2 Chronicles 22

Tsonga Xitsonga (Bibele) 1929

← Chapter 21 Jump to: Chapter 23 →

1Vaaki va Yerusalema, va veka Ahaziya, n'wana wa yena wa xigumandzeni a va hosi ematshan'weni ya yena; hikuva vandla leri ngheneke ni Maarabu emixaxeni, ri dlayile vana lavakulu hinkwavo va hosi. Kutani Ahaziya, n'wana Yehoramu, hosi ya Yuda, a sungula ku fuma.

2Ahaziya a a ri wa malembe ya 42 loko a sungula ku fuma, kutani a fuma lembe rin'we eYerusalema, vito ra mana wa yena a a ri Ataliya, n'wana Omri.

3Na yena a famba etindleleni ta yindlu ya Akabu, hikuva mana wa yena, la ngi a ri wa huvo ya yena a n'wi hlohlotela ku endla leswo biha.

4A endla leswi biheke emahlweni ka Yehovha, hilaha va yindlu ya Akabu va endleke hakona; hikuva valavo a va ri va huvo ya yena endzhaku ka rifu ra tata wa yena, ku n'wi lovisa.

5Hi ku susumetiwa hi vona, a suka a famba na Yoramu, n'wana Akabu, hosi ya Israele, va huma nyimpi ku ya lwa na Hazaele, hosi ya Siriya, eRamoto wa Giliyadi; kutani Vasiriya va tlhava Yoramu,

6a tlhela a muka eYizriele ku ya tshungula timbanga leti va n'wi tlhaveke tona eRhama loko a lwa na Hazaele, hosi ya Siriya. Ahaziya, n'wana Yoramu, hosi ya Yuda, a ngirimela eYizriele ku ya vona Yoramu, n'wana Akabu, hikuva a a vabya.

7Hi ku rhandza ka Xikwembu, Ahaziya a lovisiwa hi leswi a teke eka Yoramu; hikuva, kuteloko a fikile, a huma nyimpi na Yoramu ku ya lwa na Yehu, n'wana Nimxi, loyi Yehovha a n'wi hlawuleke ku heta yindlu ya Akabu.

8Kutani, kakuloko Yehu a avanyisa yindlu ya Akabu, a kuma tindhuna ta Yuda, ni vana va vamakwavo va Ahaziya lava tirhelaka Ahaziya, a va dlaya.

9A rhuma vanhu, va ya lava Ahaziya, kutani va n'wi khoma eSamariya, laha a tumbeleke kona; va n'wi tisa eka Yehu, kutani va n'wi dlaya. Kambe va n'wi lahla, hikuva va ku: “I n'wana wa Yoxafati, la laveke Yehovha hi mbilu hinkwayo ya yena.” Kutani a ka ha salanga munhu wa yindlu ya Ahaziya la tivaka ku fuma.

10Ataliya, mana wa Ahaziya, kuteloko a vonile leswaku n'wana wa yena u file, a pfuka, a heta rixaka hinkwaro ra yindlu ya tihosi ta Yuda.

11Kambe Yoxabati, n'wana wa wansati wa hosi, a teka Yowasi, n'wana Ahaziya, a n'wi susa exikarhi ka vana va hosi loko va va dlaya: kutani a n'wi nghenisa, yena ni muan'wisi wa yena, endlwini ya masangu. Hi mukhuva wolowo, Yoxabati, n'wana wa hosi Yehoramu, nsati wa Yehoyada muprista, a n'wi fihla emahlweni ka Ataliya, hikuva a a ri makwa Ahaziya, kutani Ataliya a nga n'wi dlayanga.

12Sweswo a fihliwa ekusuhi na vona endlwini ya Xikwembu, hi malembe ya ntlhanu na rin'we; kambe Ataliya a a fuma etikweni ra Yuda.

← Chapter 21 Jump to: Chapter 23 →