Micah 7

Urdu URDR55 (Kitáb i Muqaddas 1955 (Tauret, Zabúr, Ambiyá ke Sahífa, aur Injíl))

← Chapter 6 Jump to:

1Mujh par afsos! maiṉ tábistání mewa jama‘ hone, aur angúr toṛne ke ba‘d kí ḳhoshachíní kí mánind húṉ: na kháne ko koí ḳhosha, aur na pahlá pakká dilpasand anjír hai.

2Díndár ádmí mulk se játe rahe, logoṉ meṉ koí rástbáz nahíṉ: wuh sab ke sab ghát meṉ baiṭhe haiṉ ki ḳhún kareṉ: har shaḳhs jál bichhákar apne bháí ká shikár kartá hai.

3Un ke háth badí meṉ phurtíle haiṉ; hákim rishwat máṉgtá hai, aur qází bhí yihí cháhtá hai, aur baṛe ádmí apne dil kí hirs kí báteṉ karte haiṉ: aur yúṉ sázish karte haiṉ.

4Un meṉ sab se achchhá to úṉṭkaṭáre kí mánind hai; aur sab se rástbáz ḳhárdár jháṛí se badtar hai: un ke nigahbánoṉ ká din, háṉ, un kí sazá ká din á gayá hai; ab un ko pareshání hogí.

5Kisí dost par i‘timád na karo: hamráz par bharosá na rakkho; háṉ, apne muṉh ká darwáza apní bíwí ke sámne band rakkho.

6Kyúṉki beṭá apne báp ko haqír jántá hai; aur beṭí apní máṉ ke aur bahú apní sás ke ḳhiláf hotí hai; aur ádmí ke dushman us ke ghar hí ke log haiṉ.

7Lekin maiṉ Ḳhudáwand kí ráh dekhúṉgá, aur apne naját denewále Ḳhudá ká intizár karúṉgá; merá Ḳhudá merí sunegá.

8Ai mere dushman, mujh par shádmán na ho: kyúṉki jab maiṉ girúṉgá, to uṭh khaṛá húṉgá; jab andhere meṉ baiṭhúṉgá, to Ḳhudáwand merá núr hogá.

9Maiṉ Ḳhudáwand ke qahr kí bardásht karúṉgá, kyúṉki maiṉ ne us ká gunáh kiyá hai; jab tak wuh merá da‘wá sábit karke merá insáf na kare: wuh mujhe raushní meṉ láegá, aur maiṉ us kí sadáqat ko dekhúṉgá.

10Tab merá dushman, jo mujh se kahtá thá, Ḳhudáwand terá Ḳhudá kaháṉ hai, yih dekhkar ruswá hogá; merí áṉkheṉ use dekheṉgí; wuh galiyoṉ kí kích kí mánind páemál kiyá jáegá.

11Terí fasíl kí ta‘mír ke roz terí hudúd baṛháí jáeṉgí;

12usí roz Asúr se aur Misr ke shahroṉ se aur Misr se daryá e Furát tak, aur samundar se samundar tak, aur kohistán se kohistán tak log tere pás áeṉge.

13Aur zamín apne báshindoṉ ke a‘mál ke sabab se wírán hogí.

14Apne ‘asá se apne logoṉ, ya‘ní apní mírás kí gallabání kar, jo Karmil ke jangal meṉ tanhá rahte haiṉ; un ko Basan aur Jili‘ád meṉ pahle kí tarah charne de.

15Jaise tú ne mulk i Misr se nikalte waqt ‘ajáib dikháe, waise hí ab dikhá.

16Qaumeṉ dekhkar apní tamám tawánáí se sharminda hoṉgí; wuh muṉh par háth rakkheṉgí, aur un ke kán bahre ho jáeṉge.

17Wuh sáṉp kí mánind ḳhák cháṭeṉgí, aur apní chhipne kí jagahoṉ se zamín ke kíṛoṉ kí mánind thartharátí húí áeṉgí; wuh Ḳhudáwand hamáre Ḳhudá ke huzúr ḍartí húí áeṉgí, háṉ, wuh us se hirásán hoṉgí.

18Tujh sá Ḳhudá kaun hai jo badkirdárí mu‘áf kare, aur apne mírás ke baqiye kí ḳhatáoṉ se darguzre? wuh apná qahr hamesha tak nahíṉ rakh chhoṛtá, kyúṉki wuh shafaqat karná pasand kartá hai.

19Wuh phir ham par rahm farmáegá; wuhí hamárí badkirdárí ko páemál karegá, aur hamáre sab gunáh samundar kí tah meṉ dál degá.

20Tú Ya‘qúb se wafádárí karegá, aur Abrahám ko wuh shafaqat dikháegá, jis kí bábat tú ne qadím zamáne meṉ hamáre bápdádá se qasam kháí thí.

← Chapter 6 Jump to: