Lamentations 5

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 4 Jump to:

1Ai Ḳhudáwand, jo kuchh ham par guzrá use yád kar; Nazar kar aur hamárí ruswáí ko dekh.

2Hamárí mírás ajnabíoṉ ke hawále kí gayí, Hamáre ghar begánoṉ ne le liye.

3Ham yatím haiṉ, hamáre báp nahíṉ, Hamárí máeṉ bewáoṉ kí mánind haiṉ.

4Ham ne apná pání mol lekar piyá; Apní lakṛí bhí ham ne dám dekar lí.

5Ham ko regednewále hamáre sir par haiṉ; Ham thake háre, aur beárám haiṉ.

6Ham ne Misríoṉ aur Asúríoṉ kí itá‘at qubúl kí, Táki roṭí se ser aur ásúda hoṉ.

7Hamáre bápdádá gunáh karke chal base, Aur ham un kí badkirdárí kí sazá pá rahe haiṉ.

8G̣ulám ham par hukmrání karte haiṉ; Un ke háth se chhuṛánewálá koí nahíṉ.

9Sahránishínoṉ kí talwár ke bá‘is, Ham ján par khelkar roṭí hásil karte haiṉ.

10Qaht kí jhulsánewálí ág ke bá‘is, Hamárá chamṛá tanúr kí mánind siyáh ho gayá hai.

11Unhoṉ ne Siyyún meṉ ‘auratoṉ ko behurmat kiyá, Aur Yahúdáh ke shahroṉ meṉ kuṉwárí laṛkiyoṉ ko.

12Umará ko un ke háthoṉ se laṭká diyá; Buzurgoṉ kí rúdárí na kí gayí.

13Jawánoṉ ne chakkí písí, Aur bachchoṉ ne girte paṛte lakṛiyáṉ ḍhoíṉ.

14Buzurg pháṭakoṉ par dikháí nahíṉ dete, Jawánoṉ kí nag̣mapardází sunáí nahíṉ detí.

15Hamáre diloṉ se ḳhushí játí rahí; Hamárá raqs mátam se badal gayá.

16Táj hamáre sir par se gir paṛá; Ham par afsos! ki ham ne gunáh kiyá.

17Isí liye hamáre dil betáb haiṉ; In hí bátoṉ ke bá‘is hamárí áṉkheṉ dhundhlá gayíṉ;

18Koh i Siyyún kí wírání ke bá‘is; Us par gídaṛ phirte haiṉ.

19Par tú, ai Ḳhudáwand, abad tak qáim hai; Aur terá taḳht pusht dar pusht.

20Phir tú kyúṉ ham ko hamesha ke liye farámosh kartá hai, Aur ham ko muddat i daráz tark kartá hai?

21Ai Ḳhudáwand, ham ko apní taraf phirá, to ham phireṉge; Hamáre din badal de, jaise qadím se the.

22Kyá tú ne ham ko bi’lkull radd kar diyá hai? Kyá tú ham se saḳht náráz hai?

← Chapter 4 Jump to: