1 Kings 1 — Chinese TTVR (現代台語譯本羅馬字版)

1Tāi-pi̍t -ông nî-lāu hè-sò͘ chōe, kah-phē mā kah bōe sio.

2I ê jîn-sîn tùi i kóng, “Chhiáⁿ goán ê chú goán ê ông chún goán chhē chi̍t ê siàu-liân ê chāi-sek-lú, lâi hōng-thāi chiàu-kò͘ lí, khùn tī lí ê seng-khu piⁿ, hō͘ goán ê chú goán ê ông tit-tio̍h un-loán.”

3In chiū tī Í-sek-lia̍t choân-kok chhē súi ê cha-bó͘ gín-á; chhē-tio̍h Su-liām chi̍t ê lú-chú, kiò-chòe Ngá-pí-sa, chhōa-lâi ông hia.

4Chit-ê cha-bó͘ gín-á chin súi; i hōng-thāi sū-hāu ông, m̄-kú ông bô kap i tâng-pâng.

5Hit-sî, Tāi-pi̍t kap Hap-ki̍p siⁿ ê kiáⁿ A-to-nî-ngá siūⁿ-beh choh-tōa, kóng, “Góa beh choh-ông.” I ūi ka-kī chún-pī chiàn-chhia kap bé-peng, koh ū gō͘-cha̍p ê peng tī i thâu-chêng khui-lō͘.

6I ê lāu-pē m̄-bat kā i chek-pī kóng, “Lí sī-án-chóaⁿ án-ni chòe?” I tī Ap-sa-liông bé-āu chhut-sì, siⁿ-chòe put-chí eng-chùn.

7A-to-nî-ngá kap Sé-lō͘-ngá ê kiáⁿ Iok-ap, koh kap chè-si A-pí-a-tha chham-siông, in chiū chi-chhî i.

8M̄-kú chè-si Sat-tok, kap Iâ-hô-iâ-tāi ê kiáⁿ Pí-ná-ngá, sian-ti Ná-tan, kap Sī-múi, Lī-í, kap Tāi-pi̍t ê ióng-sū, lóng bô ióng-hō͘ A-to-nî-ngá.

9Ū chi̍t ji̍t, A-to-nî-ngá tī Ún Lô-kiat hù-kūn ê Só-hi-lia̍t chio̍h-pôaⁿ hia, thâi gû, iûⁿ, kap pûi ê cheng-siⁿ hiàn-chè, mā chhiáⁿ i ê chèng hiaⁿ-tī, chiū-sī ông ê kiáⁿ, í-ki̍p Iû-tāi só͘-ū ông ê jîn-sîn.

10M̄-kú i bô chhiáⁿ sian-ti Ná-tan, Pí-ná-ngá, kap ióng-sū, í-ki̍p i ê sió-tī Só͘-lô-bûn.

11Ná-tan kā Só͘-lô-bûn ê lāu-bú Poa̍t-sī-pa kóng, “ Hap-ki̍p ê kiáⁿ A-to-nî-ngá choh-ông lah, lí kiám bô thiaⁿ--tio̍h? Lán ê chú Tāi-pi̍t mā m̄ chai.

12Taⁿ lí lâi, góa thòe lí phah-sǹg, thang pó-choân lí kap lí ê kiáⁿ Só͘-lô-bûn ê sìⁿ-miā.

13Lí ji̍p-khì kìⁿ Tāi-pi̍t -ông, tùi i kóng, ‘Góa ê chú góa ê ông ah, lí kiám m̄-sī bat tùi lí ê lú-pī chiù-chōa kóng, góa ê kiáⁿ Só͘-lô-bûn beh sòa-chiap lí choh-ông, beh chē lí ê ūi? Sī-án-chóaⁿ A-to-nî-ngá teh choh-ông?’

14Lí tī hia kap ông kóng-ōe ê sî, góa ōe tè lí ê āu-bīn ji̍p--khì, lâi chèng-si̍t lí ê ōe.”

15Poa̍t-sī-pa ji̍p-khì pâng-keng kìⁿ ông; ông chin lāu, Su-liām ê lú-chú Ngá-pí-sa teh kā i sū-hāu.

16Poa̍t-sī-pa kiok-kiong pài ông; ông kóng, “Lí ài sím-mi̍h?”

17I kā ông kóng, “Góa ê chú ah, lí bat kí Siōng Chú — lí ê Siōng-tè tùi lí ê lú-pī chiù-chōa kóng, ‘Lí ê kiáⁿ Só͘-lô-bûn beh sòa-chiap góa choh-ông, i beh chē góa ê ūi.’

18Taⁿ A-to-nî-ngá í-keng chū-chheng choh-ông, góa ê chú góa ê ông lí iáu m̄ chai.

19I ū thâi chin chōe chiah gû, iûⁿ, kap pûi ê cheng-siⁿ hiàn-chè, koh chhiáⁿ ông ê chèng-kiáⁿ, chè-si A-pí-a-tha, kap goân-sòe Iok-ap; m̄-kú i bô chhiáⁿ lí ê kiáⁿ Só͘-lô-bûn.

20Góa ê chú góa ê ông ah, Í-sek-lia̍t jîn-bîn ê ba̍k-chiu lóng teh khòaⁿ lí, teh thèng-hāu lí kā in soan-pò͘, sím-mi̍h-lâng beh sòa-chiap góa ê chú góa ê ông chē ông-ūi.

21Nā bô, góa ê chú góa ê ông tńg-khì lí ê lia̍t-chó͘ hia liáu-āu, góa kap góa ê kiáⁿ Só͘-lô-bûn it-tēng ōe hō͘ lâng khòaⁿ-chòe poān-tô͘.”

22Poa̍t-sī-pa iáu-teh kap ông kóng-ōe ê sî, sian-ti Ná-tan ji̍p--lâi.

23Ū lâng kā ông pò-kò, “Sian-ti Ná-tan tī chia.” Ná-tan kàu ông ê bīn-chêng, phak tī thô͘-kha pài ông.

24Ná-tan kóng, “Góa ê chú góa ê ông, lí kiám bat kóng ‘ A-to-nî-ngá beh sòa-chiap góa choh-ông, beh chē góa ê ūi’?

25I kin-á-ji̍t lo̍h--khì, thâi chin chōe gû, iûⁿ, kap pûi ê cheng-siⁿ hiàn-chè, koh chhiáⁿ ông ê chèng-kiáⁿ, kap chiah-ê kun-tiúⁿ, í-ki̍p chè-si A-pí-a-tha. In kap A-to-nî-ngá chòe-hé lim-chia̍h, kóng, ‘ A-to-nî-ngá -ông bān-sòe!’

26M̄-kú i bô chhiáⁿ góa, mā bô chhiáⁿ chè-si Sat-tok, kap Iâ-hô-iâ-tāi ê kiáⁿ Pí-ná-ngá, í-ki̍p ông ê po̍k-jîn Só͘-lô-bûn.

27Che kiám sī góa ê chú góa ê ông ê ì-sù? Ông lí iáu m̄-bat tùi lí ê chèng jîn-sîn soan-pò͘, sím-mi̍h-lâng beh sòa-chiap góa ê chú góa ê ông chē lí ê ūi.”

28Tāi-pi̍t -ông ìn kóng, “Kā góa kiò Poa̍t-sī-pa lâi.” Poa̍t-sī-pa chiū ji̍p--lâi, tī ông ê bīn-chêng khiā--teh.

29Ông chiù-chōa kóng, “Góa kí kiù góa ê sìⁿ-miā thoat-lī it-chhè hoān-lān, éng-oa̍h ê Siōng Chú kóng,

30‘Góa kì-jiân ū kí Siōng Chú — Í-sek-lia̍t ê Siōng-tè tùi lí chiù-chōa, lí ê kiáⁿ Só͘-lô-bûn beh sòa-chiap góa choh-ông chē góa ê ūi, góa kin-á-ji̍t it-tēng beh chiàu án-ni chòe.’”

31Poa̍t-sī-pa chiū kiok-kiong phak lo̍h-khì pài ông, kóng, “Goān góa ê chú Tāi-pi̍t -ông bān-bān-sòe!”

32Tāi-pi̍t -ông koh kóng, “Tiàu chè-si Sat-tok, sian-ti Ná-tan, kap Iâ-hô-iâ-tāi ê kiáⁿ Pí-ná-ngá lâi.” In chiū lóng lâi ông ê bīn-chêng.

