Lamentations 4

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 3 Jump to: Chapter 5 →

1Soná kaisá beáb ho gayá! kundan kaisá badal gayá! Maqdis ke patthar tamám galí kúchoṉ meṉ paṛe haiṉ.

2Siyyún ke ‘azíz farzand, jo ḳhális sone kí mánind the, Kaise kumhár ke banáe húe bartanoṉ ke barábar ṭhahre!

3Gídaṛ bhí apní chhátiyoṉ se apne bachchoṉ ko dúdh piláte haiṉ; Lekin merí duḳhtar i qaum biyábání shutrmurg̣ kí mánind berahm hai.

4Shírḳhwár kí zabán piyás ke máre tálú se já lagí; Bachche roṭí máṉgte haiṉ, lekin un ko koí nahíṉ detá.

5Jo názparwarda the, galiyoṉ meṉ tabáhhál haiṉ: Jo bachpan se aṛgawánposh the, mazbaloṉ par paṛe haiṉ.

6Kyúṉki merí duḳhtar i qaum kí badkirdárí Sadúm ke gunáh se baṛhkar hai, Jo ek lamhe meṉ barbád húá, aur kisí ke háth us par daráz na húe.

7Us ke shurafá barf se ziyáda sáf aur dúdh se safed the, Un ke badan múṉge se ziyáda surḳh the, un kí jhalak nílam kí sí thí:

8Ab un ke chihre siyáhí se bhí kále haiṉ; wuh bázár meṉ pahcháne nahíṉ játe: Un ká chamṛá haḍḍiyoṉ se saṭá hai; wuh súkhkar laḳrí sá ho gayá.

9Talwár se qatl honewále bhúkoṉ marnewáloṉ se bihtar haiṉ; Kyúṉki yih khet ká hásil na milne se kuṛhkar halák hote haiṉ.

10Rahmdil ‘auratoṉ ke háthoṉ ne apne bachchoṉ ko pakáyá; Merí duḳhtar i qaum kí tabáhí meṉ wuhí un kí ḳhurák húe.

11Ḳhudáwand ne apne g̣azab ko anjám diyá; us ne apne qahr i shadíd ko názil kiyá; Aur us ne Siyyún meṉ ág bhaṛkáí, jo us kí bunyád ko chaṭ kar gayí.

12Rú e zamín ke bádsháh aur dunyá ke báshinde báwar nahíṉ karte the, Ki muḳhálif aur dushman Yarúshalem ke pháṭakoṉ se ghus áeṉge.

13Yih us ke nabíoṉ ke gunáhoṉ aur káhinoṉ kí badkirdárí kí wajh se húá, Jinhoṉ ne us meṉ sádiqoṉ ká ḳhún baháyá.

14Wuh andhoṉ kí tarah galiyoṉ meṉ bhaṭakte, aur ḳhún se álúda hote haiṉ, Aisá ki koí un ke libás ko bhí chhú nahíṉ saktá.

15Wuh un ko pukárkar kahte the, Dúr raho! nápák, dúr raho, dúr raho! chhúná mat! Jab wuh bhág játe aur áwára phirte, to log kahte the, Ab yih yaháṉ na raheṉge.

16Ḳhudáwand ke qahr ne un ko paráganda kiyá; ab wuh un par nazar nahíṉ karegá: Unhoṉ ne káhinoṉ kí ‘izzat na kí, aur buzurgoṉ ká liház na kiyá.

17Hamárí áṉkheṉ bátil madad ke intizár meṉ thak gayíṉ; Ham us qaum ká intizár karte rahe, jo bachá nahíṉ saktí thí.

18Unhoṉ ne hamáre páṉw aise báṉdh rakkhe haiṉ, ki ham báhar nahíṉ nikal sakte: Hamárá anjám nazdík hai, hamáre din púre ho gaye; hamárá waqt á pahuṉchá.

19Ham ko ragednewále ásmán ke ‘uqáboṉ se bhí tez haiṉ: Unhoṉ ne paháṛoṉ par hamárá píchhá kiyá; wuh biyábán meṉ hamárí ghát meṉ baiṭhe.

20Hamárí zindagí ká dam, Ḳhudáwand ká mamsúh, un ke gaṛhoṉ meṉ giriftár ho gayá; Jis kí bábat ham kahte the, ki Us ke saye tale ham qaumoṉ ke darmiyán zindagí basar kareṉge.

21Ai duḳhtar i Adom, jo ‘Úz kí sarzamín meṉ bastí hai, ḳhush o ḳhurram ho: Yih piyála tujh tak bhí pahuṉchegá; tú mast aur barahna ho jáegí.

22Ai duḳhtar i Siyyún, terí badkirdarí kí sazá tamám húí; Wuh tujhe phir asír karke nahíṉ le jáegá: Ai duḳhtar i Adom, wuh terí badkirdárí kí sazá degá; Wuh tere gunáh fásh kar degá.

← Chapter 3 Jump to: Chapter 5 →