1 Thessalonians 1

Umbundu Bible (Embimbiliya - Bíblia Sagrada em Umbundu)

Jump to: Chapter 2 →

1Ame ndi Paulu, la Siluano, kuenda Timoteo, Tu sonehela ekongelo lia Kristu lia va Tesalonike li kasi vu Suku Isia kuenda vu Ñala Yesu Kristu. Kokuene ku kale ocali lombembua.

2Ene vosi tu vu panduila ku Suku olonjanja viosi, kuenje tu vu wivaluka volohutililo vietu.

3Kovaso a Suku Isia tu ivaloka upange wene wekolelo, lovilinga viene viocisola, kuenda ndomo elavoko vu kasi lalio vu Ñala yetu Yesu Kristu vu li kuetele epandi.

4A vamanjetu, wa soliwi la Suku, tua kũlĩha okuti eye wo noli.

5Momo ondaka yiwa tuo kundili ka yeyile kokuene loku popiwa lomẽla lika, puãi yeyavo longusu, le Espiritu Sandu, kuenda lekolelo lia lua. Ene muẽle wa kũlĩhi ndomo tua tuwile eci tua kala pokati kene.

6Kuenje wa tu setukuli, etu la Ñala, momo wa kali lohali ya lua eci wa tambuli ondaka lesanju lio wihiwi le Espiritu Sandu.

7Oco wa eci ongangu kuava vosi va tava vo Makedonia lo va Akaia.

8Ondaka ya Ñala, oku fetika lene, ka ya yevalele lika ko Makedonia lo ka Akaia, puãi etavo liene ku Suku lia yevala kuoha, okuti etu ka tu sukila oku popia cimue.

9Momo oyo muẽle va sapula ndeci wa tu tambuli lonjolela, kuenda ndeci wa si oviteka. Wa vi sili okuti vu pongolokela ku Suku, loku vumba Suku yocili o kasi lomuenyo,

10kuenda oku lavoka Omõlaye o tunda kilu, una Suku a pindula kuava va fa, okuti Yesu, u o tu popela konyeño yi laika oku iya.

Jump to: Chapter 2 →