Matthew 25

Tulu (ಪೊಸ ಒಡಂಬಡಿಕೆ)

1“ಆ ಸಮಯೊಡು ಪರಲೋಕ ರಾಜ್ಯ ತನ್ಕುಲೆ ತುಡರ್‌ಲೆನ್ ದೆತ್ತೊಂದು ಮದ್ಮಯನ್ ಎದುಕೊನಿಯೆರೆ ಪಿದಾಡ್ದಿ ಪತ್ತ್ ಮಂದಿ ಕನ್ಯಪೊಣ್ಣುಲೆಗ್ ಸಮ ಆದುಪ್ಪುಂಡು.

2ಐಟ್ಟ್ ಐನ್ ಮಂದಿ ಹೆಡ್ಡೆರ್, ಐನ್ ಮಂದಿ ಬುದ್ಧಿವಂತೆರ್.

3ಹೆಡ್ಡೆರ್ ತನ್ಕುಲೆ ತುಡರ್‌ಲೆನ್ ದೆತ್ತೊಂಡೆರ್, ಆಂಡ ಎಣ್ಣೆ ದೆತ್ತೊಂಜೆರ್.

4ಬುದ್ಧಿವಂತೆರ್ ತನ್ಕುಲೆ ತುಡರ್‌ದೊಟ್ಟುಗು ಕುಪ್ಪಿಡ್ ಎಣ್ಣೆಲಾ ದೆತ್ತೊಂಡೆರ್.

5ಮದ್ಮಯೆ ಬರಿಯೆರೆ ತಡ ಆನಗ ಅಕುಲು ಮಾತ ಕಣ್ಣ್ ಕೂರ್ದು ನಿದ್ರೆ ಮಲ್ತೆರ್.

6ಆಂಡ ನಡು ರಾತ್ರೆಡ್, ‘ಇಂದಾ, ಮದ್ಮಯೆ! ಆಯನ್ ಎದುಕೊನಿಯೆರೆ ಬಲೆ,’ ಅಂದ್‌ದ್ ಲೆಪ್ಪು ಆಂಡ್.

7ಅಪಗ ಕನ್ಯಪೊಣ್ಣುಲು ಮಾತ ಲಕ್ಕ್‌ದ್ ತನ್ಕುಲೆ ತುಡರ್‌ಲೆನ್ ಸಮ ಮಲ್ತೆರ್.

8ಆಂಡ ಹೆಡ್ಡೆರೆ ತುಡರ್‌ಡ್ ಎಣ್ಣೆ ಇಜ್ಜಾಂದೆ ತೆಕೊಂದಿತ್ತ್‌ಂಡ್, ಅಪಗ ಹೆಡ್ಡೆರ್ ಬುದ್ಧಿವಂತೆರ್‌ಡ, ‘ಎಂಕ್ಲೆಗ್ ಒಂತೆ ಎಣ್ಣೆ ಕೊರ್ಲೆ,

9ಎಂಕುಲೆ ತುಡರ್ ತೆಕ್ಕೊಂದುಂಡು,’ ಅಂದ್‌ದ್ ಪಂಡೆರ್. ಐಕ್ ಆ ಬುದ್ಧಿವಂತೆರ್, ‘ನಿಕ್ಲೆಗ್ ಕೊರ್‌ಂಡ ಎಂಕುಲೆಗ್ಲಾ ನಿಕ್ಲೆಗ್ಲಾ ಯಾವಂದ್; ನಿಕುಲು ಮಾರುನಾಕುಲೆ ಕೈತಲ್‌ ಪೋದು ದೆತ್ತೊನುನವು ಎಡ್ಡೆ,’ ಪಂಡೆರ್.

10ಅಕುಲು ದೆತ್ತೊನಿಯೆರೆ ಪೋಯಿನಪಗ ಮದ್ಮಯೆ ಬತ್ತೆ. ತಯಾರಾದಿತ್ತಿನಾಕುಲು ಆಯ ಒಟ್ಟುಗು ಮದ್ಮೆದ ಇಲ್ಲದ ಉಲಯಿ ಪೋಯೆರ್. ಬಾಕಿಲ್ ಮುಚ್ಚಿಂಡ್.

