bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Chinese
/
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
/
1 Kings 20
1 Kings 20
Chinese Bible TNV 2012 (Traditional) (客語聖經 – 現代臺灣客語譯本，新舊約全書客語聖經 – 漢字版)
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
1
敘利亞 个王 便‧哈達 召集佢所有个軍隊，帶領屬佢个三十二個王㧯佢等个戰車、戰馬出去相㓾，圍攻 撒馬利亞 。
2
佢派兜使者到城肚去㧯 以色列 王 亞哈 講：「 便‧哈達 恁樣講：
3
你愛將金仔、銀仔、你該兜𡜵娘，還有若該兜當紮、當靚个子女全部交給𠊎。」
4
以色列 王回答佢个話講：「請㧯𠊎个主 便‧哈達 王講，𠊎會照佢所講个去做。𠊎㧯𠊎所有个全部做得給佢。」
5
無幾久，該兜使者又倒轉來，帶等 便‧哈達 另外个要求講：「𠊎㧯你講過，你愛將你个金銀、你該兜𡜵娘，還有子女全部交給𠊎。
6
總係天光日這時節，𠊎愛派𠊎个官員到你个王宮㧯你大臣个屋下搜查，將你所看做值錢个東西全部拿走。」
7
以色列 王將國內該兜長老全部召集來，對佢等講：「你等看，這個人愛來害𠊎等。佢先派人迫𠊎交出𠊎个𡜵娘、子女㧯金銀，𠊎並無拒絕。」
8
所有个長老㧯人民全部講：「毋好聽佢个！毋好答應佢！」
9
所以， 亞哈 回答 便‧哈達 該兜使者講：「請㧯𠊎个主 便‧哈達 王講：僕人會答應你第一擺个要求，總係這擺𠊎無辦法答應！」 該兜使者就轉去向王報告，
10
無幾久又帶等 便‧哈達 个話轉來，講：「𠊎愛帶大隊人馬去破壞 撒馬利亞 。若係城肚个泥粉罅佢等逐儕捧一捧，願神明重重責罰𠊎！」
11
以色列 王講：「你等轉去㧯佢講：真實个戰士毋係在相㓾前歕雞頦，係在打贏後誇口。」
12
便‧哈達 接到 亞哈 个答覆，佢㧯其他个王堵好在營肚个帳篷 啉酒。佢下令講：「準備攻城！」佢等就準備好勢愛去攻打 撒馬利亞 。
13
這時，有一個先知去見 以色列 王 亞哈 ，對佢講：「上主講：『你有看到對方个軍隊恁大陣麼！看哪！𠊎今晡日愛使你打贏佢等，你就知𠊎係上主。』」
14
亞哈 問：「麼人愛去打頭陣呢？」 先知講：「上主講：在逐省該兜跈省長屬下个少壯軍官。」 王又問：「麼人做總指揮呢？」 先知講：「就係你。」
15
所以，王召集在逐省該兜跈省長屬下个少壯軍官兩百三十二儕，又召集 以色列 軍隊七千儕。
16
當晝， 便‧哈達 㧯協助佢个三十二個王在營肚个帳篷酒醉个時， 以色列 人開始攻擊。
17
該兜少壯軍官先出發。 便‧哈達 派去个探仔就回報講：「有人對 撒馬利亞 出來。」
18
佢就下令：「將佢等生生捉起來！毋管佢等係來相㓾抑係來講和个。」
19
該兜少壯軍官帶頭出戰； 以色列 軍隊跈在後背。
20
逐儕攏總㓾死所堵到个敵人。因為恁樣， 敘利亞 人就逃走， 以色列 人在後背追。 敘利亞 王 便‧哈達 騎等馬，㧯幾個騎兵共下逃走。
21
以色列 王一直追到城外，去搶該兜戰車㧯馬仔，將 敘利亞 人打到橫笐橫袋。
22
後來，該先知去見 以色列 王，講：「轉去加強你个軍力，好好計劃，因為 敘利亞 王明年春天一定還會來攻打你。」
