1 Thessalonians 4

Umbundu Bible (Embimbiliya - Bíblia Sagrada em Umbundu)

← Chapter 3 Jump to: Chapter 5 →

1Oku sulila, a vamanji, tu vu vetiya loku vu livondela vu Ñala Yesu okuti, ndeci wa yevi kokuetu ndomo ca sunguluka oku endaenda loku sanjuisa Suku, okuti, ndeci muẽle vu kasi loku linga, haico wamamiko oku lingainga.

2Momo wa kũlĩhi alungulo tua wihi vonduko ya Ñala Yesu.

3Momo ocipango ca Suku ceci okuti, vu kola. Kuenje okukola ku kisika oku yuvula ukahonga,

4okuti omunu omunu pokati kene o kũlĩha oku kala letimba liaye loku kola lesumbilo,

5ha lowuya wukahokoloko nda vakualofeka ka va kũlĩhile Suku.

6Ndu kisikivo okuti lomue o lueya kuenje o liaña ukuavo kovina viaco, momo Ñala eye ufetuluinyi wovina evi viosi, ndeci tuo sapuili ale oku vu lungula.

7Momo Suku ka tu kovongelele evĩho, te oku kola.

8Oco, wosi o pembula elungulo eli ka pembuile omunu te Suku u wo wihi Espiritu liaye li kola.

9Puãi, kondaka yoku lisola pokati nda vamanji, ene ka vu sukila okuti umue u soneheli, momo wa longisiwi la Suku oku lisola pokati.

10Oku popia ocili, vu sole muẽle vamanji vosi va kasi kuoha ko Makedonia. Puãi a vamanji, tu vu vetiya, tuti, Kolisiko locisola caco

11loku kala lovimuenyo vie yuka umbombe. Tu vu vetiyavo okuti vu tata ovina viene, loku talavaya lovaka ene muẽle, ndeci tuo lunguli,

12okuti, eci ava ka va tavele va mola ovimuenyo viene, vo sumbili, kuenje vu litekula ene muẽle, oku liyeka ku umue hacoko.

13A vamanji, ka tu yongola okuti vu kala lonumbi yava va pekela vokufa, okuti vu sumua ndomanu vakuavo ka va kuete elavoko.

14Omo tu kolela okuti Yesu wa fa kuenje wa pinduka, oco ava va pekela vu Yesu, Suku o va nenela kumuamue laye.

15Momo tu vu sapuila londaka ya Ñala okuti, etu tu kala lomuenyo toke ketukuluko lia Ñala ka tu tetekela ava va pekela okufa.

16Momo Ñala, eye muẽle, o tunda kilu levilikiyo, londaka yungelo unene, kuenda lolumbeta lua Suku. Kuenje ava va fa vu Kristu va pinduka tete.

17Noke etu tu kasi lomuenyo, haetu tua siala konyima, tu ambatiwa kumuamue lavo valende oku ñualehela la Ñala vilu. Oco tu kala hũ la Ñala.

18Oco likolisi pokati lolondaka evi.

← Chapter 3 Jump to: Chapter 5 →