Lamentations 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Ḳhudáwand ne apne qahr meṉ duḳhtar i Siyyún ko kaisá bádal se chhipá diyá! Us ne Isráíl ke jamál ko ásmán se zamín par girá diyá, Aur apne qahr ke din apne páṉwoṉ kí chaukí ko yád na kiyá.

2Ḳhudáwand ne Ya‘qúb ke tamám ghar g̣árat kiye, aur rahm na kiyá; Us ne apne qahr meṉ duḳhtar i Yahúdáh ke tamám qil‘e girákar ḳhák meṉ milá diye; Us ne mamlukat aur us ke umará ko nápák ṭhahráyá.

3Us ne qahr i shadíd meṉ Isráíl ká síṉg bi’lkull káṭ ḍálá; Us ne dushman ke sámne se dahiná háth kheṉch liyá: Aur us ne shu‘lazan ág kí tarah, jo chároṉ taraf bhasam kartí hai, Ya‘qúb ko jalá diyá.

4Us ne dushman kí tarah kamán kheṉchí, muḳhálif kí taraf dahiná háth baṛháyá, Aur duḳhtar i Siyyún ke ḳhaime meṉ sab hasínoṉ ko qatl kiyá; Us ne apne qahr kí ág ko unḍel diyá.

5Ḳhudáwand dushman kí mánind ho gayá, wuh Isráíl ko nigal gayá; Wuh us ke tamám qasroṉ ko nigal gayá, us ne us ke qil‘e mismár kar diye: Aur us ne duḳhtar i Yahúdáh meṉ mátam o nauha firáwán kar diyá.

6Aur us ne apne maskan ko yaklaḳht tabáh kar diyá, goyá ḳhaima e bág̣ thá; Aur apne majma‘ ke makán ko barbád kar diyá: Ḳhudáwand ne muqaddas ‘ídoṉ aur sabtoṉ ko Siyyún se farámosh kará diyá, Aur apne qahr ke josh meṉ bádsháh aur káhin ko zalíl kiyá.

7Ḳhudáwand ne apne mazbah ko radd kiyá, us ne apne maqdis se nafrat kí, Us ke qasroṉ kí díwároṉ ko dushman ke halwále kar diyá: Unhoṉ ne Ḳhudáwand ke ghar meṉ aisá shor macháyá, jaisá ‘íd ke din.

8Ḳhudáwand ne duḳhtar i Siyyún kí fasíl giráne ká iráda kiyá hai; Us ne ḍorí ḍálí hai, aur barbád karne se dastbardár nahíṉ húá: Us ne fasíl aur díwár ko mag̣múm kiyá; wuh báham mátam kartí haiṉ.

9Us ke darwáze zamín meṉ g̣arq ho gaye; us ne us ke beṉḍoṉ ko toṛkar barbád kar diyá: Us ke bádsháh aur umará besharí‘at aqwám meṉ haiṉ; Us ke nabí bhí Ḳhudáwand kí taraf se koí royá nahíṉ dekhte.

10Duḳhtar i Siyyún ke buzurg ḳháknishín aur ḳhámosh haiṉ; Wuh apne siroṉ par ḳhák ḍálte; aur ṭáṭ oṛhte haiṉ: Yarúshalem kí kuṉwáriyáṉ zamín tak sarnigún hotí haiṉ.

11Merí áṉkheṉ rote rote dhundhlá gayíṉ, mere andar pech o táb hai, Merí duḳhtar i qaum kí barbádí ke bá‘is merá kaleja nikal áyá; Kyúṉki chhoṭe bachche aur shírḳhwár shahr ke kúchoṉ meṉ behosh haiṉ.

12Jab wuh shahr ke kúchoṉ meṉ zaḳhmíoṉ kí tarah g̣ash kháte, Aur jab apní máoṉ kí god meṉ jánbalab hote haiṉ, To un se kahte haiṉ, ki G̣alla aur mai kaháṉ hai?

13Ai duḳhtar i Yarúshalem, maiṉ tujhe kyá nasíhat karúṉ, aur kis se tashbíh dúṉ? Ai kuṉwárí duḳhtar i Siyyún, tujhe kis kí mánind jánkar tasallí dúṉ? Kyúṉki terá zaḳhm samundar sá baṛá hai: tujhe kaun shifá degá?

14Tere nabíoṉ ne tere liye bátil aur behúda royá dekhí; Aur terí badkirdárí záhir na kí, táki tujhe asírí se wápas láte: Balki tere liye jhúṭhe paig̣ám aur jiláwataní ká sámán dekhe.

15Sab áne jánewále tujh par táliyáṉ bajáte haiṉ; Wuh duḳhtar i Yarúshalem par suskárte aur sir hiláte haiṉ, Ki Kyá, yih wuhí shahr hai, jise log Kamál i husn aur Farhat i jahán kahte the?

16Tere sab dushmanoṉ ne tujh par muṉh pasárá hai; Wuh suskárte aur dáṉt píste haiṉ; wuh kahte haiṉ, Ham use nigal gaye; Beshakk ham isí din ke muntazir the; so á pahuṉchá, aur ham ne dekh liyá.

17Ḳhudáwand ne jo ṭháná, wuhí kiyá; us ne apne kalám ko, jo aiyám i qadím meṉ farmáyá thá, purá kiyá; Us ne girá diyá, aur rahm na kiyá: aur us ne dushman ko tujh par shádmán kiyá, Us ne tere muḳhálifoṉ ká síṉg baland kiyá.

18Un ke diloṉ ne Ḳhudáwand se faryád kí: Ai duḳhtar i Siyyún kí fasíl, shab o roz áṉsú nahr kí tarah járí raheṉ; Tú bi’lkull árám na le; terí áṉkh kí putlí árám na kare.

19Uṭh, rát ko pahroṉ ke shurú‘ meṉ faryád kar; Ḳhudáwand ke huzúr apná dil pání kí mánind unḍel de: Apne bachchoṉ kí zindagí ke liye, jo sab kúchoṉ meṉ bhúk se behosh paṛe haiṉ, Us ke huzúr meṉ dast i du‘á baland kar.

20Ai Ḳhudáwand, nazar kar, aur dekh, ki tú ne kis se yih kiyá! Kyá, ‘aurateṉ apne phal ya‘ní apne láḍle bachchoṉ ko kháeṉ? Kyá, káhin aur nabí Ḳhudáwand ke maqdis meṉ qatl kiye jáeṉ?

21Pír o jawán galiyoṉ meṉ ḳhák par paṛe haiṉ; Merí kuṉwáriyáṉ aur mere jawán talwár se qatl húe: Tú ne apne qahr ke din un ko qatl kiyá; tú ne un ko káṭ ḍálá, aur rahm na kiyá.

22Tú ne merí dahshat ko har taraf se goyá ‘íd ke din bulá liyá, Aur Ḳhudáwand ke qahr ke din na koí bachá, na báqí rahá: Jin ko maiṉ ne god meṉ khiláyá, aur pálá posá mere dushmanoṉ ne faná kar diyá.

← Chapter 1 Jump to: Chapter 3 →