11ಐಡ್ದ್ ಬೊಕ್ಕ ಒರಿದಿ ಕನ್ಯಪೊಣ್ಣುಲು ಬತ್ತ್‌ದ್ ‘ಕರ್ತವಾ, ಕರ್ತವಾ, ಎಂಕ್ಲೆಗ್ ಬಾಕಿಲ್ ಜಪ್ಪುಲೆ,’ ಪಂಡ್ದ್ ಬೊಟ್ಟುನಗ

12ಆಯೆ ಉತ್ತರ ಕೊರ್ದು, ‘ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಏರ್ಂದ್ ಎಂಕ್ ಗೊತ್ತಿಜ್ಜಿ,’

13ದಾಯೆಗಂದ್ಂಡ ನರಮಾನಿ ಮಗೆ ಬರ್ಪಿ ದಿನ ಆವಡ್, ಗಳಿಗೆ ಆವಡ್ ನಿಕ್ಲೆಗ್ ಗೊತ್ತಿಜ್ಜಾಂದಿನೆಡ್ದ್ ಎಚ್ಚರಿಕೆಡುಪ್ಪುಲೆ.

14“ಪರಲೋಕ ರಾಜ್ಯ ಇಂಚಾದುಂಡು. ಪರದೇಶೊಗು ಪೋಪಿನ ಒರಿ ಯಜಮಾನೆ, ತನ ಬೇಲೆದಾಕುಲೆನ್ ಲೆತ್ತ್‌ದ್ ಅಕ್ಲೆಗ್ ತನ ಆಸ್ತಿನ್ ಅಕ್ಲೆ ಜವಾಬ್ದಾರಿಡ್ ಬುಡ್ತಿಲೆಕ್ಕ ಉಂಡು.

15ಆಯೆ ಒರಿಯಗ್ ಐನ್ ತಲಾಂತ್, ಒರಿಯಗ್ ರಡ್ಡ್ ತಲಾಂತ್, ಒರಿಯಗ್ ಒಂಜಿ ತಲಾಂತ್, ಇಂಚ ಅಕ್ಲೆನ ಸಾಮರ್ಥ್ಯದ ಪ್ರಕಾರ ಕೊರ್ದು ಬೇತೆ ಒಂಜಿ ದೇಶೊಗು ಪೋಯೆ.

16ಐನ್ ತಲಾಂತ್ ತಿಕ್ಕಿನಾಯೆ ಅವೆನ್ ಪೋದು ವ್ಯಾಪಾರೊಗು ಪಾಡ್ದ್ ನನಲಾ ಐನ್ ತಲಾಂತ್ ಲಾಭ ಮಲ್ತೆ;

17ಅಂಚೆನೇ ರಡ್ಡ್ ತಲಾಂತ್ ತಿಕ್ಕಿನಾಯೆ ನನಲಾ ರಡ್ಡ್ ತಲಾಂತ್ ಸಂಪಾದನೆ ಮಲ್ತೆ,

18ಆಂಡ ಒಂಜಿ ತಲಾಂತ್ ತಿಕ್ಕಿನಾಯೆ ಪೋದು ನೆಲ ಗರ್ತ್‌ದ್ ತನ ಯಜಮಾನನ ಕಾಸ್‌ನ್ ದೆಂಗಾದ್ ದೀಯೆ.

19ಮಸ್ತ್ ಸಮಯೊಡ್ದು ಬೊಕ್ಕ ಆ ಬೇಲೆದಾಕುಲೆ ಯಜಮಾನೆ ಬತ್ತ್‌ದ್ ಅಕ್ಲೆಡ್ದ್ ಲೆಖ್ಖ ದೆತ್ತೊಂಡೆ.

20ಐನ್ ತಲಾಂತ್ ತಿಕ್ಕಿನಾಯೆ ದುಂಬು ಬತ್ತ್‌ದ್ ನನಲಾ ಐನ್ ತಲಾಂತ್ ಹೆಚ್ಚ್ ಕನತ್‌ದ್, ‘ಯಜಮಾನ, ಈ ಎಂಕ್ ಐನ್ ತಲಾಂತ್ ಕೊರ್ತ ಅತ್ತಾ, ಇಂದಾ, ನನಲಾ ಐನ್ ತಲಾಂತ್ ಹೆಚ್ಚ್ ಸಂಪಾದನೆ ಮಲ್ತ್‌ದೆ,’ ಪಂಡೆ.

21ಐಕ್ ಆಯ ಯಜಮಾನೆ, ‘ಬಲ, ನಂಬಿಗಸ್ತೆ ಆಯಿ ಎಡ್ಡೆ ಬೇಲೆದಾಯಾ ಈ ಒಂತೆ ಕೆಲಸೊಡು ನಂಬಿಗಸ್ತೆ ಆದಿತ್ತ, ಮಲ್ಲ ಕೆಲಸೊಡು ನಿನನ್ ದೀಪೆ, ನಿನ ಯಜಮಾನನ ಸಂತೊಷೊಗು ಸೇರ್‌ಲ,’ ಪಂಡೆ.

22ಅಪಗ ರಡ್ಡ್ ತಲಾಂತ್ ತಿಕ್ಕಿನಾಯೆ ದುಂಬು ಬತ್ತ್‌ದ್, ‘ಯಜಮಾನ, ರಡ್ಡ್ ತಲಾಂತ್ ಎಂಕ್ ಒಪ್ಪಿಸಾದ ಅತ್ತಾ; ಐಡ್ದ್ ನನಲಾ ರಡ್ಡ್ ತಲಾಂತ್ ಹೆಚ್ಚ್ ಸಂಪಾದನೆ ಮಲ್ತ್‌ದೆ,’ ಪಂಡೆ.

23ಆಯ ಯಜಮಾನೆ ಆಯಡ, ‘ಬಲ ನಂಬಿಗಸ್ತೆ ಆಯಿ ಎಡ್ಡೆ ಬೇಲೆದಾಯಾ ಈ ಒಂತೆ ಕೆಲಸೊಡು ನಂಬಿಗಸ್ತೆ ಆದಿತ್ತ, ಮಲ್ಲ ಕೆಲಸೊಡು ನಿನನ್ ದೀಪೆ, ನಿನ ಯಜಮಾನನ ಸಂತೊಷೊಗು ಸೇರ್‌ಲ,’ ಅಂದ್‌ದ್ ಪಂಡೆ.

24ಐಡ್ದ್ ಬೊಕ್ಕ ಒಂಜಿ ತಲಾಂತ್ ತಿಕ್ಕಿನಾಯೆಲಾ ದುಂಬು ಬತ್ತ್‌ದ್, ‘ಯಜಮಾನ, ಈ ಕಠಿಣ ನರಮಾನಿ, ಈ ಬಿರ್ಕಂದಿನಲ್ಪ ಕೊಯ್ಪಿನಾಯೆ, ಈ ಪಾಡಂದಿನಲ್ಪ ಬುಲೆನ್ ರಾಶಿ ಮಲ್ತೊನುನಾಯೆ ಅಂದ್‌ದ್ ತೆರಿದ್

25ಪೋಡಿದ್ ಪೋದು ಈ ನಿನ ತಲಾಂತ್‌ನ್ ಭೂಮಿಡ್ ದೆಂಗಾದ್ ದೀದಿತ್ತೆ; ಇಂದಾ, ನಿನ್ನವು ನಿಕ್ಕ್ ಉಪ್ಪಡ್,’ ಪಂಡೆ.

26ಅಪಗ ಆಯನ ಯಜಮಾನೆ ಆಯಗ್, ‘ಮೆಯಿ ಬಗ್ಗಂದಿನಾಯಾ ಪ್ರಯೋಜನದಾಂತಿ ಬೇಲೆದಾಯಾ, ಈ ಯಾನ್ ಬಿರ್ಕಂದಿನಲ್ಪ ಕೊಯ್ಪಿನಾಯೆ, ಬೊಕ್ಕ ಪಾಡಂದಿನಲ್ಪ ಬುಲೆನ್ ರಾಶಿ ಮಲ್ತೊನುನಾಯೆ ಅಂದ್‌ದ್ ನಿಕ್ಕ್ ಗೊತ್ತಿತ್ತ್ಂಡತ್ತಾ?

27ಅಂಚಾಂಡ ಈ ಎನ ಕಾಸ್‌ನ್ ಸಾಹುಕಾರನ ಕೈತಲ್‌ ಬಡ್ಡಿಗ್ ಪಾಡೊಡಿತ್ತ್‌ಂಡ್. ಯಾನ್ ಬತ್ತ್‌ದ್ ಎನ್ನೆನ್ ಬಡ್ಡಿಸಮೇತ ದೆತ್ತೊಂದ್ವೆ ಅತ್ತಾ,’ ಅಂದ್‌ದ್ ಪಂಡೆ.

28ತನ ಸೇವಕೆರೆಗ್, ‘ಆಯಡ್ದ್ ಆ ತಲಾಂತ್ ದೆತ್ತೊಂದು ಪತ್ತ್ ತಲಾಂತ್ ಇತ್ತಿನಾಯಗ್ ಕೊರ್ಲೆ.

29ದಾಯೆ ಪಂಡ ಇತ್ತಿನಾಕುಲೆಗ್ ದೇವೆರ್ ಹೆಚ್ಚಾದ್ ಕೊರುವೆ, ಅಕ್ಲೆಗ್ ನನಲಾ ಹೆಚ್ಚಾಪುಂಡು; ಇಜ್ಜಾಂದಿನಾಯಡ ಇತ್ತಿನವುಲಾ ದೆತ್ತ್‌ದ್ ಬುಡ್ಪುಂಡು.

30ಬೊಕ್ಕ ಪ್ರಯೋಜನದಾಂತಿ ಬೇಲೆದಾಯನ್ ಪಿದಯಿ ಕತ್ತಲೆಗ್ ಪಾಡ್ದ್ ಬುಡ್ಲೆ ಅಂದ್‌ದ್ ಪಂಡೆ. ಅಲ್ಪ ಅರ್ಪಟಲಾ, ಕಟಕಟ ಕೂಲಿ ಕಡೆಪಿನವುಲಾ ಉಪ್ಪುಂಡು.’

31“ಉಂದತ್ತಂದೆ ನರಮಾನಿ ಮಗೆ ತನ ಮೈಮೆಡ್ ಮಾತ ಪರಿಶುದ್ಧ ದೂತೆರೆಲಾ ಆಯಡೊಪ್ಪ ಬನ್ನಗ ತನ ಮೈಮೆದ ಗದ್ದಿಗೆಡ್ ಕುಲ್ಲುವೆ;

32ಬೊಕ್ಕ ಮಾತ ದೇಶೊಲೆ ಜನೊಕುಲು ಆಯ ದುಂಬು ಸೇರ್ದ್ ಬರ್ಪೆರ್. ಕುರುಬೆ ಏಡ್‌ಲೆನ್ಲಾ, ಕುರಿಕುಲೆನ್ಲಾ ಬೇತೆ ಬೇತೆ ಮಲ್ಪುಲೆಕ್ಕನೇ ಆಯೆ ಅಕ್ಲೆನ್ ಬೇತೆ ಬೇತೆ ಮಲ್ಪುವೆ

33ಕುರಿಕುಲೆನ್ ತನ ಬಲತ್ತ ಮರ್ಗಿಲ್‌ಡ್, ಏಡ್‌ಲೆನ್ ತನ ದತ್ತ ಮರ್ಗಿಲ್‌ಡ್ ಉಂತಾವೆ.

