2 Chronicles 3

Tsonga Xitsonga (Bibele) 1929

← Chapter 2 Jump to: Chapter 4 →

1Solomoni a sungula ku aka yindlu ya Yehovha eYerusalema, entshaveni ya Moriya, laha Yehovha a humeleleke eka Davhida, tata wa yena, endhawini leyi Davhida a yi lunghiseke exivuyeni xa Orinani, wa ka Yebusi.

2A sungula ku aka hi siku ra vumbirhi ra n'hweti ya vumbirhi ya lembe ra vumune ra ku fuma ka yena.

3Hi wona mpimo wa masungulo lawa Solomoni a akeleke yindlu ya Xikwembu ehenhla ka wona: ku leha ka wona, hi mpimo wa khale, a swi ri swisungunhu swa 60, ni ku anama ka wona, swisungunhu swa 20.

4Nyangwa a yi ri emahlweni ka yindlu, ku leha ka yona a swi ri swisungunhu swa 20, ku ringana ni ku anama ka yindlu; ku tlakuka ka yona a swi ri swisungunhu swa 120; a yi nameka endzeni hi nsuku lowo saseka.

5A fulela yindlu leyikulu hi mirhi ya kipresi kutani a yi nameka hi nsuku lowunene, a wu sasekisa hi micindzu, ni tiketananyana.

6A nameka yindlu hi maribye ya risima ku yi sasekisa; nsuku a wu ri nsuku wa Paravhiyami.

7Kutani a nameka yindlu hi nsuku timhandze, ni mivundzu, ni khumbi ni timbanti ta yona, a vatla ni tikerubu ematlhelweni, ekhumbini.

8A aka ni yindlu ya xikwetsimisiso; ku leha ka yona ku ringana ni ku anama ka yindlu, a swi ri swisungunhu swa 20, ni ku anama ka yona, swisungunhu swa 20; a yi nameka hi nsuku lowunene lowu ringanaka titalenta ta 600;

9ku tika ka swipikiri a ti ri tixikele ta 50 ta nsuku. Kutani a nameka hi nsuku makamara lawa tlakukeke.

10A endla endlwini ya xikwetsimisiso tikerubu timbirhi leti vatliweke, kutani va ti nameka hi nsuku.

11Timpapa ta tikerubu a ti ri ta swisungunhu swa 20 eku leheni: ripapa ra yin'wana ri fika ekhumbini ra yindlu; ku leha ka rona a swi ri swisungunhu swa ntlhanu, ni ripapa rin'wana ra swisungunhu swa ntlhanu ri fika eripapeni ra kerubu yin'wana,

12ripapa ra kerubu yin'wana, ra swisungunhu swa ntlhanu, ri fika ekhumbini ra yindlu, ni ripapa rin'wana, ra swisungunhu swa ntlhanu, ri hlangana ni ripapa ra kerubu yin'wana.

13Timpapa leti tshambulutiweke ta tikerubu leti, a ti endla swisungunhu swa 20. A ti yimile hi milenge ya tona, mimombo ya tona yi languta yindlu.

14A endla ni xisirhelo hi xivunguvungu, ni scarlet ni crimson, ni ntsembyana lowo saseka, kutani a tsala tikerubu ehenhla ka xona.

15Emahlweni ka yindlu, a endla timhandze timbirhi leti ngi ti ri ta swisungunhu swa 35 eku leheni; swirhendzevutana leswi ngi swi ri ehenhla ka tona, a swi ri swa swisungunhu swa ntlhanu.

16A endlela xikwetsimisiso tiketananyana, a ti veka ni le yinhleni ya timhandze; a endla ni magirenada ya dzana etiketaneni.

17Kutani a yimisa timhandze emahlweni ka yindlu, yin'wana hitlhelo ra xinene, yin'wana hitlhelo ra ximatsi; a thya leya xinene Yakini, ni leya ximatsi Bowazi.

← Chapter 2 Jump to: Chapter 4 →