1 Timothy 6

Tswana (BAEBELE e e Boitshepo) 1992

← Chapter 5 Jump to:

1Botlhe ba e leng batlhanka ba ba mo jokweng, a ba kaye beng ba bone go tshwanelwa ke tlotlo yotlhe, gore leina la Modimo le se ka la tlhapadiwa, le thuto.

2Le ba ba nang le beng ba ba dumelang a ba se tlhoke go ba tlotla, ka gobo e le ba ga bone mo tumelong; bogolo ba ba direle, ka gobo bone ba ba direlwang e le badumedi le baratwi. O rute, o bo o laye ka dilo tse.

3Fa motho mongwe a ruta ka thuto e sele, a sa dumalane le mafoko a a tshedileng, e bong mafoko a Morena wa rona Jesu Keresete, le thuto e e leng ka fa poifomodimong;

4o ikgogomositse, a sa itse sepe, o kgweleantswe ke dipotso le dikganetsanyo tsa mafoko, tse go tswang bopelotshetlha mo go tsone, le kgang le dikgalo le dipateletso,

5le ditatalalano tsa batho ba ba bodileng mogopolo, le ba ba latlhegetsweng ke boammaaruri, ba ba itlhomang poifomodimo e le mokgwa wa papadi.

6Poifomodimo e e nang le pelo e e ritibetseng ke papadi e kgolo;

7gonne ga re a ka ra tla le sepe mo lefatsheng, le gone ga re ka ke ra tswa le sepe;

8e re fa re na le dijo le diaparo, re tlaa ritibatsa pelo mo go tsone.

9Ba ba eletsang go huma ba tle ba wele mo thaelong, le mo serung le mo dithatong di le dintsi tsa bosilo, le tse di senyang, tse di nwetseng batho mo tshenyegong le mo tatlhegong.

10Gonne go rata madi ke modi wa masula mangwe le mangwe otlhe, ke mo e rileng bangwe ba go gwalalela, ba timelwa ke tumelo, mme ba iphololeditse ka mahutsana a le mantsi.

11Wena monna wa Modimo tshaba dilo tse; o latele tshiamo; le poifomodimo le tumelo, le lorato, le bopelotelele le bopelonolo.

12Tlhabana ntwa e e molemo ya tumelo, o tshware botshelo jo bo sa khutleng, jo o bo bileditsweng, wa ipolela ka boipolelo jo bo molemo mo ponong ya basupi ba le bantsi.

13Ke a go laya mo ponong ya Modimo o o tshedisang dilo tsotlhe, le ya ga Keresete Jesu, yo e rileng a le fa pele ga Ponto Pilato a supa boipolelo jo bo molemo.

14Ka re, o tshegetse taolo e ka mo go se nang selabe, le ka mo go se nang mokgobo, go ya go fitlha mo go bonatshegeng ga Morena wa rona Jesu Keresete;

15mo o tlaa go bonatsang mo metlheng ya gone, e bong ene yo e leng Mothata yo o bakwang le yo o esi, Kgosi ya dikgosi le Morena wa barena;

16yo o nang le bosasweng a le esi, a bile a agile mo leseding le le sa ka keng la atamelwa; yo go seng motho ope yo o kileng a mmona, le gone ope a sa ka ke a mmona; yo tlotlo le thata tse di sa yeng kae di ka kang, tsa nna kwa go ene. Amen.

17O laye ba ba humileng mo motlheng ono, gore ba se ka ba ipegela godimo, le fa e le go solofela mo bosenang tlhomamo jwa khumo, fa e se mo Modimong fela, o o re nayang dilo tsotlhe ka letlotlo, gore re di je monate.

18O bo o ba laye gore ba dire molemo, ba hume ditiro tse di molemo, ba iketleeletse go aba, ba itumelele go abalana;

19ba ntse ba ipeelela motlha o o tlang motheo o o molemo, gore ba tle ba tshware botshelo jo e leng botshelo ruri.

20Timotheo, a ko o dibele sone se o se neetsweng, o ntse o tlhokomologile dipalabalo tsa boithamako, le dikganetsanyo tsa e e bidiwang kitso, mme e se yone;

21tse bangwe ba e rileng ka ba di dumetse ba fositse ka ga tumelo. Tshegofatso e nne le lona.

← Chapter 5 Jump to: