Matthew 5

Tulu (ಪೊಸ ಒಡಂಬಡಿಕೆ)

← Chapter 4 Jump to: Chapter 6 →

1ಆಯೆ ಆ ಜನೊಕುಲೆ ಗುಂಪುಲೆನ್ ತೂದು ಪರ್ವತ ಮಿತ್ತಾರ್ದ್ ಕುಲ್ಲಿ ಬೊಕ್ಕ ಆಯನ ಶಿಷ್ಯೆರ್ ಆಯ ಕೈತಲ್‌ ಬತ್ತೆರ್.

2ಆಯೆ ಅಕ್ಲೆಗ್ ಬೋಧನೆ ಮಲ್ಪೆರೆ ಸುರು ಮಲ್ತೆ.

3“ಆತ್ಮೊಡು ಬಡವೆರ್ ಆದಿತ್ತಿನಾಕುಲು ಭಾಗ್ಯವಂತೆರ್, ಪರಲೋಕ ರಾಜ್ಯ ಅಕ್ಲೆನವು.

4ದುಃಖ ಮಲ್ಪುನಾಕುಲು ಭಾಗ್ಯವಂತೆರ್, ಅಕ್ಲೆಗ್ ದೇವೆರೆಡ್ದ್ ಸಮಾಧಾನ ತಿಕ್ಕುಂಡು

5ತಗ್ಗಾವೊಂಡಿನಾಕುಲು ಭಾಗ್ಯವಂತೆರ್, ಅಕ್ಲೆಗ್ ಭೂಮಿ ಬಾಧ್ಯಸ್ತಿಗೆ ಆದ್ ತಿಕ್ಕುಂಡು.

6ನೀತಿಗ್ ಬಡವು ಬಾಜೆಲ್ ಇತ್ತಿನಾಕುಲು ಭಾಗ್ಯವಂತೆರ್; ಅಕ್ಲೆಗ್ ತೃಪ್ತಿ ಆಪುಂಡು.

7ಕನಿಕರ ಇತ್ತಿನಾಕುಲು ಭಾಗ್ಯವಂತೆರ್, ಅಕುಲು ಕನಿಕರ ಪಡೆವೊನ್ವೆರ್.

8ಶುದ್ಧ ಉಡಲ್‌ದಾಕುಲು ಭಾಗ್ಯವಂತೆರ್, ಅಕುಲು ದೇವೆರೆನ್ ತೂವೆರ್.

9ಸಮಾಧಾನ ಮಲ್ಪುನಾಕುಲು ಭಾಗ್ಯವಂತೆರ್, ಅಕ್ಲೆನ್ ದೇವೆರೆ ಜೋಕುಲು ಅಂದ್‌ದ್ ಲೆಪ್ಪಾವೊನ್ವೆರ್.

10ನೀತಿಗಾದ್ ಭಂಗೊನು ತಾಳೊಂಡಿನಾಕುಲು ಭಾಗ್ಯವಂತೆರ್, ಪರಲೋಕ ರಾಜ್ಯ ಅಕ್ಲೆನವು.

11ಎನಡ್ದ್ ಜನೊಕುಲು ನಿಕ್ಲೆನ್ ನಿಂದೆ ಮಲ್ತ್‌ದ್ ಭಂಗ ಕೊರ್ದು ನಿಕ್ಲೆ ಮಿತ್ತ್ ಬೊಡ್ಚಾಂದಿ ಸುಳ್ಳು ಪಾತೆರ ಪಂಡೆರ್ಡ ನಿಕುಲು ಭಾಗ್ಯವಂತೆರ್; ದಾಯೆಗಂದ್ಂಡ ನಿಕುಲು ಎನ ಶಿಷ್ಯೆರಾದುಲ್ಲರ್.

