Matthew 26

Tulu (ಪೊಸ ಒಡಂಬಡಿಕೆ)

1ಯೇಸು ಈ ಪಾತೆರೊಲೆನ್ ಮಾತ ಪಂಡ್ದ್ ಮುಗಿತಿ ಬೊಕ್ಕ ತನ ಶಿಷ್ಯೆರೆಡ,

2“ರಡ್ಡ್ ದಿನೊಡ್ದು ಬೊಕ್ಕ ಪಸ್ಕ ಪರ್ಬ ಬರ್ಪುಂಡು ಅಂದ್‌ದ್ ನಿಕ್ಲೆಗ್ ಗೊತ್ತುಂಡು. ಅಪಗ ನರಮಾನಿ ಮಗನ್ ಕ್ರುಸ್ಸುಗು ಪತ್ತಾವೆರೆ ಒಚ್ಚಿದ್ ಕೊರುವೆರ್,” ಅಂದ್‌ದ್ ಪಂಡೆ.

3ಆ ಸಮಯೊಡು ಪ್ರಧಾನಯಾಜಕೆರ್‌ಲಾ, ಪ್ರಜೆತ ಹಿರಿಯೆರ್‌ಲಾ ಕಾಯಫೆ ಪನ್ಪಿ ಪ್ರಧಾನಯಾಜಕನ ಮಠೊಕು ಸೇರ್ದ್ ಬತ್ತ್‌ದ್,

4ಯೇಸುನು ಉಪಾಯೊಡು ಪತ್ತ್‌ದ್ ಕೆರೊಡು ಅಂದ್‌ದ್ ಆಲೋಚನೆ ಮಲ್ತೊಂಡೆರ್.

5“ಆಂಡಲಾ ಪರ್ಬದಪಗ ಪತ್ತುನ ಬೊಡ್ಚಿ, ನಮ ಜನೊಕುಲೆಡ್ ಗಲಾಟೆ ಆವು,” ಅಂದ್‌ದ್ ಪಾತೆರೊಂಡೆರ್.

6ಯೇಸು ಬೇಥಾನ್ಯೊಡು ಕೊಷ್ಟದಾಯೆ ಆದುಪ್ಪು ಸೀಮೋನನ ಇಲ್ಲಡ್ ಇತ್ತಿನಪಗ ಒರ್ತಿ ಪೊಂಜೊವು

7ಮಸ್ತ್ ಬಿಲೆತ ಕಮ್ಮೆನದ ಎಣ್ಣೆದ ಕುಪ್ಪಿನ್ ದೆತ್ತೊಂದು ಬತ್ತ್‌ದ್ ಆಯೆ ವಣಸ್‌ಗ್ ಕುಲ್ಲೊಂದಿತ್ತಿನಪಗ ಆ ಎಣ್ಣೆನ್ ಯೇಸುನ ತರೆತ ಮಿತ್ತ್ ಮೈತಲ್.

8ಶಿಷ್ಯೆರ್ ಉಂದೆನ್ ತೂದು ಕೋಪೊಡು, “ಈ ನಷ್ಟ ದಾಯೆಗ್?

9ಈ ಎಣ್ಣೆನ್ ಮಸ್ತ್ ದುಡ್ಡುಗು ಮಾರ್ದ್ ಬಡವೆರೆಗ್ ಕೊರ್ತೊಲಿ ಅತ್ತಾ?” ಪಂಡೆರ್.

10ಯೇಸು ಉಂದೆನ್ ತೆರಿದ್ ಅಕ್ಲೆಡ, “ಈ ಪೊಂಜೊವುಗು ದಾಯೆಗ್ ತೊಂದರೆ ಕೊರೊಂದುಲ್ಲರ್? ಮೋಲು ಎಂಕ್ ಎಡ್ಡೆ ಬೇಲೆ ಮಲ್ತಲ್.

11ಬಡವೆರ್ ಏಪಲಾ ನಿಕ್ಲೆಡೊಪ್ಪ ಉಪ್ಪುವೆರ್, ಆಂಡ ಯಾನ್ ಏಪಲಾ ನಿಕ್ಲೆಡೊಪ್ಪ ಉಪ್ಪುಜಿ.

12ಮೋಲು ಈ ಎಣ್ಣೆನ್ ಎನ ಮೆಯಿಕ್ ಮೈತಿನವು ಎನ ಮರಣಡ್ದುಂಬು ಆಪಿ ಕ್ರಿಯೊಲೆಗ್ ಬೋಡಾದ್ ಮಲ್ತಲ್.

