Micah 1

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

Jump to: Chapter 2 →

1Sámariya aur Yarúshalem kí bábat Ḳhudáwand ká kalám jo sháhán i Yahúdáh Yútám o Áḳhaz, o Hizqiyáh ke aiyám meṉ Míkáh Morashtí par royá meṉ názil húá.

2Ai sab logo, suno; ai zamín, aur us kí ma‘múrí, kán lagáo: aur Ḳhudáwand Ḳhudá, háṉ, Ḳhudáwand apne muqaddas maskan se tum par gawáhí de.

3Kyúṉki, dekh, Ḳhudáwand apne maskan se báhar átá hai, aur názil hokar zamín ke úṉche maqámoṉ ko páemál karegá.

4Aur paháṛ us ke níche pighal jáeṉge, aur wádíáṉ phaṭ jáeṉgí, jaise mom ág se pighal játá, aur pání kaṛáṛe par se bah játá hai.

5Yih sab Ya‘qúb kí ḳhatá aur Isráíl ke gharáne ke gunáh ká natíja hai. Ya‘qúb kí ḳhatá kyá hai? kyá Sámariya nahíṉ? aur Yahúdáh ke úṉche maqám kyá haiṉ? kyá Yarúshalem nahíṉ?

6Is liye maiṉ Sámariya ko khet ke túde kí mánind, aur angúrí bág lagáne kí jagah kí mánind banáúṉgá; aur maiṉ us ke pattharoṉ ko wádí meṉ ḍhalkáúṉgá, aur us kí bunyád ukháṛ dúṉgá.

7Aur us kí sab khodí húí múrateṉ chúr chúr kí jáeṉgí, aur jo kuchh us ne ujrat meṉ páyá, ág se jaláyá jáegá, aur maiṉ us ke sab butoṉ ko toṛ ḍálúṉgá; kyúṉki us ne yih sab kuchh kasbí kí ujrat se paidá kiyá hai, aur wuh phir kasbí kí ujrat ho jáegá.

8Is liye maiṉ mátam o nauha karúṉgá, maiṉ naṉgá aur barahna hokar phirúṉgá: maiṉ gídaṛoṉ kí tarah chilláúṉgá, aur shutrmurg̣oṉ kí mánind g̣am karúṉgá.

9Kyúṉki us ká zaḳhm lá‘iláj hai; wuh Yahúdáh tak bhí áyá, wuh mere logoṉ ke pháṭak tak, balki Yarúshalem tak pahuṉchá.

10Ját meṉ us kí ḳhabar na do, aur nauha na karo; Bait ‘Afrah meṉ ḳhák par loṭo.

11Ai Safír kí rahnewálí, tú barahna o ruswá hokar chalí já: Zánán kí rahnewálí nikal nahíṉ saktí, Bait Ezal ke mátam ke bá‘is us kí panáhgáh tum se le lí jáegí.

12Márot kí rahnewálí bhaláí ke intizár meṉ taṛaptí hai; kyúṉki Ḳhudáwand kí taraf se balá názil húí, jo Yarúshalem ke pháṭak tak pahuṉchí.

13Ai Lakís kí rahnewálí, bádpá ghoṛoṉ ko rath meṉ jot: tú bint i Siyyún ke gunáh ká ág̣áz húí, kyúṉki Isráíl kí ḳhatáeṉ bhí tujh meṉ páí gayíṉ.

14Is liye tú Morasat Ját ko taláq degí: Akzíb ke gharáne Isráíl ke bádsháhoṉ se dag̣ábází kareṉge.

15Ai Maresah kí rahnewálí, tujh par qabza karnewále ko tere pás láúṉgá; Isráíl kí shaukat ‘Adullám meṉ áegí.

16Apne piyáre bachchoṉ ke liye sir munḍákar chandlí ho já; giddh kí mánind apne chandlápan ko ziyáda kar; kyúṉki wuh tere pás se asír hokar chale gaye.

Jump to: Chapter 2 →