12“ಸಂತೋಷೊಡುಪ್ಪುಲೆ, ಉಲ್ಲಾಸೊಡುಪ್ಪುಲೆ, ಪರಲೋಕೊಡು ನಿಕ್ಲೆಗ್ ದಿಂಜ ಫಲ ಉಂಡು. ನಿಕ್ಲೆಡ್ದ್ ದುಂಬು ಇತ್ತಿ ಪ್ರವಾದಿಲೆಗ್ಲಾ ಅಕುಲು ಇಂಚೆನೆ ಭಂಗ ಕೊರ್ತೆರತ್ತಾ.

13“ನಿಕುಲು ಭೂಮಿಗ್ ಉಪ್ಪು ಆದುಲ್ಲರ್. ಆಂಡ ಉಪ್ಪು ಚಪ್ಪೆ ಆದ್ ಪೋಂಡ, ಐಕ್ ಒಯಿಡ್ದ್ ರುಚಿ ಬರು? ಜನೊಕುಲು ಅವೆನ್ ಪಿದಾಯಿ ಪಾಡ್ದ್ ದೊಂಕಿಯೆರೆ ಯೋಗ್ಯದವು ಅತ್ತಂದೆ ಬೊಕ್ಕ ಒಯಿಕ್‌ಲಾ ಆವಂದ್.

14“ನಿಕುಲು ಲೋಕೊಗು ಬೊಲ್ಪಾದುಲ್ಲರ್. ಪರ್ವತದ ಮಿತ್ತ್ ಕಟ್ಟ್‌ದುಪ್ಪುನ ಊರು ಏಪೊಗ್ಲಾ ಮದೆ ಆದುಪ್ಪಂದ್.

15“ಬೊಕ್ಕ ತುಡರ್‌ನ್ ಪೊತ್ತಾದ್ ಕಲಸೆದುಲಯಿ ದೀಪುಜೆರ್, ದೀಪಕಂಬದ ಮಿತ್ತ್ ದೀಪೆರತ್ತಾ. ಅಪಗ ಅವು ಇಲ್ಲಡಿತ್ತಿನಾಕುಲೆಗ್ ಮಾತೆರೆಗ್ ಬೊಲ್ಪು ಕೊರ್ಪುಂಡು.

16ಐತ ಲೆಕ್ಕನೆ ನಿಕ್ಲೆನ ಬೊಲ್ಪು ಜನೊಕುಲೆ ಎದುರುಡು ಅರ್ಲಡ್, ಇಂಚಾಂಡ ಅಕುಲು ನಿಕ್ಲೆನ ಎಡ್ಡೆ ಕ್ರಿಯೊಲೆನ್ ತೂದು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆನ್ ಪುಗರುವೆರ್.

17“ಮೋಶೆನ ನ್ಯಾಯಕಟ್ಟ್ ಆವಡ್ ಪ್ರವಾದಿಲೆ ಪಾತೆರೊಲೆನ್ ಆವಡ್ ದೆತ್ತ್ ಪಾಡಿಯೆರೆ ಯಾನ್ ಬತ್ತೆ ಅಂದ್‌ದ್ ಎನ್ನೊಡ್ಚಿ. ದೆತ್ತ್ ಪಾಡಿಯೆರೆ ಬೈದಿಜಿ, ಪೂರ್ತಿ ಮಲ್ಪೆರೆ ಬೈದೆ.

18ನಿಕ್ಲೆಗ್ ನಿಜಾದ್ ಪನ್ಪೆ, ಬಾನಲಾ ಭೂಮಿಲಾ ಆಳಿದ್ ಪೋಪಿನೆಟ್ಟ ನ್ಯಾಯಕಟ್ಟ್‌ಡುಪ್ಪು ಮಾತ ನಡಪುಡಂದೆ ಐತ ಉಲಯಿಡ್ದ್ ಒಂಜಿ ಸೊನ್ನೆಲಾ, ಒಂಜಿ ಶಬ್ಧಲಾ ಆಳಿದ್ ಪೋವಂದ್.