13ಈ ಸುವಾರ್ತೆನ್ ಇಡೀ ಲೋಕೊಡು ಓಲೋಲು ಸಾರಿಯುಂಡಾ ಅಲ್ಪಲ್ಪ ಮೋಲು ಮಲ್ತಿನೆನ್ ಆಲೆನ ನೆನೆಪುಗಾದ್ ಪನ್ವೆರ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,” ಅಂದ್‌ದ್ ಪಂಡೆ.

14ಐಡ್ದ್ ಬೊಕ್ಕ ಪದ್ರಾಡ್ ಶಿಷ್ಯೆರೆಡ್ ಒರಿ ಇಸ್ಕಾರಿಯೋತ ಯೂದೆ ಪನ್ಪಿನಾಯೆ ಪ್ರಧಾನಯಾಜಕೆರೆ ಕೈತಲ್‌ ಪೋದು,

15“ಯಾನ್ ಯೇಸುನು ನಿಕ್ಲೆಗ್ ಪತ್ತ್‌ದ್ ಕೊರಿಯೆಡ ಎಂಕ್ ದಾದ ಕೊರ್ಪರ್?” ಅಂದ್‌ದ್ ಕೇಂಡೆ. ಐಕ್ ಅಕುಲು ಆಯಗ್ ಮುಪ್ಪ ಬೊಳ್ಳಿದ ನಾಣ್ಯೊನು ಗೆನ್ತ್‌ದ್ ಕೊರಿಯೆರ್.

16ಆನಿಡ್ದಿಂಚಿ ಆಯೆ ಯೇಸುನು ಪತ್ತ್‌ದ್ ಕೊರಿಯೆರೆ ಸಮಯೊನು ತೂವೊಂದಿತ್ತೆ.

17ಪುಳಿದಾಂತಿ ರೊಟ್ಟಿದ ಪರ್ಬದ ಸುರುತ್ತ ದಿನತಾನಿ ಶಿಷ್ಯೆರ್ ಯೇಸು ಕೈತಲ್‌ ಬತ್ತ್‌ದ್, “ಪಸ್ಕದ ವಣಸ್ ಮಲ್ಪೆರೆ ಎಂಕುಲು ನಿಕ್ಕ್ ಓಲು ತಯಾರ್ ಮಲ್ಪೊಡು ಅಂದ್‌ದ್ ಕೇನ್ನಗ”

18ಆಯೆ, “ನಿಕುಲು ಪೇಂಟೆದ ಉಲಯಿ ಇಂಚಿತ್ತಿನಾಯನ ಕೈತಲ್‌ ಪೋದು ಆಯಡ, ‘ಎನ ಕಾಲ ಕೈತಲಾಂಡ್. ನಿನ ಇಲ್ಲಡ್ ಎನ ಶಿಷ್ಯೆರೆಡೊಪ್ಪ ಪಸ್ಕ ಪರ್ಬ ಮಲ್ಪುವೆ ಅಂದ್‌ದ್ ಬೋಧಕೆ ಪನ್ಪೆ ಅಂದ್‌ದ್ ಪನ್ಲೆ.’”

19ಯೇಸು ಅಕ್ಲೆಗ್ ಅಪ್ಪಣೆ ಕೊರಿಲೆಕ್ಕನೆ ಶಿಷ್ಯೆರ್ ಪಸ್ಕದ ವಣಸ್‌ನ್ ತಯಾರ್ ಮಲ್ತೆರ್.

20ಬೈಯಗ್‌ ಆಯೆ ಪದ್ರಾಡ್ ಶಿಷ್ಯೆರೆಡೊಪ್ಪ ವಣಸ್‌ಗ್ ಕುಲ್ಲಿಯೆ.

21ಅಕುಲು ವಣಸ್ ಮಲ್ತೊಂದುಪ್ಪುನಗ ಆಯೆ, “ನಿಕ್ಲೆಗ್ ನಿಜಾದ್ ಪನ್ಪೆ, ನಿಕ್ಲೆಡ್ ಒರಿ ಎನನ್ ಪತ್ತ್‌ದ್ ಕೊರುವೆ,” ಅಂದ್‌ದ್ ಪಂಡೆ.

22ಅಪಗ ಅಕುಲು ಬಾರೀ ದುಃಖೊಡು, “ಕರ್ತವಾ, ಯಾನತ್ತತ್ತಾ?” ಅಂದ್‌ದ್ ಪ್ರತಿ ಒರಿಲಾ ಕೇನಿಯೆರೆ ಸುರು ಮಲ್ತೆರ್.

23ಐಕ್ ಆಯೆ, “ಬಟ್ಟಲ್ಡ್ ಎನಡೊಪ್ಪ ಕೈ ಪಾಡುನಾಯೆನೇ ಎನನ್ ಪತ್ತ್‌ದ್ ಕೊರ್ಪೆ.

