Micah 6

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 5 Jump to: Chapter 7 →

1Ab Ḳhudáwand ká farmán sun: Uṭh, paháṛoṉ ke sámne mubáhasa kar, aur sab ṭíle terí áwáz suneṉ.

2Ai paháṛo, aur ai zamín kí muhkam bunyádo, Ḳhudáwand ká da‘wá suno; kyúṉki Ḳhudáwand apne logoṉ par da‘wá kartá hai, aur wuh Isráíl par hujjat sábit karegá.

3Ai mere logo, maiṉ ne tum se kyá kiyá hai? aur tum ko kis bát meṉ ázurda kiyá hai? mujh par sábit karo.

4Kyúṉki maiṉ tum ko mulk i Misr se nikál láyá, aur g̣ulámí ke ghar se fidya dekar chhuṛá láyá; aur tumháre áge Músá, aur Hárún, aur Maryam ko bhejá.

5Ai mere logo, yád karo ki sháh i Moáb Balaq ne kyá mashwarat kí, aur Bal‘ám bin Ba‘or ne use kyá jawáb diyá; aur Shittím se Jiljál tak kyá kyá húá; táki Ḳhudáwand kí sadáqat se wáqif ho jáo.

6Maiṉ kyá lekar Ḳhudáwand ke huzúr áúṉ, aur Haqq Ta‘álá ko kyúṉkar sijda karúṉ? kyá soḳhtaní qurbáníoṉ aur yaksála bachhṛoṉ ko lekar us ke huzúr áúṉ?

7Kyá Ḳhudáwand hazároṉ meṉḍhoṉ se, yá tel kí das hazár nahroṉ se ḳhush hogá? kyá maiṉ apne pahlauṭhe ko apne gunáh ke ‘iwáz meṉ, aur apní aulád ko apní ján kí ḳhatá ke badle meṉ de dúṉ?

8Ai insán, us ne tujh par nekí záhir kar dí hai: Ḳhudáwand tujh se is ke siwá kyá cháhtá hai, ki tú insáf kare, aur rahmdilí ko ‘azíz rakkhe, aur apne Ḳhudá ke huzúr firotaní se chale?

9Ḳhudáwand kí áwáz shahr ko pukártí hai, aur dánishmand us ke nám ká liház rakhtá hai; ‘asá aur us ke muqarrar karnewále kí suno.

10Kyá sharír ke ghar meṉ ab tak nájáiz nafa‘ ke ḳhazáne, aur náqis o nafratí paimáne nahíṉ haiṉ?

11Kyá wuh dagá kí tarázú aur jhúṭhe báṭoṉ ká thailá rakhtá húá begunáh ṭhahregá?

12Kyúṉki waháṉ ke daulatmand zulm se pur haiṉ, aur us ke báshinde jhúṭh bolte haiṉ, balki un ke muṉh meṉ dag̣ábáz zabán hai.

13Is liye maiṉ tujhe muhlik zaḳhm lagáúṉgá, aur tere gunáhoṉ ke sabab se tujh ko wírán kar ḍálúṉgá.

14Tú kháegá, par ásúda na hogá, kyúṉki terá peṭ ḳhálí rahegá; tú chhipáegá, par bachá na sakegá; aur jo kuchh ki tú bacháegá, maiṉ use talwár ke hawále karúṉgá.

15Tú boegá, par fasl na káṭegá; zaitún ko rauṉdegá, par tel milne na páegá; tú angúr ko kuchlegá, par mai na píegá.

16Kyúṉki ‘Umrí ke qawánín aur Aḳhíab ke ḳhándán ke a‘mál kí pairawí hotí hai, aur tum un kí mashwarat par chalte ho, táki maiṉ tum ko wírán karúṉ, aur us ke rahnewáloṉ ko suskár ká bá‘is banáúṉ; pas tum mere logoṉ kí ruswáí uṭháoge.

← Chapter 5 Jump to: Chapter 7 →