1 Thessalonians 2

Umbundu Bible (Embimbiliya - Bíblia Sagrada em Umbundu)

← Chapter 1 Jump to: Chapter 3 →

1Momo, a vamanji, wa kũlĩhi okuti epasulo lietu kokuene ka lia kaile liesanda.

2Ndaño eteke tua tala ohali, kuenda tua fũkĩlisua vo Filipoi, ndeci wa kũlĩhi, haimo tua kuata utõi vu Suku yetu oku u sapuili ondaka yiwa ya Suku pokati kuyaki wa lua.

3Momo elungulo lietu haliesandako, pamue lievĩho, pamue lielimbi.

4Puãi, ndeci tua hanguiwa la Suku, omo a tu kundika oku longisa ondaka yiwa, haico tu vangula, haku sanjuisako omanu, puãi oku sanjuisa Suku u o setaeka ovitima vietu.

5Ndeci wa kũlĩhi, ka tua popele lombambe, pamue latutu a tuvika ocipululu. Suku ombangi.

6Ndaño, nda tua yonguile, nda tua tẽlele oku kisika esumbilo li sesamela ovapostolo va Kristu, haimo ka tua sandele oku pandiyiwa lomanu, ndaño lene, ndaño la vakuavo.

7Haimo, tuombokele pokati kene ndeci cilelamãla a lela omãla vaye muẽle.

8Oco, oku vu sola ciwa, tua sanjuka oku wihi ondaka yiwa ya Suku, puãi hayoko lika, lovimuenyo vietu le, omo wa soliwi letu.

9Momo, a vamanji, wa ivaluki ndomo tua sakalala muẽle lupange. Tua talavaya uteke lutanya okuti ka tu sakalaisa umue pokati kene osimbu tuo kundili ondaka yiwa ya Suku.

10Ndaño ene, ndaño Suku, vulombangi viovimuenyo vietu pokati kene wakuetavo, okuti tua kala omanu va kola, haivo va sunguluka, kuenda va pua eko.

11Vu ci ndeci tua kala lene okuti tua soka nda isia lomãla vaye muẽle. Tuo lunguli omunu omunu, loku u kolisi, loku u kundiki ocikundi

12coku endaenda ndeci ca sungulukila Suku, u wo kovongeli kusoma waye lo kulamba waye.

13Cikuavo tu ci pandowaila ku Suku ceci okuti, eci wa tambuli ondaka ya Suku, yina wa yevi kokuetu, wa yi tambuli ndomo yi kasi ocili okuti, handaka yomanuko, puãi ondaka ya Suku, haiyo yi talavaya vovitima viene, ene wakuetavo.

14Momo ene, a vamanji, wa lisoki lakongelo a Suku vu Kristu Yesu a kasi vo Yudea, momo ene wa fũkĩlisui la vakuafeka yene muẽle lovina ovo va fũkĩlisua lavio la va Yudea.

15Ovo va ipa Ñala Yesu lovaprofeto, kuenje etu va tu tundisa lohali. Va sumuisa Suku kuenje va patãla omanu vosi,

16omo va tu tateka oku longisa vakualofeka okuti va popelua. Poku ci linga, va suisapo akandu avo olonjanja viosi. Puãi onyeño ya Suku ya va iyilila olumue.

17Puãi etu, a vamanji, omo tua litepa lene okatembo kamue, oku litepa katimba, hakutimako, oco tua kaile longeva ya lua, kuenje tua setekele oku vu mola ocipala kocipala.

18Tua yonguile muẽle oku iya kokuene, ame ndi Paulu, olonjanja kolonjanja, puãi Satana wa tu tateka.

19Kovaso a Ñala yetu Yesu ketukuluko liaye, elavoko lietu nye, pamue esanju lietu, pamue ekolowa lietu lioku lipandiya? Siti ene?

20Momo ene vupandiyo lietu, haene vusanju lietu.

← Chapter 1 Jump to: Chapter 3 →