23
敘利亞 王个官員對佢講：「 以色列 人个神係山神，所以 以色列 人打贏𠊎等。總係，𠊎等在平原㧯佢等相㓾，𠊎等一定會打贏佢等。
24
大王，你愛恁樣做：撤掉該三十二個王个軍權，改派其他个將軍來代佢等，
25
然後重新編一隊軍兵，上擺失掉个戰馬㧯戰車也愛補足。𠊎等愛在平地㧯 以色列 人相㓾；這擺𠊎等一定會打贏。」王採納佢等个建議。
26
第二年春天， 便‧哈達 召集 敘利亞 人到 亞弗 城，愛去攻打 以色列 人。
27
以色列 人也召集軍隊，好好準備，佢等分做兩隊出去，面向 敘利亞 人安營。總係 以色列 人㧯田野拶拶个 敘利亞 人比起來，就像係兩細群个山羊。
28
有一個神人去見 以色列 王，講：「上主恁樣講：『因為 敘利亞 人講𠊎係山神，毋係平原个神，所以𠊎愛使你打贏佢等个大軍，你等就知𠊎係上主。』」
29
敘利亞 人㧯 以色列 人對陣安營七日久。到第七日，佢等就交戰。該日， 以色列 人㓾掉 敘利亞 十萬步兵。
30
賸到个人逃入 亞弗 城；城牆橫下來，又磧死兩萬七千人。 便‧哈達 也逃入城肚，囥在一座屋仔最底背个間房。
31
佢个官員對佢講：「𠊎等聽講 以色列 該兜王全部盡慈悲。請准𠊎等去見這 以色列 王。𠊎等愛在腰身圍麻布，在頸筋䌈索仔；恁樣，無一定佢會饒你个命。」
32
所以佢等拿麻布圍在腰身，用索仔䌈在頸筋，到 以色列 王該位去，講：「你个僕人 便‧哈達 求你饒佢一命。」 亞哈 講：「佢還生係麼？佢係𠊎个兄弟！」
33
便‧哈達 个官員一看到機會難得，就遽遽順佢个話講：「就像王所講个， 便‧哈達 係你个兄弟！」 亞哈 下令講：「去帶佢來！」 便‧哈達 到个時， 亞哈 請佢㧯自家共下坐上戰車。
34
便‧哈達 講：「𠊎愛將吾爸對若爸該位搶來个城市歸還你，又俾你在 大馬士革 設立貿易中心，像吾爸在 撒馬利亞 所做个。」 亞哈 應講：「好，𠊎會照約放你走。」 亞哈 就㧯佢立約，然後放佢走。
35
有一群先知，其中一個奉上主命令向另外一個同伴講：「來打𠊎！」總係該先知毋肯打佢。
36
所以佢對該先知講：「因為你無聽從上主个命令，你一離開𠊎，就會有獅仔來咬死你。」該先知走開以後，斷真堵到獅仔，將佢咬死。
37
先前講話該先知又尋到另外一儕，對佢講：「來打𠊎！」該儕人就打佢，將佢打傷了。
38
先知用布仔將目珠揞起來，假做別人，在路堘企等，等 以色列 王經過。
39
王經過个時，先知大聲喊：「國王，𠊎相㓾个時，有一個士兵將一個捉來个敵人交給𠊎，講：『掌等這個人；若係佢走掉，你愛用命賠命，抑係罰三千隻銀幣。』
40
總係𠊎盡無閒个時，這個人卻走掉去。」 以色列 王講：「你已經判自家个罪了；你一定愛接受刑罰。」
41
先知黏時將揞目珠个布仔拿下來， 以色列 王就認出佢係先知。
42
所以先知對王講：「上主恁樣講：『因為你將𠊎命令你愛除掉个人放走，你一定愛用你个命賠命，也愛用你个人民賠佢个人民。』」
43
以色列 王轉到 撒馬利亞 个王宮，心肚發閼當無歡喜。
← Chapter 19
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 21 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22