1 Kings 21

Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)

← Chapter 20 Jump to: Chapter 22 →

1有一個耶斯列人喊做拿伯，佢有一垤葡萄園在耶斯列，在撒馬利亞王亞哈个王宮附近。

2有一日，亞哈對拿伯講：「將你个葡萄園讓給𠊎好麼！因為它偎近王宮，𠊎愛用這垤地做菜園。𠊎會用還較好个葡萄園㧯你換；抑係你愛錢，𠊎就照市價算給你。」

3拿伯對亞哈講：「上主毋准𠊎將祖產讓給你。」

4亞哈轉到王宮，因為耶斯列人拿伯講：「上主毋准𠊎將祖產讓給你」這句話，心肚發閼當無歡喜。佢橫在眠床，面向壁，毋食東西。

5佢个𡜵娘耶洗碧入去問佢：「你做麼介發閼恁無歡喜？做麼介毋食東西呢？」

6佢應講：「因為𠊎向耶斯列人拿伯講：『𠊎出價錢愛買你个葡萄園；若係你愛，𠊎也做得用另外一垤葡萄園㧯你換。』總係佢卻講：『𠊎做毋得將𠊎个葡萄園讓給你！』」

7王后耶洗碧對亞哈講：「你敢毋係以色列个王？䟘起來，歡歡喜喜來食飯；𠊎一定會將耶斯列人拿伯个葡萄園交給你！」

8所以，耶洗碧用亞哈个名寫信仔，揝亞哈个印仔，然後送給該兜㧯拿伯共城住个貴族㧯長老。

9信仔寫講：「愛宣告禁食一日，召集人民，請拿伯坐大位。

10喊兩個鱸鰻當面告佢，講佢咒罵上帝㧯王，然後將佢拖出城外，用石頭㧹死佢。」

11耶斯列該兜貴族㧯長老照耶洗碧个信仔所指示个去做。

12佢等宣告禁食一日，召集人民共下來，請拿伯坐大位。

13兩個鱸鰻當面告拿伯，講佢咒罵上帝㧯王。所以人民將拿伯拖出城外，用石頭將佢㧹死。

14佢等就喊人去耶洗碧該位，講拿伯已經被人用石頭㧹死了。

15耶洗碧一聽到拿伯被人用石頭㧹死，就對亞哈講：「好去接收耶斯列人拿伯毋肯賣給你个葡萄園了！佢已經死掉了！」

16亞哈聽到拿伯死掉，黏時就出發，愛去霸佔耶斯列人拿伯个葡萄園。

17上主對提斯比人先知以利亞講：

18「到撒馬利亞該位去見以色列王亞哈，你會在拿伯个葡萄園堵到佢；佢想愛霸佔該葡萄園。

19你去㧯佢講，𠊎 — 上主對佢講：『你㓾死人，還想霸佔佢个產業係麼？』㧯佢講上主恁樣講：『狗在麼介地方舐拿伯个血，也會在該位舐你自家个血！』」

20亞哈看到以利亞，就講：「死對頭个啊，𠊎樣般又堵到你？」以利亞應講：「𠊎來尋你。因為你出賣自家，行上主看做邪惡个事。

21所以，上主對你講：『𠊎愛降災禍給你，愛除滅你㧯你家族所有个男人，無論自由个抑係無自由个全部愛滅掉。

22𠊎會使你个家族像尼八个孻仔耶羅波安王个家族共樣，又像亞希雅个孻仔巴沙王个家族共樣，因為你使以色列人陷在罪惡當中，又惹𠊎發譴。』

23論到耶洗碧，上主講：『狗仔愛在耶斯列城牆堘食耶洗碧个屍體。』

24你屋下所有个人，死在城肚个一定會被狗仔食掉，死在山野个一定會被鳥仔食掉。」

25(事實上無人像亞哈恁樣出賣自家，行上主看做邪惡个事；這全部係因為厥𡜵娘耶洗碧个唆慫。

26上主識在以色列人面前將亞摩利人逐出這地方；總係亞哈照亞摩利人恁樣去拜偶像，犯最積惡个罪。)

27亞哈聽到這兜話，就扯爛衫，換著麻衫，毋食東西。佢著等麻衫睡目，行路也頭攋攋，緊透大氣。

28上主對提斯比人先知以利亞講：

29「亞哈在𠊎面前恁謙卑，你有看到麼？因為佢在𠊎面前恁謙卑，𠊎無愛在佢還生个日仔降災禍；𠊎愛在厥孻仔做王个時降災禍給亞哈个家族。」

← Chapter 20 Jump to: Chapter 22 →