19ಅಂಚಾಯಿನೆಡ್ದ್ ಈ ಎಲ್ಯೆಲ್ಯ ಅಪ್ಪಣೆಲೆಡ್ ಒಂಜೆನ್ ಮೀರ್‌ದ್ ಜನೊಕುಲೆಗ್ಲಾ ಅಂಚ ನಡಪೆರೆ ಬೋಧನೆ ಮಲ್ಪುನಾಯೆ ಪರಲೋಕ ರಾಜ್ಯೊಡು ಬಜೀ ಎಲ್ಯಾಯೆ ಆದುಪ್ಪುವೆ; ಆಂಡ ತಾನೇ ಆ ಅಪ್ಪಣೆದಲೆಕ್ಕ ನಡತೊಂದು ಜನೊಕುಲೆಗ್ಲಾ ಅಂಚ ನಡಪೆರೆ ಬೋಧನೆ ಮಲ್ಪುನಾಯೆ ಪರಲೋಕ ರಾಜ್ಯೊಡು ಮಲ್ಲಾಯೆ ಆದುಲ್ಲೆ.

20ನಿಕ್ಲೆ ನೀತಿ, ಶಾಸ್ತ್ರಿಲೆ ಬೊಕ್ಕ ಪರಿಸಾಯೆರೆ ನೀತಿಡ್ದ್‌ಲಾ ಹೆಚ್ಚಿನವು ಆದಿತ್ತಿಜಿಡ ಪರಲೋಕ ರಾಜ್ಯೊಡು ಸೇರಯರ್ ಅಂದ್‌ದ್ ಯಾನ್ ನಿಕ್ಲೆಗ್ ಪನ್ಪೆ.

21“ಮಾನ್ಯ ಕೆರಿಯೆರೆ ಬಲ್ಲಿ, ಮಾನ್ಯ ಕೆರ್ಪಿನಾಯೆ ನ್ಯಾಯವಿಚಾರಣೆಗ್‌ ಒಳಗಾಪೆ ಅಂದ್‌ದ್ ಹಿರಿಯೆರೆಗ್ ಪನ್ತಿನೆನ್ ನಿಕುಲು ಕೇಂಡ್ದರ್.

22ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ತನ ಸಹೋದ್ರನ ಮಿತ್ತ್ ಕೋಪ ಮಲ್ಪುನ ಪ್ರತಿಯೊರಿಲಾ ನ್ಯಾಯವಿಚಾರಣೆಗ್‌ ಒಳಗಾಪೆ. ತನ ಸಹೋದ್ರನ್ ತೂದು, ಛೀ ನೀಚೆ ಅಂದ್‌ದ್ ಪನ್ಪಿನಾಯೆ ನ್ಯಾಯಸಭೆತ ವಿಚಾರಣೆಗ್ ಒಳಗಾಪೆ. ಮೂರ್ಕೆ ಪನ್ಪಿನಾಯೆ ತೂತ ನರಕೊಗು ಒಳಗಾಪೆ.

23ಅಂಚಾಯಿನೆಡ್ದ್ ಈ ನಿನ ಕಾಣಿಕೆನ್ ಬಲಿಪೀಠದ ಕೈತಲ್‌ ಕನತಿನಪಗ ನಿನ ಸಹೋದ್ರನ ಉಡಲ್‌ಡ್ ನಿನ ಮಿತ್ತ್ ಎಂಚಿನಾಂಡಲಾ ವಿರೋಧ ಉಂಡು ಅಂದ್‌ದ್ ನಿನ ನೆನೆಪುಗು ಬತ್ತ್ಂಡ,

24ನಿನ ಕಾಣಿಕೆನ್ ಬಲಿಪೀಠದ ಎದುರುಡೇ ಬುಡ್ದು ಪೋದು ದುಂಬತ್ತ ನಿನ ಸಹೋದ್ರನ ಒಟ್ಟುಗು ಒಂಜಾಲ ಐಡ್ದ್ ಬೊಕ್ಕ ಬತ್ತ್‌ದ್ ಕಾಣಿಕೆನ್ ಕೊರ್ಲ.

