Revelation 17

Shekhawati

← Chapter 16 Jump to: Chapter 18 →

1इकै पाछै सात ईस्बर नगरी दुता मऊँ जाकै कनै सात प्याला हा, एक मेरै कनै आर बोल्यो, “अठै आ, म तनै बि सऊँ बडी बेस्यानै सजा भोगता दिखास्युं जखी बोळी नद्‍या क किनारै बेठी ह।

2बिकै सागै धरती का राजा कुकरम कर्या, अर धरती प रेह्बाळा बिकी कुकरम की अँगूरीऊँ मतवाळा होगा हा।”

3जणा बो दुत पबितर आत्मा म मनै उजाड़ म लेगो। बठै म एक लूगाईनै लाल रंग का खुखार ज्यानबर प बेठी देख्यो। बि जानबर क उपर परमेसर की बुराई करबाळा नाम मंडर्या हा। बिकै सात सीर अर दस सींग हा।

4बा लूगाई लाल रंग का बैंगणी गाबा पेरमाली ही। बा हिरा मोत्याऊँ, सोना, चाँद्‍याऊँ खुदको सिंगार करमाली ही। बिकै हात म सोना को प्यालो हो बो प्यालो सूगली बाताऊँ अर कुकरम की चिजाऊँ भरेड़ो हो।

5बिकै माथा प नाम मंडर्यो हो जखो एक भेद हो , सऊँ बडी नगरी बाबुल बेस्या अर सूगली चिजा की माँ

6म बि लूगाईनै परमेसर का मिनखा का लोय अर ईसु मसी की गुवाई देबाळा मिनखा का लोय पीबा की बजेऊँ मतवाळी होता देख्यो। बिनै देखर मनै बोळो ताजूब होयो।

7जणा बो ईस्बर नगरी दुत मेरूँ बोल्यो, “तू ताजूब क्युं करै ह? म तनै इ लूगाई अर जि सात सीर अर दस सींग हाळा खुखार ज्यानबर प आ बेठी ह बिको भेद बतास्युं।

8जि खुखार ज्यानबरनै तू देख्यो ह, बो पेली हो इब कोनी पण बो जिंदो होर पताळऊँ ओज्यु आसी अर बिको नास होज्यासी। अर धरती प रेह्बाळा बे मिनख जाका नाम जुगादऊँई जीवन की पोथी म कोनी मांडेड़ा बे इ खुखार ज्यानबरनै देखर ताजूब करसी, क्युं क ओ पेला जिंदो हो पण इब कोनी पण बो आबाळो ह।

9“अठै समजबाळी अर ज्ञान की बात कह्यी गई ह। अ सात सीर सात डूँगरानै दिखावै ह, जापै बा लूगाई बेठी ह।

10अ सात सीर सात राजानै बी दिखावै ह, आमैऊँ पाच को तो नास हो चुक्यो, एक इबी राज करै ह, अर एक इब ताँई आयो कोनी। पण जद बो आसी जणा क्युं क टेम ताँई रेह्सी।

11अर बो खुखार ज्यानबर जखो पेला जिंदो हो, पण इब कोनी, बो खुद आठूओ राजा ह ओ बा सात्यु राजा की जंय्यांई बुरो होसी अर, इको बी नास कर दिओ जासी।

12“अर जखा दस सींग तू देख्यो हो बे बी दस राजानै दिखावै ह, पण बानै इबी ताँई राजपाट कोनी मिल्यो, पण आनै बि खुखार ज्यानबर क सागै क्युं क टेम ताँई राज करबा को हक दिओ ज्यासी।

13बे दसु राजा एक मन होसी, अर बे आप-आपकी सक्‍ति अर अधिकार बि खुखार ज्यानबरनै देसी।

14बे उन्याऊँ लड़सी पण बो उन्यो आपका टाळेड़ा, बुलाईड़ा अर आपकै गेल चालबाळा बिस्वास जोगानै सागै लेर बिनै हरा गेरसी क्युं क बो उन्यो राजाओं को बि राजा अर परबुआ को बी परबु ह।”

15बो ईस्बर नगरी दुत मेरूँ ओज्यु बोल्यो, “तू जखी नद्‍या देखी ही जाकै किनारै बा सऊँ बडी बेस्या बेठी ही, बे नद्‍या सगळा कूणबा का मिनखानै, सगळी बोली बोलबाळानै, देस-देस का मिनखानै, सगळा देसानै दिखावै ह।

16बे दस सींग अर जि खुखार ज्यानबरनै तू देख्यो हो बे बि सऊँ बडी बेस्याऊँ नफरत करसी बे बिको सक्यु खोसर बिनै उघाड़ी कर देसी। अर बिको मास खाज्यासी अर बिनै आग म बाळ गेरसी।

17क्युं क परमेसर आपकी बातनै पूरी करबा ताँई बाकै मन म अंय्यां करसी अर बानै एक मन होर अंय्यां करबा ताँई उकसासी जिऊँ बे आपकी सक्‍ति अर आपको अधिकार बि खुखार ज्यानबरनै दे देसी।

18जखी लूगाईनै तू देख्यो हो आ बि बडी नगरीनै दिखावै जखी धरती का देस-देस प राज करै ह।”

← Chapter 16 Jump to: Chapter 18 →