bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Chinese
/
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
/
1 Kings 1
1 Kings 1
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 2 →
1
這時， 大衛 王已經盡老；雖然佢个僕人用毯仔枷在佢身項，佢還係感覺毋罅燒暖。
2
佢个大臣對佢講：「吾主吾王，俾𠊎等去尋一個人家女來服事你，照顧你，喊姖睡在你个身邊，使你燒暖。」
3
所以佢等到 以色列 各地去尋靚靚个人家女，最尾在 書念 尋到一個人家女，名喊 雅比莎 ，就帶姖去見王。
4
這人家女盡靚；姖在王塍頭服事照顧王，總係王無㧯姖發生親密个關係。
5
該時， 押沙龍 已經死掉； 大衛 㧯 哈及 所𫱔个孻仔 亞多尼雅 照算係最大个孻仔。佢生到盡緣投。 大衛 自從毋識俾佢食過苦，毋識嫌過佢，總係佢野心當大，想愛做王。佢為自家準備戰車㧯騎兵，又有五十個衛兵在頭前行。
7
亞多尼雅 識㧯 洗璐雅 个孻仔 約押 並祭司 亞比亞他 參詳過；兩儕攏總贊成，答應支持佢。
8
總係祭司 撒督 、 耶何耶大 个孻仔 比拿雅 、先知 拿單 、 示每 、 利以 㧯 大衛 該兜侍衛攏總毋贊成 亞多尼雅 。
9
有一日， 亞多尼雅 在 隱‧羅結 泉水附近个「蛇巖」該位㓾牛、羊㧯細肥牛來獻祭，又請 大衛 王其他个孻仔㧯大臣對 猶大 來參加獻祭个筵席。
10
總係佢無請先知 拿單 、 比拿雅 㧯王該兜侍衛，乜無請厥老弟 所羅門 。
11
所以， 拿單 去見 所羅門 个阿姆 拔示芭 ，問姖：「你無聽講 哈及 个孻仔 亞多尼雅 已經立自家做王麼？𠊎等个主 大衛 還毋知這件事。
12
若係你愛救自家㧯若孻仔 所羅門 个性命，𠊎建議你，
13
黏時去見 大衛 王，問佢：『吾主吾王，你毋係正經答應過𠊎，吾孻仔 所羅門 一定會承接你做王，坐你个王位麼？樣般這下 亞多尼雅 做王呢？』」
14
拿單 又講：「你還㧯王講等話个時，𠊎會入去，證實你所講个話。」
15
所以 拔示芭 到王个間房去見王。王當老了；對 書念 來个細妹仔 雅比莎 在照顧佢。
16
拔示芭 在王面前跪落去；王問姖：「你愛麼介？」
17
拔示芭 講：「吾主吾王，你識指等上主 — 你上帝个名發誓，愛俾吾孻仔 所羅門 承接你做王，坐你个王位。
18
總係， 亞多尼雅 已經立自家做王，你還毋知。
19
佢㓾盡多牛、羊㧯細肥牛來獻祭，又請你所有个孻仔、祭司 亞比亞他 㧯你軍隊个元帥 約押 去參加筵席，總係無請你个僕人 所羅門 。
20
吾主吾王，全 以色列 个人民緊看你，等你㧯佢等講，麼人愛承接你个王位。
21
若係你毋講，你過身以後，𠊎㧯吾孻仔 所羅門 就會被人準做罪人了。」
22
拔示芭 還㧯王講等話个時，先知 拿單 來到王宮。
23
有人報告王講：「先知 拿單 到了。」 拿單 入去，在王面前伏落去跪等，
24
然後講：「吾主吾王，你識講過愛 亞多尼雅 承接你做王，坐你个王位係麼？
25
今晡日佢去㓾盡多牛、羊㧯細肥牛來獻祭，又請你所有个孻仔、你軍隊該兜軍長㧯祭司 亞比亞他 坐桌。這下佢等㧯 亞多尼雅 共下啉食，又大聲喊講：『 亞多尼雅 王萬歲！』
26
總係 亞多尼雅 無請𠊎 — 就係你个僕人、祭司 撒督 㧯 耶何耶大 个孻仔 比拿雅 ，乜無請你个僕人 所羅門 。
27
