2 Chronicles 11

Tsonga Xitsonga (Bibele) 1929

← Chapter 10 Jump to: Chapter 12 →

1Rhobuwamu, kuteloko a fikile eYerusalema, a hlengeleta yindlu ya Yuda ni ya Benjamini, va ri vavanuna lava hlawuriweke va 180 000, lava humaka nyimpi; ku ya lwa ni Vaisraele, va ta tlherisela Rhobuwamu vuhosi.

2Kutani rito ra Yehovha ri ta eka Xemaya, munhu wa Xikwembu, ri ku:

3“Byela Rhobuwamu, n'wana Solomoni, hosi ya Yuda ni Vaisraele hinkwavo lava nga etikweni ra Yuda ni ra Benjamini, u ku eka vona:

4Yehovha u vurisa sweswo, a ku: ‘Mi nga tshuki mi khandziya ku ya lwa ni vamakwenu; tlhelani un'wana ni un'wana endlwini ya yena, hikuva mhaka leyi, yi huma eka mina.’ ” Kutani va yingisa marito ya Yehovha, va tlhela, va tshika ku ya lwa na Yerobuwamu.

5Rhobuwamu a tshama eYerusalema, kutani a aka miti ya makhokholo etikweni ra Yuda.

6A aka Betlehema, na Etamu, na Tekowa,

7na Beta-Suru, na Soko, na Adulama,

8na Gati, na Marexa, na Zifi,

9na Adorayimi, na Lakixi, na Azeka,

10na Sora, na Ayaloni, na Hebroni; miti leyi a yi ri etikweni ra Yuda ni ra Benjamini; miti ya makhokholo.

11A tiyisa miti leyi, a veka kona tindhuna, kutani a hlengeleta kona swakudya, ni mafurha, ni vhinyo;

12a veka emutini wun'wana ni wun'wana switlhangu, ni mafumu, a tiyisa swinene miti leyi. Hikuva va Yuda ni va Benjamini a va ri va yena.

13Vaprista ni Valevhi lava ngi va ri etikweni ra Israele hinkwaro, va sukela miti ya vona ku ya tshama na yena;

14Valevhi va tshika matikwana ya vona ni rifuwo ra vona, va ta etikweni ra Yuda na Yerusalema, hikuva Yerobuwamu ni vana va yena a va va humesile emitirhweni ya vona ya vuprista bya Yehovha;

15a tivekela vaprista va switsunga ni va swiphongo, ni va marhole, leswi a swi endleke.

16Valevhi va landziwa hi vanhu hinkwavo va tinxaka hinkwato ta Israele lava ngi va rhandza ku lava Yehovha, Xikwembu xa Israele; vona va ta eYerusalema, ku humesela Yehovha, Xikwembu xa vatata wa vona, magandzelo.

17Sweswo, va tiyisa vuhosi bya Yuda, va nyika Rhobuwamu, n'wana Solomoni, matimba, hi malembe manharhu, hikuva va famba endleleni ya Davhida ni ya Solomoni hi malembe manharhu.

18Rhobuwamu a teka Mahalata, n'wana Yerimoto, n'wana Davhida, ni wa Abihayili, n'wana wa wansati wa Eliyabu, n'wana Yese.

19A n'wi velekela vana va xinuna, a ri Yewuxi, na Xemariya na Zahama.

20Endzhaku ka yena a teka Maaka, n'wana Abixalomu; yena a n'wi velekela Abiya, na Atayi, na Ziza na Xelomiti.

21Rhobuwamu a a rhandza Maaka, n'wana Abixalomu, ku tlurisa vasati va yena hinkwavo ni vasati lavatsongo; hikuva a a tekile vasati va 18 ni vasati lavatsongo va 60; a veleka vana va xinuna va 28, ni vana va xisati va 60.

22Rhobuwamu a veka Abiya, n'wana Maaka ku va hosi exikarhi ka vamakwavo hikuva a a rhandza ku n'wi endla hosi.

23A endla hi vutlhari, hikuva a hangalasa vana va yena va xinuna ematlhelweni hinkwawo ya Yuda ni ya Benjamini, ni le mitini hinkwayo ya makhokholo, a va nyika swakudya leswotala, kutani a va lavelela vasati lavo tala.

← Chapter 10 Jump to: Chapter 12 →