24ನರಮಾನಿ ಮಗೆ ಪಿದಾಡ್ದ್ ಪೋಪೆ ಸರಿ, ಅಂಚ ಆಯನ ಸಂಗತಿಡ್ ಬರೆತ್ಂಡತ್ತಾ. ಆಂಡ ಏರ್ ನರಮಾನಿ ಮಗನ್ ಪತ್ತ್‌ದ್ ಕೊರ್ಪೆನಾ ಆಯನ ಗತಿನ್ ದಾನೆಂದ್ ಪನೊಲಿ, ಆ ನರಮಾನಿ ಪುಟ್ಟಂದೆ ಇತ್ತ್‌ದ್ಂಡ ಆಯಗ್ ಎಡ್ಡೆ ಇತ್ತ್ಂಡ್.”

25ಅಪಗ ಆಯನ್ ಪತ್ತ್‌ದ್ ಕೊರಿಯೆರೆ ಇತ್ತಿನ ಯೂದೆ, “ಗುರೂ, ಯಾನಾ?” ಪಂಡಿನೆಕ್ಕ್ ಯೇಸು ಆಯಗ್, “ಈಯೇ ಪಂಡ,” ಅಂದ್‌ದ್ ಪಂಡೆ.

26ಅಕುಲು ವಣಸ್ ಮಲ್ತೊಂದುಪ್ಪುನಗ ಯೇಸು ರೊಟ್ಟಿನ್ ದೆತ್ತೊಂದು, ದೇವೆರೆನ್ ಸುಗಿತ್‌ದ್, ಪೊಲ್ತುದು ಶಿಷ್ಯೆರೆಗ್ ಕೊರ್ದು, “ದೆತ್ತೊನ್ಲೆ, ತಿನ್ಲೆ, ಉಂದು ಎನ ಶರೀರ,” ಅಂದ್‌ದ್ ಪಂಡೆ.

27ಐಡ್ದ್ ಬೊಕ್ಕ ಪಾತ್ರೆನ್ ದೆತ್ತೊಂದು, ಸುಗಿತ್‌ದ್ ಅಕ್ಲೆಗ್ ಕೊರ್ದು, “ಉಂದೆಟ್ಟ್ ಇತ್ತಿನೆನ್ ಮಾತೆರ್ಲಾ ಪರ್ಲೆ,

28ಉಂದು ಎನ ನೆತ್ತೆರ್, ಮಸ್ತ್ ಜನೊಕುಲೆ ಪಾಪೊಲೆ ಪರಿಹಾರೊಗಾದ್ ಗುತ್ತುದಿನ ಒಡಂಬಡಿಕೆದ ನೆತ್ತೆರ್.

29ಯಾನ್ ಎನ ಅಮ್ಮೆರೆ ರಾಜ್ಯೊಡು ನಿಕ್ಲೆಡೊಪ್ಪ ಪೊಸತ್ತಾದ್ ಪರ್ಪಿನ ಆ ದಿನ ಮುಟ್ಟ ದ್ರಾಕ್ಷಾರಸೊನು ನನ ಪರ್ಪಿನೇ ಇಜ್ಜಿ, ಅಂದ್‌ದ್ ನಿಕ್ಲೆಗ್ ಪನ್ಪೆ”

30ಬೊಕ್ಕ ಅಕುಲು ಕೀರ್ತನೆ ರಾಗ ಮಲ್ತ್‌ದ್ ಇಪ್ಪೆಗುಡ್ಡೆಗ್ ಪಿದಾಡ್ದ್ ಪೋಯೆರ್.

31ಅಪಗ ಯೇಸು ಅಕ್ಲೆಡ, ನಿಕುಲು ಮಾತೆರ್ಲಾ ಈ ರಾತ್ರೆಡ್ ಎನ ಸಂಗತಿಡ್ ಪೋಡಿದ್ ಪಿರ ಜಾರುವರ್. ದಾಯೆಗಂದ್ಂಡ, “ಯಾನ್, ‘ಕುರುಬಗ್ ಹಾಕುವೆ, ಪುಂಡುದ ಕುರಿಕುಲು ಚಲ್ಲಾಪಿಲ್ಲಿ ಆವು,’ ಅಂದ್‌ದ್ ಬರೆತ್ಂಡತ್ತಾ.

32ಆಂಡ ಯಾನ್ ಜೀವಾದ್ ಲಕ್ಕಿ ಬೊಕ್ಕ ನಿಕ್ಲೆ ದುಂಬು ಗಲಿಲಾಯೊಗು ಪೋವೆ,” ಅಂದ್‌ದ್ ಪಂಡೆ.