吾主吾王斷真同意這件事係麼？樣般毋㧯你个僕人講麼人愛承接你个王位呢？」
28
所以， 大衛 王吩咐講：「喊 拔示芭 過來。」 拔示芭 就過來，企在王面前。
29
王發誓對姖講：「𠊎指等該救𠊎脫離各種患難个永生上主答應你，
30
今晡日𠊎愛遵守𠊎指等上主 — 以色列 上帝个名所發个誓：你个孻仔 所羅門 一定會承接𠊎做王，坐𠊎个王位。」
31
拔示芭 伏落去跪等講：「願𠊎个主 大衛 王萬歲！」
32
大衛 王又吩咐人去喊祭司 撒督 、先知 拿單 㧯 耶何耶大 个孻仔 比拿雅 來。佢等來到王面前，
33
大衛 王對佢等講：「你等愛帶領宮廷个官長，俾𠊎个孻仔 所羅門 騎𠊎个騾仔，護送佢到 基訓 个泉水滣。
34
在該位，祭司 撒督 㧯先知 拿單 愛膏油立佢做 以色列 个王。你等愛歕羊角大聲喊：『 所羅門 王萬歲！』
35
然後你等愛護送佢轉到這位來；佢愛坐𠊎个王位，承接𠊎做王，因為𠊎已經立佢做 以色列 㧯 猶大 个統治者。」
36
耶何耶大 个孻仔 比拿雅 講：「願吾主吾王个旨意成就！願上主 — 你个上帝成全這事。
37
上主樣般㧯吾主吾王同在，願佢照樣㧯 所羅門 同在，使佢个權勢比吾主 大衛 王个權勢還較強盛！」
38
所以祭司 撒督 、先知 拿單 、 耶何耶大 个孻仔 比拿雅 、並該兜做侍衛个 基利提 人㧯 比利提 人攏總去，請 所羅門 騎 大衛 王个騾仔，護送佢到 基訓 个泉水滣。
39
祭司 撒督 對放約櫃个聖帳篷肚帶來一個裝滿聖油个角來膏立 所羅門 做王。所以佢等歕羊角，人民全部大聲喊：「 所羅門 王萬歲！」
40
然後佢等全部跈 所羅門 轉來，一路大聲喊，又歕笛仔，聲音大到連地也會顫。
41
亞多尼雅 㧯佢个人客正結束佢等个筵席，聽到這聲音。 約押 聽到歕羊角个聲音，就問：「城肚發生麼介事？恁大个聲音係麼介意思？」
42
佢等話還吂講煞，祭司 亞比亞他 个孻仔 約拿單 就到。 亞多尼雅 講：「入來！你係好人，你一定係帶來好消息。」
43
約拿單 對 亞多尼雅 講：「壞掉了！𠊎等个主 大衛 王已經立 所羅門 做王。
44
佢派祭司 撒督 、先知 拿單 、 耶何耶大 个孻仔 比拿雅 、並該兜做侍衛个 基利提 人㧯 比利提 人護送 所羅門 ，還俾佢騎王个騾仔。
45
祭司 撒督 㧯先知 拿單 在 基訓 个泉水滣膏油立佢做王。佢等護送佢入城，一路大聲喊；人民全部大聲應。該就係你等頭先聽到个聲音。
46
所羅門 已經登基做王了。
47
毋單淨恁樣，連所有宮廷个官長也去恭賀𠊎等个主 大衛 王，對佢講：『願你个上帝使 所羅門 比你更有名聲，佢个權勢比你个還較強盛！』 大衛 王就在眠床頂伏等敬拜，
48
祈禱講：『愛頌讚上主 — 以色列 个上帝！佢今晡日使𠊎个一個後代承接𠊎个王位，又使𠊎還生个時親目看到這事！』」
49
亞多尼雅 該兜人客當著驚；佢等黏時企起來，一下就四散掉去。
50
亞多尼雅 也驚 所羅門 ，走到放約櫃个聖帳篷肚，抓等祭壇个角 。
51
有人㧯 所羅門 講：「 亞多尼雅 因為驚 所羅門 王，這下去抓等祭壇个角，講：『𠊎愛 所羅門 王今晡日向𠊎發誓，毋將僕人㓾死。』」
52
所羅門 講：「佢若對𠊎忠心，佢一條頭那毛也毋會𢫫掉；佢若係做壞事，定著會無命。」
53
所以 所羅門 王派人去對祭壇頂將 亞多尼雅 帶下來。 亞多尼雅 來見 所羅門 王，跪在王面前。 所羅門 對佢講：「你做得轉屋下了！」
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22