Micah 2

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 1 Jump to: Chapter 3 →

1Un par afsos jo badkirdárí ke mansúbe báṉdhte, aur bistar par paṛe paṛe sharárat kí tadbíreṉ íjád karte haiṉ! aur subh hote hí un ko ‘amal meṉ láte haiṉ, kyúṉki un ko is ká iḳhtiyár hai.

2Wuh lálach se khetoṉ ko zabt karte; aur gharoṉ ko chhín lete haiṉ: aur yúṉ ádmí aur us ke ghar par, háṉ, mard aur us kí mírás par zulm karte haiṉ.

3Is liye Ḳhudáwand yúṉ farmátá hai, ki Dekh, maiṉ is gharáne par áfat láne kí tadbír kartá húṉ, jis se tum apní gardan na bachá sakoge, aur gardankashí se na chaloge; kyúṉki yih burá waqt hogá.

4Us waqt koí tum par yih masal láegá, aur purdard nauhe se mátam karegá, aur kahegá, Ham bi’lkull g̣árat húe; us ne mere logoṉ ká baḳhra badal ḍálá: us ne kaise us ko mujh se judá kar diyá! us ne hamáre khet bág̣íoṉ ko báṉṭ diye.

5Is liye tum meṉ se koí na bachegá, jo Ḳhudáwand kí jamá‘at meṉ paimáish kí rassí ḍále.

6Bakwásí kahte haiṉ, Bakwás na karo; in bátoṉ kí bábat bakwás na karo: aise logoṉ se ruswáí judá na hogí.

7Ai baní Ya‘qúb, kyá yih kahá jáegá, ki Ḳhudáwand kí rúh qásir ho gayí? kyá us ke yihí kám haiṉ? kyá merí báteṉ rástrau ke liye mufíd nahíṉ?

8Abhí kal kí bát hai, ki mere log dushman kí tarah uṭhe; tum sulhpasand o befikr ráhgíroṉ kí chádar utár lete ho.

9Tum mere logoṉ kí ‘auratoṉ ko un ke marg̣úb gharoṉ se nikál dete ho: aurtum ne mere jalál ko un ke bachchoṉ par se hamesha ke liye dúr kar diyá.

10Uṭho, aur chale jáo, kyúṉki lá‘iláj o muhlik nápákí ke sabab se yih tumhárí árámgáh nahíṉ hai.

11Agar koí jhúṭh aur batálat ká pairau kahe, ki Maiṉ sharáb o nashe kí báteṉ karúṉgá, to wuhí in logoṉ ká nabí hogá.

12Ai Ya‘qúb, maiṉ yaqínan tere sab logoṉ ko faráham karúṉgá; maiṉ yaqínan Isráíl ke baqiye ko jama‘ karúṉgá; maiṉ un ko Busráh kí bheṛoṉ aur charágáh ke galle kí mánind ikaṭṭhá karúṉgá; aur ádmíoṉ ká baṛá shor hogá.

13Toṛnewálá un ke áge áge gayá hai; wuh toṛte húe pháṭak tak chale gaye, aur us meṉ se guzar gaye; aur un ká bádsháh un ke áge áge gayá, ya‘ní Ḳhudáwand un ká peshwá.

← Chapter 1 Jump to: Chapter 3 →