33ಆಂಡ ಪೇತ್ರೆ ಆಯಡ, “ಮಾತೆರ್ಲಾ ನಿನ ಬಗೆಟ್ ಪೋಡಿದ್ ಪಿರಜಾರಿಯೆರ್ಡಲಾ ಯಾನ್ ಏಪೊಗ್ಲಾ ಪಿರಜಾರಯೆ,” ಅಂದ್‌ದ್ ಉತ್ತರ ಕೊರಿಯೆ.

34ಯೇಸು, “ನಿಕ್ಕ್ ನಿಜಾದ್ ಪನ್ಪೆ. ಉಂದೇ ರಾತ್ರೆ ಕೋರಿ ಕಿಲೆಪುನೆಕ್ಕ್ ದುಂಬು ಈ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಮೂಜಿ ಸರ್ತಿ ಪನ್ಪ,” ಪಂಡೆ.

35ಪೇತ್ರೆ ಆಯಡ, “ಯಾನ್ ನಿನಡೊಪ್ಪ ಸೈಯೊಡಾಂಡಲಾ ನಿನನ್ ತೆರಿಯಯೆ ಅಂದ್‌ದ್ ಪನಯೆ,” ಅಂಚೆನೇ ಮಾತ ಶಿಷ್ಯೆರ್‌ಲಾ ಪಂಡೆರ್.

36ಯೇಸು ತನ ಶಿಷ್ಯೆರೆಡೊಪ್ಪ ಗೆಥ್ಸೇಮನೆ ಪನ್ಪಿ ತೋಟೊಗು ಬತ್ತ್‌ದ್ ಅಕ್ಲೆಡ, “ಯಾನ್ ಪೋದು ಪ್ರಾರ್ಥನೆ ಮಲ್ಪುವೆ, ನಿಕುಲು ಮುಲ್ಪನೆ ಕುಲ್ಲುಲೆ.” ಅಂದ್‌ದ್ ಪಂಡೆ.

37ಪೇತ್ರನ್ಲಾ ಜೆಬೆದಾಯನ ಇರ್ವೆರ್ ಜೋಕುಲೆನ್ಲಾ ಲೆತ್ತೊಂದು ಪೋದು ದುಃಖ ಮಲ್ಪೆರೆಲಾ ವ್ಯಥೆ ಬುಡಿಯೆರೆಲಾ ಸುರು ಮಲ್ತೆ.

38ಬೊಕ್ಕ ಅಕ್ಲೆಡ, “ಎನ ಪ್ರಾಣ ಸೈತ್ ಪೋಪಿನಾತ್ ದುಃಖೊಡು ದಿಂಜಿದ್‌ಂಡ್; ನಿಕುಲು ಮೂಲೇ ಇತ್ತ್‌ದ್ ಎನಡೊಪ್ಪ ಎಚ್ಚರಿಕೆ ಆದುಪ್ಪುಲೆ,” ಅಂದ್‌ದ್ ಪಂಡೆ.

39ಒಂತೆ ದುಂಬು ಪೋದು ಅಡ್ಡಬೂರ್ದು, “ಎನ ಅಮ್ಮೆರೇ, ಸಾದ್ಯ ಇತ್ತ್ಂಡ ಈ ಕಷ್ಟ ಅನುಭವಿಪುನ ದುನ್ನ ಎನನ್ ಬುಡ್ದು ಪೋವಡ್; ಎಂಚಲಾ ಎನ ಚಿತ್ತದ ಲೆಕ್ಕ ಅತ್ತ್ ನಿನ ಚಿತ್ತದಲೆಕ್ಕನೇ ಆವಡ್ ಅಂದ್‌ದ್ ದೇವೆರೆಡ ಪ್ರಾರ್ಥನೆ ಮಲ್ತೆ.”

40ಐಡ್ದ್ ಬೊಕ್ಕ ಶಿಷ್ಯೆರೆ ಕೈತಲ್‌ ಬತ್ತ್‌ದ್ ಅಕುಲು ನಿದ್ರೆ ಮಲ್ಪುನೆನ್ ತೂದು ಪೇತ್ರಗ್, “ಇಂಚನ, ಒಂಜಿ ಗಳಿಗೆ ಆಂಡಲಾ ಎನಡೊಪ್ಪ ಎಚ್ಚರಿಕೆ ಆದುಪ್ಪಯರಾ?

41ನಿಕುಲು ಶೋಧನೆಗ್ ಬೂರಂದಿಲೆಕ್ಕ ಎಚ್ಚರಿಕೆ ಆದಿತ್ತ್‌ದ್ ಪ್ರಾರ್ಥನೆ ಮಲ್ಪುಲೆ. ಆತ್ಮ ತಯಾರುಂಡು ಸರಿ, ಆಂಡ ಶರೀರ ಬಲದಾಂತಿನವು,” ಅಂದ್‌ದ್ ಪಂಡೆ.

