bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Tulu
/
Tulu (ಪೊಸ ಒಡಂಬಡಿಕೆ)
/
Matthew 10
Matthew 10
Tulu (ಪೊಸ ಒಡಂಬಡಿಕೆ)
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 11 →
1
ಬೊಕ್ಕ ಆಯೆ ತನ ಪದ್ರಾಡ್ ಶಿಷ್ಯೆರೆನ್ ಕೈತಲ್ ಲೆತ್ತ್ದ್ ದೆವ್ವೊಲೆನ್ ಬುಡ್ಪಾಯೆರೆಲಾ ಮಾತ ತರತ ಸೀಕ್ಲೆನ್ಲಾ ಮಾತ ತರತ ಬೇನೆಲೆನ್ಲಾ ಗುಣ ಮಲ್ಪೆರೆ ಅಕ್ಲೆಗ್ ಅಧಿಕಾರ ಕೊರಿಯೆ.
2
ಆಯೆ ಕಡಪುಡ್ದು ಕೊರಿನ ಪದ್ರಾಡ್ ಅಪೊಸ್ತಲರೆನ ಪುದರ್ ಉಂದೇ, ಸುರುತ್ತಾಯೆ ಪೇತ್ರೆ ಪನ್ಪಿ ಸೀಮೋನೆ, ಆಯನ ಮೆಗ್ಯೆ ಅಂದ್ರೆಯೆ, ಜೆಬೆದಾಯನ ಮಗೆ ಯಾಕೋಬೆ, ಆಯನ ಮೆಗ್ಯೆ ಯೋಹಾನೆ,
3
ಫಿಲಿಪ್ಪು, ಬಾರ್ತೊಲೊಮಾಯೆ, ತೋಮೆ, ಸುಂಕದ ಮತ್ತಾಯೆ, ಅಲ್ಫಾಯನ ಮಗೆ ಯಾಕೋಬೆ, ತದ್ದಾಯೆ,
4
ಮತಾಭಿಮಾನಿ ಅಂದ್ದ್ ಲೆಪ್ಪವೊಂಡಿ ಸೀಮೋನೆ, ಯೇಸುನು ಒಚ್ಚಿದ್ ಕೊರಿ ಇಸ್ಕಾರಿಯೋತ ಯೂದೆ ಮೊಕುಲೇ.
5
ಈ ಪದ್ರಾಡ್ ಶಿಷ್ಯೆರೆನ್ ಅಧಿಕಾರ ಕೊರ್ದು ಯೇಸು ಕಡಪುಡಿಯೆ. ಕಡಪುಡುನಪಗ ಅಕ್ಲೆಗ್ ಅಪ್ಪಣೆ ಕೊರಿನಿ ದಾನೆಂದ್ಂಡ, “ಪಿದಯಿದ ಜನೊಕುಲೆ ಕಡೆಕ್ಕ್ ಪೋವಡೆ, ಸಮಾರ್ಯೆರೆ ಊರುದ ಉಲಯಿ ಕಾರ್ ದೀವಡೆ.
6
ಮೊಕ್ಲೆನ್ ಬುಡ್ದು, ನಿಕುಲು ತತ್ತ್ ಪೋಯಿ ಕುರಿಕುಲೆ ಲೆಕ್ಕ ಉಪ್ಪುನ ಇಸ್ರಾಯೇಲ್ಯೆರೆ ಜನಾಂಗದ ಕೈತಲ್ಗ್ ಮಾತ್ರ ಪೋಲೆ.
7
‘ಪರಲೋಕ ರಾಜ್ಯ ಕೈತಲಾತ್ತ್ಂಡ್,’ ಅಂದ್ದ್ ಸಾರಿಯೊಂದು ಪೋಲೆ.
8
ಸೀಕ್ದಾಕುಲೆನ್ ಗುಣ ಮಲ್ಪುಲೆ, ಸೈತಿನಕುಲೆನ್ ಬದ್ಕಾಲೆ, ಕೊಷ್ಟ ಪತ್ತ್ದಿನಕುಲೆನ್ ಶುದ್ಧ ಮಲ್ಪುಲೆ. ದೆವ್ವೊಲೆನ್ ಬುಡ್ಪಾಲೆ, ನಿಕ್ಲೆಗ್ ಧರ್ಮೊಗು ತಿಕ್ಕ್ದ್ಂಡ್, ಧರ್ಮೊಗೇ ಕೊರ್ಲೆ.
9
ನಿಕ್ಲೆ ಜೋಳಿಗೆಡ್ ಬಂಗಾರ್, ಬೊಳ್ಳಿ, ಕಾಸ್, ರಡ್ಡ್ ಅಂಗಿ, ಜೋಡು, ಕೋಲು ಇಂಚಿತ್ತಿನೆನ್ ದೆತ್ತೊನೊಡ್ಚಿ. ಬೇಲೆದಾಯೆ ತನ ವಣಸ್ಗ್ ತಕ್ಕದಾಯೆ.
11
“ನಿಕುಲು ವಾ ಊರುಗು ಇಜ್ಜಾಂಡ ಹಳ್ಳಿಗ್ ಪೋಯಿನಪಗ ಅಲ್ಪ ಯೋಗ್ಯದಾಯನ್ ನಾಡ್ ಪತ್ತ್ಲೆ. ಅಲ್ಪ ಯೋಗ್ಯದಾಯೆ ಏರ್ಂದ್ ತೆರಿಯೊಂದು ಆ ಊರು ಬುಡ್ಪಿನೆಟ್ಟ ಅವುಲೇ ಉಪ್ಪುಲೆ.
12
ಆ ಇಲ್ಲದ ಉಲಯಿ ಪೋನಗ ಸಮಾಧಾನ ಆವಡ್ ಪನ್ಲೆ.
13
ಆ ಇಲ್ಲದಾಕುಲು ಯೋಗ್ಯೆರ್ ಆದಿತ್ತ್ಂಡ ನಿಕ್ಲೆನ ಸಮಾಧಾನ ಅಕ್ಲೆಗ್ ಆವಡ್; ಅಯೋಗ್ಯೆರ್ ಆದಿತ್ತ್ಂಡ ನಿಕ್ಲೆ ಸಮಾಧಾನ ನಿಕ್ಲೆಗ್ ಪಿರ ಬರಡ್.
14
ಏರಾಂಡಲಾ ನಿಕ್ಲೆನ್ ಸೇರಾವಂದೆ, ನಿಕ್ಲೆ ಪಾತೆರೊಲೆನ್ ಕೇನಂದೆ ಉಲ್ಲೆರ್ಡ ಆ ಇಲ್ಲಡ್ದಾವಡ್, ಊರುಡ್ದಾವಡ್ ಪಿದಾಡ್ದ್ ನಿಕುಲು ಪೋನಗ ನಿಕ್ಲೆ ಕಾರ್ದ ಧೂಳುನು ಕುಡ್ತ್ದ್ ಪೋಲೆ.
15
ನ್ಯಾಯತೀರ್ಪುದ ದಿನೊಟು ಅಂಚಿತ್ತಿ ಊರುದ ಗತಿ ಸೋದೋಮು ಗೊಮೋರ ಸೀಮೆದ ಗತಿಡ್ದ್ಲಾ ಕಠಿಣ ಆದುಪ್ಪುಂಡು ಅಂದ್ದ್ ನಿಕ್ಲೆಗ್ ನಿಜಾದ್ ಪನ್ಪೆ.
16
“ತೂಲೆ, ಚೆನ್ನನಾಯಿಲೆ ನಡುಟು ಕುರಿಕುಲೆನ್ ಪೊಗ್ಗಾಯಿಲೆಕ್ಕ ಯಾನ್ ನಿಕ್ಲೆನ್ ಕಡಪುಡ್ದು ಕೊರ್ಪೆ. ಅಂಚಾಯಿನೆಡ್ದ್ ಸರ್ಪೊಲೆ ಲೆಕ್ಕ ಬುದ್ಧಿವಂತೆರ್ಲಾ ಪಾರಿವಾಳದ ಲೆಕ್ಕ ಕಪಟದಾಂತಿನಾಕುಲುಲಾ ಆದುಪ್ಪುಲೆ.
17
ಉಂದತ್ತಂದೆ ಜನೊಕುಲೆ ಸಂಗತಿಡ್, ಎಚ್ಚರಿಕೆ ಆದುಪ್ಪುಲೆ, ಅಕುಲು ನಿಕ್ಲೆನ್ ನ್ಯಾಯಸಭೆಕ್ಕ್ ಒಯ್ತೊಂದು ಪೋವೆರ್, ಬೊಕ್ಕ ಸಭಾಮಂದಿರೊಲೆಡ್ ನಿಕ್ಲೆಗ್ ಚಾಟಿಡ್ ಹಾಕೆರ್.
18
ಎನಡ್ದಾವರ ನಿಕ್ಲೆನ್ ಅಧಿಪತಿಲೆ ಬೊಕ್ಕ ಅರಸುಲೆ ಎದುರು ಕೊನೊವೆರ್, ಇಂಚ ಅಕ್ಲೆಗ್ಲಾ ಪಿದಯಿದ ಜನೊಕುಲೆಗ್ಲಾ ಸಾಕ್ಷಿ ಆವರ್.
19
ಆಂಡ ಅಕುಲು ನಿಕ್ಲೆನ್ ಒಚ್ಚಿದ್ ಕೊರ್ನಗ ಎಂಚ ಪಾತೆರೊಡು, ದಾದ ಪನೊಡು ಅಂದ್ದ್ ಚಿಂತೆ ಮಲ್ಪಡೆ; ಪನೊಡಿತ್ತಿ ಪಾತೆರೊಲು ಆ ಗಳಿಗೆಡ್ ನಿಕ್ಲೆಗ್ ದೇವೆರ್ ಕಲ್ಪಾದ್ ಕೊರುವೆ.
20
ಅಪಗ ಪಾತೆರುನಾಕುಲು ನಿಕುಲತ್ತ್, ನಿಕ್ಲೆ ಅಮ್ಮೆರೆನ ಆತ್ಮನೇ ನಿಕ್ಲೆಡ್ ಪಾತೆರುಂಡು.
21
“ಉಂದತ್ತಂದೆ ಪಲಯೆ ಮೆಗ್ಯನ್, ಅಮ್ಮೆ ಮಗನ್ ಮರಣೊಗು ಒಚ್ಚಿದ್ ಕೊರುವೆರ್; ಜೋಕುಲು ಅಪ್ಪೆಅಮ್ಮಾಡ್ಲೆ ಮಿತ್ತ್ ತಿರ್ಗ್ ಬೂರ್ದು ಅಕ್ಲೆನ್ ಕೆರ್ವೆರ್.
22
ಬೊಕ್ಕ ಎನ ಪುದರ್ಗಾದ್ ಮಾತೆರ್ಲಾ ನಿಕ್ಲೆನ್ ಪಗೆ ಮಲ್ಪುವೆರ್. ಆಂಡ ಕಡೆ ಮುಟ್ಟ ತಾಳೊನುನಾಯಗ್ ರಕ್ಷಣೆ ಆವು.
23
ಒಂಜಿ ಊರುಡು ನಿಕ್ಲೆನ್ ಭಂಗ ಕೊರಿಯೆರ್ಡ ಬೊಕ್ಕೊಂಜಿ ಊರುಗು ಪಾರ್ಪೋಲೆ. ನರಮಾನಿ ಮಗೆ ಬರ್ಪಿನೆಟ್ಟ ನಿಕುಲು ಇಸ್ರಾಯೇಲ್ ಜನೊಕುಲೆ ಊರುಲೆ ಪ್ರಯಾಣೊನು ಮಲ್ತ್ದ್ ಮುಗಿತ್ದುಪ್ಪುಜರ್ ಅಂದ್ದ್ ನಿಕ್ಲೆಗ್ ನಿಜಾದ್ ಪನ್ಪೆ.
24
“ಗುರುಡ್ದು ಶಿಷ್ಯೆ ಮಲ್ಲಾಯೆ ಅತ್ತ್, ಧನಿಡ್ದ್ ಚಾಕ್ರಿದಾಯೆ ಮಲ್ಲಾಯೆ ಅತ್ತ್.
25
ಶಿಷ್ಯೆ ಗುರುಲೆಕ್ಕ, ಚಾಕ್ರಿದಾಯೆ ಧನಿಲೆಕ್ಕ ಉಪ್ಪುನವು ಯಾವು. ಅಕುಲು ಇಲ್ಲದ ಯಜಮಾನಗ್ ಬೆಲ್ಜೆಬೂಲ ಅಂದ್ದ್ ಪುದರ್ ದೀಯಿಬೊಕ್ಕ ಆಯನ ಇಲ್ಲದಾಕುಲೆನ್ ಎಂಚಿನ ಪನುವೆರ್?”
26
ಆಂಡಲಾ ಅಕ್ಲೆಗ್ ಪೋಡ್ಯಡೆ. ಮದೆ ಆದುಪ್ಪು ಒವುಲಾ ತೋಜಿದ್ ಬರಂದೆ ಕುಲ್ಲಂದ್. ಪಿದಯಿ ಬರಂದೆ ಉಪ್ಪುನ ಒಂಜಿ ಗುಟ್ಟುಲಾ ಇಜ್ಜಿ.
27
ಯಾನ್ ಕತ್ತಲೆಡ್ ನಿಕ್ಲೆಗ್ ಪನ್ಪಿನೆನ್ ನಿಕುಲು ಬೊಲ್ಪುಡು ಪನ್ಲೆ, ಬೊಕ್ಕ ಕೆಬಿಟ್ ಕೇಂಡಿನೆನ್ ಮಾಳಿಗೆದ ಮಿತ್ತ್ ಉಂತುದು ಸಾರಿಲೆ.
28
ಉಂದತ್ತಂದೆ ಶರೀರೊನು ಕೆರ್ದ್ ಆತ್ಮೊನು ಕೆರಿಯೆರೆ ಆವಂದಿನಾಕುಲೆಗ್ ಪೋಡ್ಯಡೆ, ಆತ್ಮ ಶರೀರ ರಡ್ಡೆನ್ಲಾ ನರಕೊಡು ಪಾಡ್ದ್ ನಾಶ ಮಲ್ಪುನ ದೇವೆರೆಗ್ ಪೋಡಿಲೆ.
29
ದುಡ್ಡುಗು ರಡ್ಡ್ ಗುರ್ಬ್ಬಿಲೆನ್ ಮಾರುನವು ಉಂಡತ್ತಾ? ಆಂಡಲಾ ನಿಕ್ಲೆ ಅಮ್ಮೆರೆ ಚಿತ್ತದಾಂತೆ ಒಂಜಾಂಡಲಾ ನೆಲಕ್ ಬೂರಂದ್.
30
ನಿಕ್ಲೆ ತರೆಕುಜಲ್ ಮಾತಲಾ ಗೆನ್ತ್ದುಂಡು.
31
ಅಂಚಾಯಿನೆಡ್ದ್ ಪೋಡ್ಯಡೆ; ಮಸ್ತ್ ಗುರ್ಬ್ಬಿಲೆಡ್ದ್ಲಾ ನಿಕುಲು ಹೆಚ್ಚ್ದಾಕುಲು.
32
“ಅಂಚಾಂಡ ಏರ್ ಜನೊಕುಲೆ ಎದುರು ತಾನ್ ಯೇಸುನಾಯೆ ಅಂದ್ದ್ ಒಪ್ಪಿಯೊನ್ವೆನಾ, ಯಾನ್ಲಾ ಆಯನ್ ಎನ್ನಾಯೆ ಅಂದ್ದ್ ಪರಲೋಕೊಡುಪ್ಪು ಎನ ಅಮ್ಮೆರೆ ಎದುರು ಒಪ್ಪಿಯೊನ್ವೆ.
33
ಆಂಡ ಏರ್ ಜನೊಕುಲೆ ಎದುರು ತಾನ್ ಯೇಸುನಾಯೆ ಅತ್ತ್ ಅಂದ್ದ್ ಪನ್ಪೆನಾ ಆಯನ್ ಯಾನ್ಲಾ ಪರಲೋಕೊಡುಪ್ಪು ಎನ ಅಮ್ಮೆರೆ ಎದುರು ಎನ್ನಾಯೆ ಅತ್ತ್ ಅಂದ್ದ್ ಪನ್ಪೆ.
34
“ಭೂಲೋಕೊಡು ಸಮಾಧಾನ ಉಂಡು ಮಲ್ಪೆರೆ ಬೈದೆ ಅಂದ್ದ್ ಎನ್ನಡೆ. ಸಮಾಧಾನೊನು ಪುಟ್ಟಾವೆರೆ ಯಾನ್ ಬೈದಿಜಿ, ಕತ್ತಿನ್ ಪಾಡಿಯೆರೆ ಬೈದೆ.
35
ಎಂಚಂದ್ಂಡ ಮಗಕ್ಲಾ ಅಮ್ಮೆರೆಗ್ಲಾ, ಮಗಲೆಗ್ಲಾ ಅಪ್ಪೆಗ್ಲಾ, ಮರ್ಮಲೆಗ್ಲಾ ಮಾಮಿಗ್ಲಾ, ಭೇದ ಪುಟ್ಟಾಯೆರೆ ಬೈದೆ.
36
ಇಂಚ ಒರಿ ನರಮಾನಿಗ್ ಆಯ ಇಲ್ಲದಾಕುಲೆ ಪಗೆನಾಕುಲು ಆಪೆರ್.
37
“ಅಪ್ಪೆನಾವಡ್, ಅಮ್ಮೆರೆನಾವಡ್ ಎನಡ್ದ್ ಹೆಚ್ಚಾದ್ ಪ್ರೀತಿ ಮಲ್ಪುನಾಯೆ ಎಂಕ್ ಯೋಗ್ಯದಾಯೆ ಅತ್ತ್. ಮಗನಾವಡ್ ಮಗಲೆನಾವಡ್ ಎನಡ್ದ್ ಹೆಚ್ಚಾದ್ ಪ್ರೀತಿ ಮಲ್ಪುನಾಯೆ ಎಂಕ್ ಯೋಗ್ಯದಾಯೆ ಅತ್ತ್.
38
ಬೊಕ್ಕ ಏರಾಂಡಲಾ ತನ ಕ್ರುಸ್ಸುನು ಪತ್ತೊಂದು ಎನ ಬೆರಿಯೆ ಬರಂದಿನಾಯೆ ಆಯೆ ಎನ ಶಿಷ್ಯೆ ಆವೆರೆ ಯೋಗ್ಯದಾಯೆ ಅತ್ತ್.
39
ತನ ಪ್ರಾಣೊನು ಕಾತೊನುನಾಯೆ ಅವೆನ್ ಕಳೆವೊನ್ವೆ; ಆಂಡ ಎಂಕಾದ್ ತನ ಪ್ರಾಣೊನು ಕಳೆವೊಂಡಿನಾಯೆ ಅವೆನ್ ಕಾತೊನ್ವೆ.
40
“ನಿಕ್ಲೆನ್ ಸೇರಾವೊನುನಾಯೆ ಎನನ್ ಸೇರಾವೊನುನಾಯೆ ಆದುಲ್ಲೆ; ಎನನ್ ಸೇರಾವೊನುನಾಯೆ ಎನನ್ ಕಡಪುಡ್ದು ಕೊರಿನಾಯನೇ ಸೇರಾವೊನುನಾಯೆ ಆದುಲ್ಲೆ.
41
ಪ್ರವಾದಿನ್ ಪ್ರವಾದಿ ಅಂದ್ದ್ ಸೇರಾವೊನುನಾಯೆ ಪ್ರವಾದಿಗ್ ಬರೊಡಾಯಿ ಪ್ರತಿಫಲೊನು ಪಡೆಪೆ; ನೀತಿವಂತೆರೆನ್ ನೀತಿವಂತೆ ಅಂದ್ದ್ ಸೇರಾವೊನುನಾಯೆ ನೀತಿವಂತಗ್ ಬರೊಡಾಯಿ ಪ್ರತಿಫಲೊನು ಪಡೆಪೆ.
42
ಆಂಡ ಈ ಎಲ್ಯಾಕುಲೆಡ್ ಒರಿಯಗ್ ಯೇಸುನ ಶಿಷ್ಯೆ ಪಂಡ್ದ್ ಏರಾಂಡಲಾ ಒಂಜಿ ಚೊಂಬು ಚೌಲಿ ನೀರಾಂಡಲಾ ಪರಿಯೆರೆ ಕೊರಿಯೆಡ ಬರೊಡಾಯಿ ಪ್ರತಿಫಲ ಆಯಗ್ ತಪ್ಪುನೇ ಇಜ್ಜಿ ಅಂದ್ದ್ ನಿಕ್ಲೆಗ್ ನಿಜಾದ್ ಪನ್ಪೆ,” ಅಂದ್ದ್ ಪಂಡೆ.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28