2 Chronicles 15

Tsonga Xitsonga (Bibele) 1929

← Chapter 14 Jump to: Chapter 16 →

1Moya wa Xikwembu wu va ehenhla ka Azariya, n'wana Odede,

2kutani a humelela emahlweni ka Asa, a ku eka yena: “Wee Asa, ni va Yuda hinkwenu, ni va Benjamini, ndzi yingiseni! Yehovha u na n'wina loko mi ri na yena; kungakuloko mi n'wi lava, u ta pfumela ku kumiwa hi n'wina; kambe loko mi n'wi tshika, u ta mi tshika.

3Enkarhini lowo leha, Israele u pfumarile Xikwembu lexi nga xona, ni muprista la dyondzisaka, ni nawu;

4kambe loko va ri eku chaveni, va hundzulukele eka Yehovha, Xikwembu xa Israele, va n'wi lavile, kutani va n'wi kumile.

5Emikarhini yoleyo vafambi a va nga ri na ku rhula, hikuva mikitsikitsi a yi tele exikarhi ka vaaki hinkwavo va matiko,

6tiko rin'wana ri pfukela tiko rin'wana, ni muti wun'wana wu pfukela muti wun'wana, hikuva Xikwembu xi va pfilunganya hi ku chava ka tinxakaxaka.

7Loko mi ri n'wina, tiyani timbilu; mavoko ya n'wina ma nga tshuki ma tsana, hikuva ntirho wa n'wina wu ta va ni hakelo.”

8Asa, kuteloko a yingisile marito lawa ni ku profeta ka Odede, muprofeta, a tiya mbilu, kutani a susa manyala ya tiko hinkwaro ra Yuda ni ra Benjamini ni ya miti leyi a yi tekeke entshaveni ya Efrayimi, a pfuxa ni alitari ya Yehovha leyi ngi yi ri emahlweni ka nyangwa ya Yehovha.

9Kutani a hlengeleta vanhu hinkwavo va Yuda, ni va Benjamini, ni va Efrayimi, ni va Manase, ni va Simiyoni lava akeke exikarhi ka vona; hikuva Vaisraele lavo tala a va tinyiketile eka yena hi ku va va vona leswaku Yehovha, Xikwembu xa yena, a a ri na yena.

10Va hlengeletana eYerusalema, hi n'hweti ya vunharhu ya lembe ra khume na ntlhanu ra ku fuma ka Asa.

11Siku rolero, va humesela Yehovha magandzelo lama humaka eka swifuwo leswi va swi tiseke, ti ri tihomu ta 700, ni tinyimpfu ta 7 000.

12Kutani va tiboha ku lava Yehovha, Xikwembu xa vatata wa vona, hi timbilu hinkwato ta vona ni mimoya hinkwayo ya vona;

13kutani mani ni mani la nga rhandziki ku lava Yehovha, Xikwembu xa Israele, a a fanele ku dlawa, hambi a ri lontsongo, hambi a ri lonkulu, hambi a ri wanuna, hambi a ri wansati.

14Kutani va tiboha eka Yehovha hi ku hlambanya hi rito lerikulu, ni ku huwelela ka ku tsaka, ni ku pfuma ka tinanga ni ka timhalamhala.

15Hinkwavo va Yuda va tsakela ku hlambanya loku, hikuva a va hlambanyile hi timbilu hinkwato ta vona, kutani va lavile Yehovha hi ku rhandza ka vona, kutani va n'wi kumile; kutani Yehovha u va nyikile ku wisa ematlhelweni hinkwawo.

16Hambi a ri Maaka, mana wa yena, hosi Asa a n'wi humesa evuhosini bya yena, hikuva a endlele Axera xifaniso; Asa a mbundzuxa xifaniso xa yena, a xi fayetela, a xi hisa exinambyaneni xa Kedroni.

17Kambe switsunga a swi susiwanga etikweni ra Israele; hambiswiritano, mbilu ya Asa a yi tengile hi masiku hinkwawo ya yena,

18a tisa endlwini ya Xikwembu, swilo leswi hlawuriweke hi tata wa yena na yena; yi ri silivhere, ni nsuku, ni mikambana.

19A ku vanga na nyimpi ku fikela lembe ra 35 ra ku fuma ka Asa.

← Chapter 14 Jump to: Chapter 16 →