42ಕುಡ ರಡ್ಡನೆ ಸರ್ತಿ ಪೋದು, “ಎನ ಅಮ್ಮೆರೆ, ಯಾನ್ ಪರಂದೆ ಈ ಕಷ್ಟ ಅನುಭವಿಪುನ ದುನ್ನ ಎನಡ್ದ್ ಬುಡ್ದು ಪೋಯೆರೆ ಬಲ್ಲಿಂದ್ ಇತ್ತ್ಂಡ ನಿನ ಚಿತ್ತದಲೆಕ್ಕನೇ ಆವಡ್ ಅಂದ್‌ದ್,” ಪ್ರಾರ್ಥನೆ ಮಲ್ತೆ.

43ಆಯೆ ಕುಡ ಬತ್ತಿನಪಗ ಅಕುಲು ನಿದ್ರೆ ಮಲ್ಪುನೆನ್ ತೂಯೆ, ಅಕ್ಲೆನ ಕಣ್ಣ್‌ಲು ದುನ್ನ ಆದಿತ್ತ್ಂಡ್.

44ಐಡ್ದ್ ಬೊಕ್ಕ ಅಕ್ಲೆನ್ ಬುಡ್ದು ಪೋದು ಕುಡ ಅವ್ವೇ ಪಾತೆರೊನು ಪಂಡ್ದ್ ಮೂಜನೇ ಸರ್ತಿ ಪ್ರಾರ್ಥನೆ ಮಲ್ತೆ.

45ಐಡ್ದ್ ಬೊಕ್ಕ ಶಿಷ್ಯೆರೆ ಕೈತಲ್‌ ಬತ್ತ್‌ದ್ ಅಕ್ಲೆಡ, “ನಿಕುಲು ನನಲಾ ನಿದ್ರೆ ಮಲ್ತೊಂದು ಬಚ್ಚೆಲ್ ದೆತ್ತೊಂದುಲ್ಲರಾ? ಇಂದಾ, ಗಳಿಗೆ ಕೈತಲ್ ಬತ್ತ್ಂಡ್, ಇತ್ತೆ ನರಮಾನಿ ಮಗನ್ ಪಾಪಿಷ್ಟೆರೆ ಕೈಕ್ ಒಚ್ಚಿದ್ ಕೊರುವೆರ್.

46ಲಕ್ಕ್‌ಲೆ, ನಮ ಪೋಯಿ. ಎನನ್ ಪತ್ತ್‌ದ್ ಕೊರ್ಪಿನಾಯೆ ಕೈತಲ್ ಬೈದೆ ತೂಲೆ,” ಅಂದ್‌ದ್ ಪಂಡೆ.

47ಆಯೆ ನನಲಾ ಪಾತೆರೊಂದುಪ್ಪುನಗನೇ, ಪದ್ರಾಡ್ ಶಿಷ್ಯೆರೆಡ್ ಒರಿ ಯೂದೆ ಬತ್ತೆ. ಆಯಡೊಪ್ಪ ಪ್ರಧಾನಯಾಜಕೆರೆ, ಶಾಸ್ತ್ರಿಲೆ, ಪ್ರಜೆತ ಹಿರಿಯೆರೆ ಮೊಕ್ಲೆ ಕಡೆಡ್ದ್ ಒಂಜಿ ಮಲ್ಲ ಜನೊಕುಲೆ ಗುಂಪು ಕತ್ತಿ ಸೋಂಟೆಲೆನ್ ಪತ್ತೊಂದು ಬತ್ತೆರ್.

48ಉಂದತ್ತಂದೆ ಆಯನ್ ಪತ್ತ್ ಕೊರ್ಪಿನಾಯೆ ಅಕ್ಲೆಡ, “ಯಾನ್ ಏರೆಗ್ ಮುತ್ತು ಕೊರ್ಪೆನಾ ಆಯೆನೇ ಆಯೆ, ಆಯನ್ ಪತ್ತ್‌ಲೆ,” ಅಂದ್‌ದ್ ಗುರ್ತ ಪಂಡ್ದ್ ಕೊರಿಯೆ.

49ಅಪಗನೆ ಆಯೆ ಯೇಸುನ ಕೈತಲ್‌ ಪೋದು, “ಗುರೂ, ವಂದನೆ,” ಪಂಡ್ದ್ ಆಯಗ್ ಮುತ್ತು ಕೊರಿಯೆ.

