Judges 3

Tswana (BAEBELE e e Boitshepo) 1992

← Chapter 2 Jump to: Chapter 4 →

1Jaana merafe e Jehofa o ne a e tlogela, go leka Baiseraele ka yone ke e, e bong botlhe ba ba se kang ba itse dintwa tsotlhe tsa Kanana;

2ya bo e le go re, dikokomana tsa bana ba Iseraele, di tle di itse, gore go tle go ba rute ntwa, segolo bone ba ba sa itseng sepe ka ga yone gale;

3ke go re, barena ba batlhano ba Bafilisitia, le Bakanana botlhe, le Basitone, le Bahife ba ba agileng mo thabeng ya Lebanone, go tswa Baale-heremone go ya botsenong jwa Hamathe.

4Go ne go twe go tlaa lekwa Iseraele ka bone, gore go lemogwe boo ba tla reetsa ditaolo tsa ga Jehofa tse o di laoletseng borraabo ka Moše.

5Bana ba Iseraele ba aga mo gare ga Bakanana, le Bahite, le Baamore, le Baperise, le Bahife, le Bajebuse.

6Ba tsaya bomorwadia bone go nna basadi ba bone, ba tseisa bomorwa bone bomorwadia bone, ba direla medimo ya bone.

7Bana ba Iseraele ba dira se se bosula mo matlhong a ga Jehofa, ba lebala Jehofa Modimo wa bone, ba direla boBaale le Medimako.

8Ke gone ka moo bogale jwa ga Jehofa jwa tukela Iseraele, mme a ba rekisetsa mo go Kušane-rišathaime kgosi ya Mesopotamia. Bana ba Iseraele ba direla Kušane-rišathaime ka dinyaga tse di 8.

9E rile bana ba Iseraele ba goele kwa go Jehofa, Jehofa a tsosetsa bana ba Iseraele mogolodi, yo o ne a ba golola, e bong Otheniele morwa Kenase, monnaa Kalebe.

10Mowa wa ga Jehofa wa tla mo go ene, mme a atlhola Iseraele; a bolola ntwa, mme Jehofa a tsenya Kušane-risathaime kgosi ya Mesopotamia mo seatleng sa gagwe; mme seatla sa gagwe sa fenya Kušane-rišathaime.

11Mme lefatshe la bona boikhutso ka dinyaga di le 40. Otheniele morwa Kenase a swa.

12Bana ba Iseraele ba dira se se bosula mo matlhong a ga Jehofa gape; mme Egelone kgosi ya Moabe, Jehofa a mo thatafaletsa Baiseraele, ka ba ne ba dirile se se bosula mo matlhong a ga Jehofa.

13A iphuthela kwa go ene bana ba ga Amone, le ba ga Amaleke; mme a ya a kgemetha Iseraele, mme ba rua motse wa makolane.

14Bana ba Iseraele ba direla Egelone kgosi ya Moabe ka dinyaga di le 18.

15Mme e rile bana ba Iseraele ba goela kwa go Jehofa, Jehofa a ba tsosetsa mogolodi, ebong Ehute morwa Gera, wa Mobenjamine, monna yo o ntsogotlho; bana ba Iseraele ba isa ka ene mpho kwa go Egelone kgosi ya Moabe.

16Ehute a itirela thipa e e magale mabedi, e e boleele jwa letsogo; a e ikgatlhelela ka fa seropeng sa ka fa tsogong le legolo, ka fa tlase ga diaparo tsa gagwe.

17A ya go naya Egelone kgosi ya Moabe mpho; jaana Egelone ya bo e le motho yo o nonneng bobe.

18E rile a sena go wetsa go mo naya mpho, a tsamaisa batho ba ba neng ba rwele mpho.

19Mme ene a boa kwa metlobong ya maje e e fa Gilegale, a re: “Kgosi, ke na le lefoko le ke le go sebelang.” Kgosi ya re: “Didimalang.” Botlhe ba ba emeng fa go yone ba tswa.

20Ehute a tla mo go ene; mme a bo a dutse a le esi mo ntlonyaneng ya boiphokiso. Ehute a re: “Ke na le taetso go wena kgosi, e tswa Modimong.” Mme a nanoga mo setulong sa gagwe.

21Ehute a ntsha letsogo la molema, a tsaya thipa e e ka fa seropeng sa ka fa letsogong le legolo, a e sogotlhetsa mo mpeng ya gagwe.

22Le yone theko ya tsena le thipa; mme mahura a betologela thipa, gonne ga a ka a somola thipa mo mpeng ya gagwe; ya phunyeletsa ka kwa morago.

23Foo Ehute a tswela kwa mokatakong, a mo tswalela mo teng ga ntlwana, a kopela ditswalo.

24Jaana e rile a sena go tswa batlhanka ba gagwe ba tla; ba leba, mme bona, ba fitlhela ditswalo tsa ntlwana di kopetswe, ba ithaya ba re: “Kooteng o ipipile dinao mo ntlwaneng ya gagwe ya boiphokiso.”

25Ba diega ba ba ba tla ba tlhajwa ke ditlhong; ba fitlhela a sa bule ditswalo tsa ntlwana; ke gone ka moo ba tsaya sekopololo ba bula; ba fitlhela morena wa bone a wetse fa fatshe a sule.

26E ne ya re ka ba diegile Ehute a falola, a fapaanya metlobo ya maje, a falolela kwa Seire.

27Ga dirala e rile a sena go fitlha, a letsa lonaka mo lefatsheng la makgabana la Eferaime, mme bana ba Iseraele ba fologa nae mo lefatsheng la makgabana, ene a ba eteletse pele.

28A ba raya a re: “Ntshalang morago, gonne Jehofa o tsentse baba ba lona, e bong Bamoabe, mo seatleng sa lona.” Ba fologa ba mo setse morago, ba kgabaganya, ba gapela Bamoabe matsibogo a Joretane, mme ba se ka ba leseletsa motho ope go kgabaganya noka.

29Ba kgemetha Bamoabe ka lobaka loo, e ka ne e le batho ba le 10 000, monna mongwe le mongwe yo o dinama di dikgoka, le monna mongwe le mongwe yo o pelokgale; ga go a ka ga falola monna ope.

30Jalo Moabe a fenyediwa ka tsatsi leo mo seatleng sa Iseraele, mme lefatshe la bona boikhutso ka dinyaga di le 40.

31Morago ga gagwe ga nna Shamegare morwa Anathe, yo o ne a bolaya banna ba Bafilisitia ba le 600 ka lore lo lo kgweetsang dikgomo; le ene a boloka Iseraele.

← Chapter 2 Jump to: Chapter 4 →