हासिल करी। बे आपका पिराणानै बी प्यारा कोनी जाण्या अर मोतनै बी गळै लगा लिआ।

12इ ताँई ओ ईस्बर नगरी का रेह्बाळो, खुसी मनाओ। पण हाय धरती अर समदर प, क्युं क बापै सेतान उतरगो ह। बो झाळ्या भर'र आग-बबुलो होर्यो ह, अर बो जाणै ह क बिकन थोड़ोई टेम बच्यो ह।”

13जद बो अजगर देख्यो क, “मनै धरती प फेक दिओ गयो ह,” जणा बो बि लूगाई कानि लपक्यो जखी छोरो जलमी ही।

14पण बि लूगाईनै चील की जंय्यां का दो पांख दिआ गया हा जिऊँ बा बि नाग क सामैऊँ उडर बि उजाड़ म चली जावै जिऊँ साडे तीन बरसा ताँई इकी देखभाळ करी जा सकै।

15जणा बो बडोसारो नाग बि लूगाई क गेल आपका मुंडाऊँ नदि की जंय्यां पाणी गेल कर्यो जिऊँ बो पाणी बिनै भुवा लेज्यावै।

16पण धरती बि लूगाई की मदद करी, धरती आपको मुंडो खोलर बि नदि का पाणीनै जिनै बो अजगर आपका मुंडाऊँ निकाळ्यो हो बिनै पिगी।

17जणा बो अजगर बि लूगाई प झाळ्या भर्यो, अर बो बि लूगाई का वंसजा प जखा परमेसर का हुकमानै मान्या करता हा अर ईसु मसी की गुवाई देता हा बाऊँ लड़बा ताँई निकळ्यो।

18अर बो अजगर जार समदर क किनारै खड़्यो होगो।

← Chapter 11 Jump to: Chapter 13 →