50ಯೇಸು ಆಯಡ, “ಸ್ನೇಹಿತಾ, ಈ ಮಲ್ಪೆರೆ ಬೈದಿನ ಬೇಲೆ ಉಂದೆನಾ?” ಅಂದ್‌ದ್ ಪಂಡಿನಪಗ ಅಕುಲು ಕೈತಲ್‌ ಬತ್ತ್‌ದ್ ಯೇಸುನ ಮಿತ್ತ್ ಕೈ ಪಾಡ್ದ್ ಆಯನ್ ಪತ್ತಿಯೆರ್.

51ಪತ್ತಿಲೆಕ್ಕನೇ ಯೇಸುಡೊಪ್ಪ ಇತ್ತಿನಾಕುಲೆಡ್ ಒರಿ ಕೈ ದುಂಬು ಮಲ್ತ್‌ದ್ ತನ ಕತ್ತಿನ್ ದೆತ್ತ್‌ದ್ ಪ್ರಧಾನಯಾಜಕನ ಬೇಲೆದಾಯಗ್ ಹಾಕ್‌ದ್ ಆಯನ ಬಲತ್ತ ಕೆಬಿನ್ ಕಡ್ತ್‌ದ್ ಬುಡಿಯೆ.

52ಅಪಗ ಯೇಸು ಆಯಗ್, “ನಿನ ಕತ್ತಿನ್ ಪಿರ ಐತ ಜಾಗ್‌ಡ್ ದೀಲ. ಕತ್ತಿ ಪತ್ತಿನಾಕುಲು ಕತ್ತಿಡ್ದೇ ಸೈಪೆರ್.

53ಯಾನ್ ಎನ ಅಮ್ಮೆರೆಡ ನಟ್ಟೊಂಡ ಎಂಕ್ ಇತ್ತೆನೇ ಪದ್ರಾಡ್ ದಂಡ್‌ಲೆಡ್ದ್ ಹೆಚ್ಚ್ ದೂತೆರೆ ಸೈನೊನು ಕಡಪುಡ್ದು ಕೊರಿಯೆರೆ ಸಾದ್ಯ ಇಜ್ಜಿ ಅಂದ್‌ದ್ ಎನ್ನುವನಾ?

54ಕಡಪುಡ್ದು ಕೊರಿಯೆಡ ಎಂಕ್ ಇಂಚಿಂಚಿನವು ಆವೊಡು ಪನ್ಪಿನ ಶಾಸ್ತ್ರದ ಪಾತೆರೊಲು ನಡಪುನು ಎಂಚಾ,” ಅಂದ್‌ದ್ ಪಂಡೆ.

55ಅವ್ವೇ ಗಳಿಗೆಡ್ ಯೇಸು ಗುಂಪುಗುಂಪಾದ್ ಸೇರ್ದಿತ್ತಿ ಜನೊಕುಲೆಗ್, “ಒರಿ ಕಲ್ವನ್ ಪತ್ತಿಯೆರೆ ಬತ್ತಿಲೆಕ್ಕ ಕತ್ತಿನ್ಲಾ, ಸೋಂಟೆನ್ಲಾ ಪತ್ತೊಂದು ಎನನ್ ಪತ್ತಿಯೆರೆ ಬತ್ತರಾ? ಯಾನ್ ದಿನಾಲ ದೇವಾಲಯೊಡು ಕುಲ್ಲೊಂದು ಬೋಧನೆ ಮಲ್ತೊಂದುಪ್ಪುನಗ ನಿಕುಲು ಎನನ್ ಪತ್ತ್‌ಜರ್.

56ಆಂಡ ಉಂದು ಪ್ರವಾದಿಲು ಶಾಸ್ತ್ರೊಡು ಬರೆತಿನವು ಪೂರ್ತಿ ಆಪಿಲೆಕ್ಕ ನಡತ್ಂಡ್,” ಅಂದ್‌ದ್ ಪಂಡೆ. ಅಪಗ ಶಿಷ್ಯೆರ್ ಮಾತೆರ್ಲಾ ಆಯನ್ ಬುಡ್ದು ಪಾರ್‌ಪೋಯೆರ್.

57ಬೊಕ್ಕ ಯೇಸುನು ಪತ್ತಿನಾಕುಲು ಪ್ರಧಾನಯಾಜಕೆ ಆಯಿ ಕಾಯಫ ಕೈತಲ್‌ ಲೆತ್ತೊಂದು ಪೋಯೆರ್. ಅಲ್ಪ ಶಾಸ್ತ್ರಿಲುಲಾ, ಹಿರಿಯೆರ್‌ಲಾ ಕೂಡ್ದು ಬತ್ತ್‌ತ್ತೆರ್.