25“ನಿನನ್ ವಾದ ಮಲ್ಪುನಾಯೆ ನಿನಡೊಪ್ಪ ಇತ್ತೆಡ ಸಾದಿಡೇ ಆಯಡೊಪ್ಪ ಅಪಗನೆ ಸಂದಾನ ಮಲ್ತೊನ್ಲ, ಇಜ್ಜಾಂಡ ಆ ವಾದ ಮಲ್ಪುನಾಯೆ ನಿನನ್ ನ್ಯಾಯಾಧಿಪತಿಗ್ ಒಚ್ಚಿದ್ ಕೊರಿಯೆರೆ ಯಾವು. ನ್ಯಾಯಾಧಿಪತಿ ನಿನನ್ ಸೆರೆಮನೆತ ಅಧಿಕಾರಿನ ಕೈಕ್ ಒಚ್ಚಿದ್ ಕೊರುವೆ. ಅಪಗ ಈ ಸೆರೆಮನೆಟ್ ಬೂರ್ವ.

26ನಿಕ್ಕ್ ನಿಜಾದ್ ಪನ್ಪೆ, ಈ ಕಡೇ ಕಾಸ್‌ನ್ ಸಂದಾವು ಮುಟ್ಟ ಅಲ್ಪಡ್ದ್ ಪಿದಯಿ ಬರ್ಪಿನೇ ಇಜ್ಜಿ.

27“ವ್ಯಭಿಚಾರ ಮಲ್ಪೆರೆ ಬಲ್ಲಿ ಅಂದ್‌ದ್ ಪನ್ತಿನೆನ್ ನಿಕುಲು ಕೇಂಡ್ದರ್.

28ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಒಂಜಿ ಪೊಂಜೊವುನ ಮಿತ್ತ್ ಮನಸಾದ್ ಕಣ್ಣ್ ದೀಪಿನಾಯೆ ಪ್ರತಿಯೊರಿಲಾ ಅಪಗನೆ ತನ ಉಡಲ್‌ಡ್ ಆಲೆಡೊಪ್ಪ ವ್ಯಭಿಚಾರ ಮಲ್ತಿನಾಯೆ ಆಯೆ.

29ನಿನ ಬಲತ್ತ ಕಣ್ಣ್ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕೂಂತುದು ದಕ್ಕ್‌ದ್ ಬುಡ್ಲ. ನಿನ ಇಡೀ ಶರೀರ ನರಕೊಡು ಬೂರುನೆಡ್ದ್ ನಿನ ಅಂಗೊಲೆಡ್ದ್ ಒಂಜಿ ಹಾಳಾಪಿನವು ಏತೋ ಎಡ್ಡೆ.

30ನಿನ ಬಲತ್ತ ಕೈ ನಿನನ್ ಪಾಪೊಗು ತಿಕ್ಕಾವುನಾಂಡ ಅವೆನ್ ಕಡ್ತ್‌ದ್ ದಕ್ಕ್‌ದ್ ಬುಡ್ಲ. ನಿನ ಇಡೀ ಶರೀರ ನರಕೊಡು ಬೂರುನೆಡ್ದ್ ನಿನ ಅಂಗೊಲೆಡ್ ಒಂಜಿ ಹಾಳಾಪಿನವು ಐಡ್ದ್ ಏತೋ ಎಡ್ಡೆ.

31“ಉಂದತ್ತಂದೆ ತನ ಬೊಡೆದಿನ್ ಬುಡ್ಪಿನಾಯೆ ಆಲೆಗ್ ತ್ಯಾಗಪತ್ರ ಕೊರೊಡು. ಅಂದ್‌ದ್ ಪನ್ತ್ಂಡ್ ಅತ್ತಾ.

32ಆಂಡ ಯಾನ್ ಪನ್ಪಿನಿ ದಾನೆಂದ್ಂಡ, ವ್ಯಭಿಚಾರ ಮಲ್ತಿ ಕಾರಣೊಗಾದ್ ಅತ್ತಂದೆ ತನ ಬೊಡೆದಿನ್ ಬುಡ್ಪಿನಾಯೆ, ಆಲೆನ್ ವ್ಯಭಿಚಾರ ಮಲ್ಪಾವೆರೆ ಕಾರಣ ಆಪೆ. ಬೊಕ್ಕ ಕಂಡನಿ ಬುಡ್ತಿನಲೆನ್ ಮದ್ಮೆ ಮಲ್ತೊನುನಾಯೆ ವ್ಯಭಿಚಾರ ಮಲ್ಪುನಾಯೆ ಆದುಲ್ಲೆ.