34ಅಪಗ ಅರಸು ತನ ಬಲತ್ತ ಮರ್ಗಿಲ್‌ಡ್ ಉಪ್ಪುನಾಕುಲೆಗ್, ‘ಎನ ಅಮ್ಮೆರೆನ ಆಶೀರ್ವಾದ ಪಡೆಯಿನಾಕುಲೆ ಬಲೆ, ಲೋಕಾದಿಡ್ದ್ ನಿಕ್ಲೆಗಾದ್ ತಯಾರಾದುಪ್ಪು ರಾಜ್ಯೊನು ಬೊಕ್ಕ ಬಾಧ್ಯಸ್ತಿಗೆದ ಹಕ್ಕ್‌ನ್ ದೆತ್ತೊನ್ಲೆ.

35ಯಾನ್ ಬಡವುಡಿತ್ತೆ, ಎಂಕ್ ವಣಸ್ ಕೊರಿಯರ್; ಯಾನ್ ಬಾಜೆಲ್‌ಡಿತ್ತೆ, ಎಂಕ್ ಪರಿಯೆರೆ ಕೊರಿಯರ್; ಪರದೇಶಿ ಆದಿತ್ತೆ, ಎನನ್ ಸೇರಾವೊಂಡರ್;

36ಕುಂಟುದಾಂತಿನಾಯೆ ಆದಿತ್ತೆ, ನಿಕುಲು ತುತ್ಯೆರೆ ಕೊರಿಯರ್; ಸೀಕ್‌ಡ್ ಬೂರ್ದಿತ್ತೆ, ಎನನ್ ಆರೈಕೆ ಮಲ್ಪೆರೆ ಬತ್ತರ್; ಸೆರೆಮನೆಟ್ ಇತ್ತೆ, ಎನನ್ ತೂಯೆರೆ ಬತ್ತರ್,’ ಅಂದ್‌ದ್ ಪನ್ಪೆ.

37ಐಕ್ ನೀತಿವಂತೆರ್, ‘ಕರ್ತವಾ, ಏಪ ಈ ಬಡವುಡಿತ್ತಿನೆನ್ ತೂದು ನಿಕ್ಕ್ ವಣಸ್ ಕೊರಿಯ? ಇಜ್ಜಿಡ ನಿಕ್ಕ್ ಬಾಜೆಲ್ ಆತಿನೆನ್ ತೂದು ಪರಿಯೆರೆ ಕೊರಿಯ?

38ಏಪ ಈ ಪರದೇಶಿ ಆದುಪ್ಪುನೆನ್ ತೂದು ಸೇರಾವೊಂಡ? ಇಜ್ಜಿಡ ನಿಕ್ಕ್ ಕುಂಟುದಾಂತೆ ಉಪ್ಪುನೆನ್ ತೂದು ತುತ್ಯೆರೆ ಕೊರಿಯ?

39ಎಂಕುಲು ಏಪ ಈ ಸೀಕ್‌ಡ್ ಬೂರ್ದಿನೆನ್ ತೂದು ಆರೈಕೆ ಮಲ್ತ್‌ದಿನಿ? ಅತ್ತ್‌ಡ ಸೆರೆಮನೆಟ್ ಇತ್ತಿನೆನ್ ತೂದು ನಿನನ್ ತೂಯೆರೆ ಬತ್ತ,’ ಅಂದ್‌ದ್ ಕೇನ್ವೆರ್.

40ಐಕ್ ಅರಸು, ‘ಎನ ಸಹೋದ್ರೆರೆಡ್ ಬಜೀ ಅಲ್ಪೆರಾಯಿ ಒರಿಯಗ್ ಎಂಚೆಂಚಿನ ಮಲ್ತರಾ ಅವು ಎಂಕ್ ಮಲ್ತಿಲೆಕ್ಕ ಆಂಡ್ ಅಂದ್‌ದ್ ನಿಕ್ಲೆಗ್ ನಿಜಾದ್ ಪನ್ಪೆ,’ ಅಂದ್‌ದ್ ಪಂಡೆ.

41ಐಡ್ದ್ ಬೊಕ್ಕ ಆಯೆ ದತ್ತ ಮರ್ಗಿಲ್‌ಡ್ ಉಪ್ಪುನಾಕುಲೆಗ್, ‘ಶಾಪಗ್ರಸ್ತೆರೇ, ಎನನ್ ಬುಡ್ದು ಪಿಶಾಚಗ್ಲಾ, ಆಯ ದೂತೆರೆಗ್ಲಾ ತಯಾರಾದುಪ್ಪು ನಿತ್ಯ ತೂತ ಉಲಯಿ ಪೋಲೆ.

42ಯಾನ್ ಬಡವುಡಿತ್ತೆ, ನಿಕುಲು ಎಂಕ್ ವಣಸ್ ಕೊರ್ಜರ್; ಯಾನ್ ಬಾಜೆಲ್‌ಡಿತ್ತೆ, ನಿಕುಲು ಎಂಕ್ ಪರಿಯೆರೆ ಕೊರ್ಜರ್;

43ಪರದೇಶಿ ಆದಿತ್ತೆ, ನಿಕುಲು ಎನನ್ ಸೇರಾವೊಂಡಿಜರ್; ಕುಂಟುದಾಂತಿನಾಯೆ ಆದಿತ್ತೆ, ನಿಕುಲು ಎಂಕ್ ತುತ್ಯೆರೆ ಕೊರ್ಜರ್; ಸೀಕ್‌ಡ್ ಬೂರ್ದಿತ್ತೆ, ಸೆರೆಮನೆಟ್ ಇತ್ತೆ, ನಿಕುಲು ಎನನ್ ಆರೈಕೆ ಮಲ್ಪೆರೆ ಬತ್ತಿಜರ್,’ ಅಂದ್‌ದ್ ಪಂಡೆ.

44ಐಕ್ ಅಕುಲುಲಾ, ‘ಕರ್ತವಾ, ಏಪ ಈ ಬಡವುಡಿತ್ತಿನೆನ್ಲಾ, ಬಾಜೆಲ್‌ಡ್ ಇತ್ತಿನೆನ್ಲಾ, ಈ ಪರದೇಶಿಯಾದ್ ಇತ್ತಿನೆನ್ಲಾ, ಈ ಕುಂಟುದಾಂತಿನಾಯೆ ಆದಿತ್ತಿನೆನ್ಲಾ, ಈ ಸೀಕ್‌ಡ್ ಬೂರ್ದಿತ್ತಿನೆನ್‌ಲಾ, ಈ ಸೆರೆಮನೆಟ್ ಇತ್ತಿನೆನ್ಲಾ ತೂದು ನಿಕ್ಕ್ ಚಾಕ್ರಿ ಮಲ್ಪಂದೆ ಪೋಯ?’ ಪನ್ವೆರ್.

45ಅಪಗ ಆಯೆ ಉತ್ತರ ಕೊರ್ದು, ‘ನಿಕ್ಲೆಗ್ ನಿಜಾದ್ ಪನ್ಪೆ, ನಿಕುಲು ಈ ಬಜೀ ಅಲ್ಪೆರಾಯಿ ಒರಿಯಗ್ ಎಂಚೆಂಚಿನ ಮಲ್ಪಂದೆ ಉಲ್ಲರಾ ಅವೆನ್ ಎಂಕ್‌ಲಾ ಮಲ್ಪಂದಿಲೆಕ್ಕ ಆಂಡ್,’ ಅಂದ್‌ದ್ ಪಂಡೆ.

46ಬೊಕ್ಕ ಮೊಕುಲು ನಿತ್ಯ ಶಿಕ್ಷೆಗ್ಲಾ, ನೀತಿವಂತೆರ್ ನಿತ್ಯಜೀವೊಗ್ಲಾ ಪೋಪೆರ್,” ಅಂದ್‌ದ್ ಪಂಡೆ.

← Chapter 24 Jump to: Chapter 26 →