58ಪೇತ್ರೆಲಾ ದೂರೊಡ್ದು ಆಯನ ಬೆರಿಯೆ ಪೋವೊಂದು ಪ್ರಧಾನಯಾಜಕನ ಮಠತ ಜಾಲ್ ಮುಟ್ಟ ಬತ್ತ್‌ದ್ ಉಲಯಿ ಪೋದು ಆಯನ ಗತಿ ದಾನೆ ಆಪುಂಡು ತೂವೊಡು ಅಂದ್‌ದ್ ಪಾರದಾಕುಲೆಡೊಪ್ಪ ಕುಲ್ಲಿಯೆ.

59ಅಪಗ ಪ್ರಧಾನಯಾಜಕೆರ್‌ಲಾ ಹಿರಿಸಭೆತಾಕುಲುಲಾ ಯೇಸುನು ಕೆರ್ಪಾವೊಡು ಅಂದ್‌ದ್ ಆಯ ಮಿತ್ತ್ ಸುಳ್ಳು ಸಾಕ್ಷಿನ್ ನಾಡಿಯೆರ್;

60ಆಂಡ ಮಸ್ತ್ ಜನ ಸುಳ್ಳು ಸಾಕ್ಷಿ ಕೊರಿಯೆರ್ಡಲಾ, ಆಯಡ ದಾಲಾ ತಪ್ಪು ತಿಕ್ಕಿಜಿ. ಕಡೆಕ್ಕ್ ಇರ್ವೆರ್ ದುಂಬು ಬತ್ತ್‌ದ್,

61“ಈ ನರಮಾನಿ ಪನೊಂದಿತ್ತೆ, ‘ಯಾನ್ ದೇವೆರೆ ಆಲಯೊನು ದರ್ತ್‌ದ್ ಮೂಜಿ ದಿನತ ಉಲಯಿ ಕಟ್ಟುವೆ ಅಂದ್‌ದ್ ಇಂಬೆ ಪನ್ತೆ,’” ಪಂಡ್ದ್ ಪನ್ನಗ,

62ಪ್ರಧಾನಯಾಜಕೆ ಲಕ್ಕ್‌ದ್ ಉಂತುದು, “ಈ ದಾಲಾ ಉತ್ತರ ಕೊರ್ಪುಜನಾ? ಮೊಕುಲು ನಿನ ಮಿತ್ತ್ ಪನ್ಪಿನ ಈ ಸಾಕ್ಷಿ ಎಂಚಿನವು ಅಂದ್‌ದ್,” ಆಯನ್ ಕೇನ್ನಗ ಯೇಸು ಮನಿಪಂದೆ ಇತ್ತೆ.

63ಅಪಗ ಪ್ರಧಾನಯಾಜಕೆ, “ನಿಕ್ಕ್ ಜೀವ ಇತ್ತಿ ದೇವೆರೆನ ಆಜ ದೀಪೆ. ಈ ದೇವೆರೆ ಮಗೆ ಆದುಪ್ಪು ಕ್ರಿಸ್ತೆ ಅಂದಾ, ಅತ್ತಾ? ಅಂದ್‌ದ್ ಎಂಕ್ಲೆಗ್ ಈ ಪನೊಡು,” ಪಂಡ್ದ್ ಪನ್ನಗ

64ಯೇಸು ಆಯಗ್, “ಈಯೇ ಪಂಡ! ಉಂದತ್ತಂದೆ ನನ ಮಿತ್ತ್ ನರಮಾನಿ ಮಗೆ ಸರ್ವಶಕ್ತನ ಬಲತ್ತ ಮರ್ಗಿಲ್‌ಡ್ ಕುಲ್ಲುದುಪ್ಪುನೆನ್ಲಾ, ಬಾನದ ಮುಗಲ್‌ದ ಮಿತ್ತ್ ಕುಲ್ಲೊಂದು ಬರ್ಪಿನೆನ್ಲಾ ತೂವರ್, ಅಂದ್‌ದ್ ನಿಕ್ಲೆಗ್ ಪನ್ಪೆ,” ಅಂದ್‌ದ್ ಪಂಡೆ.

65ಅಪಗ ಪ್ರಧಾನಯಾಜಕೆ ತನ ಅಂಗಿನ್ ಪರ್ತೊಂದು, “ಉಂದು ದೂಷಣೆದ ಪಾತೆರ, ನಂಕ್ ಸಾಕ್ಷಿಲು ನನ ದಾಯೆಗ್ ಬೋಡು? ಆಯೆ ಇತ್ತೆ ಪಂಡಿನ ದೂಷಣೆದ ಪಾತೆರೊನು ಕೇಂಡರತ್ತಾ?

