Micah 5

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 4 Jump to: Chapter 6 →

1Ai bint i afwáj, ab faujoṉ meṉ jama‘ ho; hamárá muhásara kiyá játá hai; wuh Isráíl ke hákim ke gál par chhaṛí se márte haiṉ.

2Lekin, ai Baitlahm Ifrátáh, agarchi tú Yahúdáh ke hazároṉ meṉ shámil hone ke liye chhoṭá hai, taubhí tujh meṉ se ek shaḳhs niklegá, aur mere huzúr Isráíl ká hákim hogá; aur us ká masdar zamána e sábiq, háṉ, qadímu’l aiyám se hai.

3Is liye Ḳhudá un ko chhoṛ degá, jab tak ki zachcha dard i zih se fárig̣ na ho: tab us ke báqí bháí baní Isráíl meṉ á mileṉge.

4Aur wuh khaṛá hogá, aur Ḳhudáwand kí qudrat se, aur Ḳhudáwand apne Ḳhudá ke nám kí buzurgí se gallabání karegá; aur wuh qáim raheṉge; kyúṉki wuh us waqt intihá e zamín tak buzurg hogá.

5Aur wuhí hamárí salámatí hogá; jab Asúr hamáre mulk meṉ áegá, aur hamáre qasroṉ meṉ qadam rakkhegá, to ham us ke ḳhiláf sát charwáhe aur áṭh sarguroh barpá kareṉge.

6Aur wuh Asúr ke mulk ko, aur Namrúd kí sarzamín ke madḳhaloṉ ko talwár se wírán kareṉge; aur jab Asúr hamáre mulk meṉ ákar hamárí hudúd ko páemál karegá, to wuh ham ko riháí baḳhshegá.

7Aur Ya‘qúb ká baqiya bahut sí ummatoṉ ke liye aisá hogá, jaise Ḳhudáwand kí taraf se os aur ghás par bárish jo na insán ká intizár kartí hai, aur na baní Ádam ke liye ṭhahrtí hai.

8Aur Ya‘qúb ká baqiya bahut sí qaumoṉ aur ummatoṉ meṉ aisá hogá, jaise sher i babar jangal ke jánwaroṉ meṉ aur jawán sher bheṛoṉ ke galle meṉ; jab wuh un ke darmiyán se guzartá hai, to páemál kartá, aur phaṛtá hai, aur koí chhuṛá nahíṉ saktá.

9Terá háth tere dushmanoṉ par uṭhe, aur tere sab muḳhálif nest ho jáeṉ.

10Aur Ḳhudáwand farmátá hai, Us roz maiṉ tere ghoṛoṉ ko, jo tere darmiyán haiṉ, káṭ ḍálúṉgá, aur tere rathoṉ ko nest karúṉgá;

11aur tere mulk ke shahroṉ ko barbád, aur tere sab qil‘oṉ ko mismár karúṉgá;

12aur maiṉ tujh se jádúgarí dúr karúṉgá, aur tujh meṉ fálgír na raheṉge;

13aur terí khodí húí múrateṉ, aur tere sutún tere darmiyán se nest kar dúṉgá, aur tú phir apní dastkárí kí ‘ibádat na karegá.

14Aur maiṉ terí Yasíratoṉ ko tere darmiyán se ukháṛ ḍálúṉgá, aur tere shahroṉ ko tabáh karúṉgá;

15aur un qaumoṉ par, jo shanawá na húíṉ, apná qahr o g̣azab názil karúṉgá.

← Chapter 4 Jump to: Chapter 6 →