33“ಬೊಕ್ಕ ಸುಳ್ಳು ಪ್ರಮಾಣ ಪಾಡಿಯೆರೆ ಬಲ್ಲಿ. ಈ ದೀವೊಂಡಿ ಪ್ರಮಾಣೊನು ಕರ್ತವಗ್ ಸಂದಾವೊಡು ಅಂದ್‌ದ್ ಹಿರಿಯಾಕುಲೆಗ್ ಪನ್ತಿನೆನ್ ಕೇಂಡ್ದರತ್ತಾ?

34ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ, ಆಜ ಪಾಡಡೆ, ಪರಲೋಕದ ಮಿತ್ತ್ ಆಜ ಪಾಡೊಡ್ಚಿ, ಅವು ದೇವೆರೆ ಗದ್ದಿಗೆ ಆದುಂಡು.

35ಭೂಮಿದ ಮಿತ್ತ್ ಆಜ ಪಾಡೊಡ್ಚಿ, ಅವು ದೇವೆರೆನ ಪಾದಪೀಠ ಆದುಂಡು. ಯೆರೂಸಲೇಮುದ ಮಿತ್ತ್ ಆಜ ಪಾಡೊಡ್ಚಿ, ಅವು ಮಲ್ಲ ಅರಸುನ ಪಟ್ಟಣ ಆದುಂಡು.

36ನಿನ ತರೆತ ಮಿತ್ತ್ ಆಜ ಪಾಡೊಡ್ಚಿ, ಈ ಒಂಜಿ ಕುಜಲ್‌ನಾಂಡಲಾ ಬೊಲ್ದು ಇಜ್ಜಿಂಡ ಕಪ್ಪು ಮಲ್ಪಯ.

37ನಿಕ್ಲೆನ ಪಾತೆರ ಅಂದ್ ಆದಿತ್ತ್ಂಡ ಅಂದ್, ಅತ್ತ್ ಆದಿತ್ತ್ಂಡ ಅತ್ತ್ ಆದುಪ್ಪಡ್. ಉಂದೆಡ್ದ್ ಹೆಚ್ಚ್‌ದವು ಸೈತಾನಡ್ದ್ ಬೈದಿನವು.

38“ಕಣ್ಣ್‌ದ ಬದಲ್‌ಗ್ ಕಣ್ಣ್, ಕೂಲಿದ ಬದಲ್‌ಗ್ ಕೂಲಿ ದೆಪ್ಪಾವು ಅಂದ್‌ದ್ ಪನ್ತಿನೆನ್ ಕೇಂಡ್ದರತ್ತ.

39ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ಕೇಡ್ ಮಲ್ಪುನಾಯಗ್ ಎದುರು ಉಂತಡೆ. ಒರಿ ನಿನ ಬಲತ್ತ ಕೆಪ್ಪೆಗ್ ಹಾಕಿಯೆಡ ಆಯಗ್ ಬೊಕ್ಕೊಂಜಿ ಕೆಪ್ಪೆನ್ಲಾ ತೋಜಾಲ.

40ನಿನನ್ ಕಚೇರಿಗ್ ಲೆತ್ತೊಂದು ಪೋದು ವ್ಯಾಜ್ಯ ಮಲ್ತ್‌ದ್ ನಿನ ಉಲಯಿದ ಅಂಗಿನ್ ದೆತ್ತೊನೊಡು ಪಂಡ್ದಿತ್ತಿನಾಯಗ್ ನಿನ ಮೇಲಂಗಿನ್ ಬುಡ್ಲ.

41ಒರಿ ಒಂಜಿ ಮೈಲ್ ದೂರ ಬಲ ಪಂಡ್ದ್ ನಡಪೆರೆ ಒತ್ತಾಯ ಮಲ್ಪುವೆಡ, ಆಯನೊಟ್ಟುಗು ರಡ್ಡ್ ಮೈಲ್ ಪೋಲ.

42ನಿನಡ ನಟ್ಟೊಂಡಿನಾಯಗ್ ಕೊರ್ಲ, ಸಾಲ ದೆತ್ತೊನೆರೆ ಬತ್ತಿನಾಯಗ್ ಮೋನೆ ತಿರ್ಗಾವಡ.

43“ನಿನ ನಿರೆತಾಯನ್ ಪ್ರೀತಿ ಮಲ್ತ್‌ದ್ ನಿನ ಪಗೆನಾಯನ್ ಪಗೆ ಮಲ್ಪೊಡು ಅಂದ್‌ದ್ ಪನ್ತ್ಂಡ್ ಪನ್ಪಿನೆನ್ ಕೇಂಡ್ದರತ್ತ?

44ಆಂಡ ಯಾನ್ ನಿಕ್ಲೆಗ್ ಪನ್ಪಿನಿ ದಾನೆಂದ್ಂಡ ನಿಕ್ಲೆನ ಪಗೆನಾಕುಲೆನ್ ಪ್ರೀತಿ ಮಲ್ಪುಲೆ. ನಿಕ್ಲೆಗ್ ಭಂಗ ಕೊರ್ಪಿನಾಕುಲೆಗ್ ಪ್ರಾರ್ಥನೆ ಮಲ್ಪುಲೆ.

45ಇಂಚ ಮಲ್ತರ್ಡ ನಿಕುಲು ಪರಲೋಕೊಡುಪ್ಪು ನಿಕ್ಲೆ ಅಮ್ಮೆರೆಗ್ ಜೋಕುಲಾಪರ್. ಆಯೆ ಪಡ್ಕೆಂತಿನಾಕ್ಲೆ ಮಿತ್ತ್‌ಲಾ ಎಡ್ಡೆಂತಿನಾಕ್ಲೆ ಮಿತ್ತ್‌ಲಾ ತನ ಸೂರ್ಯೆ ಮೂಡುಲೆಕ್ಕ ಮಲ್ಪುವೆ. ನೀತಿದಾಕುಲೆ ಮಿತ್ತ್‌ಲಾ ನೀತಿಕೆಟ್ಟಿನಾಕುಲೆ ಮಿತ್ತ್‌ಲಾ ಬರ್ಸೊನು ಬರ್ಪಾವೆ.

46ನಿಕ್ಲೆಗ್ ಪ್ರೀತಿ ತೋಜಾವುನಾಕುಲೆನೇ ನಿಕುಲು ಪ್ರೀತಿ ಮಲ್ತರ್ಡ ಐಟ್ಟ್ ದಾನೆ ಪ್ರಯೋಜನ ಉಂಡು? ಸುಂಕದಾಕುಲುಲಾ ಅಂಚೆನೇ ಮಲ್ಪುವೆರತ್ತಾ?

47ನಿಕ್ಲೆನ ಸಹೋದ್ರೆರೆಗ್ ಮಾತ್ರ ಮರ್ಯಾದಿ ಕೊರಿಯರ್ಡ ದಾದಾಂಡಲಾ ವಿಶೇಷ ಮಲ್ತಿಲೆಕ್ಕ ಆಂಡ? ಪಿದಯಿದ ಜನೊಕುಲುಲಾ ಅಂಚೆನೇ ಮಲ್ಪುವೆರತ್ತಾ?

48ಅಂಚಾಯಿನೆಡ್ದ್ ಪರಲೋಕೊಡುಪ್ಪು ನಿಕ್ಲೆನ ಅಮ್ಮೆ ದೋಷದಾಂತಿನಾಯೆ ಆದುಪ್ಪುಲೆಕ್ಕ ನಿಕುಲುಲಾ ದೋಷದಾಂತಿನಾಕುಲು ಆದುಪ್ಪುಲೆ.

← Chapter 4 Jump to: Chapter 6 →