66ನಿಕ್ಲೆಗ್ ಎಂಚ ತೋಜುಂಡು?” ಪನ್ನಗ, “ಉಂಬೆ ಮರಣ ದಂಡನೆಗ್ ತಕ್ಕದಾಯೆ,” ಅಂದ್‌ದ್ ಉತ್ತರ ಕೊರಿಯೆರ್.

67ಅಪಗ ಆಯನ ಮೋನೆದ ಮಿತ್ತ್ ಉಬ್ಬಿದ್ ಆಯನ್ ಗುದ್ದಿಯೆರ್. ಕೆಲೆವೆರ್ ಆಯನ ಕೆಪ್ಪೆಗ್ ಹಾಕ್‌ದ್

68“ಕ್ರಿಸ್ತ, ನಿಕ್ಕ್ ಹಾಕಿನಾಯೆ ಏರ್? ಎಂಕ್ಲೆಗ್ ಪ್ರವಾದನೆ ಪನ್ಲ,” ಪಂಡೆರ್.

69ಇಂಚಿಡ್ದ್ ಪೇತ್ರೆ ಪಿದಯಿ ಜಾಲ್‌ಡ್ ಕುಲ್ದಿತ್ತೆ. ಅಲ್ಪ ಒರ್ತಿ ಚಾಕ್ರಿದಾಲ್ ಆಯ ಕೈತಲ್‌ ಬತ್ತ್‌ದ್, “ಈಲಾ ಗಲಿಲಾಯದ ಯೇಸುಡೊಪ್ಪ ಇತ್ತಿನಾಯೆ.” ಪಂಡಿನಪಗ

70ಆಯೆ, “ಇಜ್ಜಿ, ಈ ದಾದ ಪನೊಂದುಲ್ಲನ ಎಂಕ್ ತೆರಿಯಂದ್,” ಅಂದ್‌ದ್ ಮಾತೆರೆ ಎದುರು ಆರೆಂಜಿಯೆ.

71ಆಯೆ ಅಲ್ತ್‌ಡ್ದ್ ಬಾಕಿಲ್‌ದ ಕೈತಲ್‌ ಪೋಯಿನಪಗ ಬೊಕ್ಕೊರ್ತಿ ಚಾಕ್ರಿದಾಲ್ ಆಯನ್ ತೂದು ಕೈತಲ್‌ಡ್ ಉಂತುದಿನಾಕುಲೆಗ್, “ಉಂಬೆಲಾ ನಜರೇತ್‌ದ ಯೇಸುಡೊಪ್ಪ ಇತ್ತಿನಾಯೆ.” ಪಂಡಲ್.

72ಆಯೆ ಕುಡ, “ಆರೆಂಜಿಯೆ, ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಆಜ ದೀವೊಂದು ಪಂಡೆ.

73ಒಂತೆ ಪೊರ್ತುಡ್ದು ಬೊಕ್ಕ ಅಲ್ಪ ಉಂತುದಿನಾಕುಲು ದುಂಬು ಬತ್ತ್‌ದ್ ಪೇತ್ರಗ್, “ಕಂಡಿತಾದ್ ಈಲಾ ಅಕ್ಲೆಡ್ ಒರಿ, ನಿನ ಬಾಷೆನೇ ಈ ಗಲಿಲಾಯದಾಯೆ ಅಂದ್‌ದ್ ತೋಜಾವುಂಡು,” ಅಂದ್‌ದ್ ಪನ್ನಗ

74ಆಯೆ, “ಆ ನರಮಾನಿನ್ ಯಾನ್ ತೆರಿಯಯೆ,” ಅಂದ್‌ದ್ ಶಾಪಿಯೊನಿಯೆರೆಗ್ಲಾ, ಆಜ ಪಾಡಿಯೆರೆಗ್ಲಾ ಸುರು ಮಲ್ತೆ. ಅಪಗನೇ ಕೋರಿ ಕಿಲೆತ್ತ್ಂಡ್.

75ಅಪಗ ಪೇತ್ರೆ, “ಕೋರಿ ಕಿಲೆಪೊಡ್ದು ದುಂಬು ಮೂಜಿ ಸರ್ತಿ ಎನ ಬಗೆಟ್, ಆಯನ್ ತೆರಿಯಯೆ ಅಂದ್‌ದ್ ಅರೆಂಜುವ,” ಪಂಡ್ದ್ ಯೇಸು ಪನ್ತಿನ ಪಾತೆರೊನು ನೆನೆಪು ಮಲ್ತ್‌ದ್ ಪಿದಯಿ ಪೋದು ಬಿಕ್ಕ್‌ಬಿಕ್ಕ್‌ದ್ ಬುಲ್ತೆ.

← Chapter 25 Jump to: Chapter 27 →