33Ông kā in kóng, “Tio̍h chhōa kiong-têng ê koaⁿ-tiúⁿ kap lín khì, hō͘ góa ê kiáⁿ Só͘-lô-bûn khiâ góa ê lô lo̍h-khì Ki-hùn.

34Tī hia, chè-si Sat-tok kap sian-ti Ná-tan tio̍h ēng iû boah i chòe Í-sek-lia̍t -ông. Lín mā tio̍h pûn sàu-kak soan-pò͘, ‘ Só͘-lô-bûn -ông bān-sòe!’

35Jiân-āu lín tè i chiūⁿ--lâi, hō͘ i lâi chē góa ê ūi, sòa-chiap góa choh-ông; góa soán-li̍p i thóng-tī Í-sek-lia̍t kap Iû-tāi.”

36Iâ-hô-iâ-tāi ê kiáⁿ Pí-ná-ngá ìn ông kóng, “Amen! Goān Siōng Chú — góa ê chú góa ê ông ê Siōng-tè mā án-ni soan-pò͘.

37Siōng Chú án-chóaⁿ kap góa ê chú góa ê ông tông-chāi, goān I mā án-ni kap Só͘-lô-bûn tông-chāi, koh hō͘ i ê ông-koân pí góa ê chú Tāi-pi̍t -ông ê ông-koân koh-khah úi-tāi.”

38Chè-si Sat-tok, sian-ti Ná-tan, Iâ-hô-iâ-tāi ê kiáⁿ Pí-ná-ngá, Ki-lī-thê -lâng kap Pí-lī-thê -lâng, chiū lóng lo̍h--khì, hō͘ Só͘-lô-bûn khiâ Tāi-pi̍t -ông ê lô, sàng i kàu Ki-hùn.

39Chè-si Sat-tok chiū tùi hōe-bō͘ the̍h tóe-iû ê kak, ēng iû boah Só͘-lô-bûn; in chiū pûn sàu-kak, jîn-bîn lóng hoah kóng, “ Só͘-lô-bûn -ông bān-sòe!”

40Jîn-bîn tè i chiūⁿ--lâi, koh pûn phín-á, hui-siông hoaⁿ-hí, hoan-ho͘ ê siaⁿ tōa kah tōe kiông-beh li̍h--khui.

41A-to-nî-ngá í-ki̍p kap i chòe-hé ê lâng-kheh tú-á chia̍h-toh soah, thiaⁿ-kìⁿ hoan-ho͘ ê siaⁿ. Iok-ap thiaⁿ-tio̍h sàu-kak ê siaⁿ chiū mn̄g, “Siâⁿ-lāi sī-án-chóaⁿ ū hōa-hōa-háu ê siaⁿ?”

42I iáu-teh kóng ê sî, chè-si A-pí-a-tha ê kiáⁿ Iok-ná-tan lâi. A-to-nî-ngá kā i kóng, “Ji̍p--lâi, lí sī tiong-si̍t ê lâng, it-tēng sī beh pò hó siau-sit.”

43Iok-ná-tan ìn A-to-nî-ngá kóng, “Lán ê chú Tāi-pi̍t -ông í-keng siat-li̍p Só͘-lô-bûn choh-ông.

44Ông phài chè-si Sat-tok, sian-ti Ná-tan, Iâ-hô-iâ-tāi ê kiáⁿ Pí-ná-ngá, Ki-lī-thê -lâng kap Pí-lī-thê -lâng, kap Só͘-lô-bûn chòe-hé khì; in hō͘ Só͘-lô-bûn khiâ ông ê lô.

45Chè-si Sat-tok kap sian-ti Ná-tan, í-keng tī Ki-hùn kā i boah-iû hō͘ i choh-ông; in lóng tùi hia hō͘-sàng i ji̍p-siâⁿ, kui-siâⁿ tōa-siaⁿ hoan-ho͘; che chiū-sī lín só͘ thiaⁿ--tio̍h ê siaⁿ.

46Koh Só͘-lô-bûn mā í-keng chē ông-ūi.

47Ông ê jîn-sîn lóng lâi kā lán ê chú Tāi-pi̍t -ông chiok-hok, kóng, ‘Goān lí ê Siōng-tè hō͘ Só͘-lô-bûn ê miâ pí lí ê miâ koh-khah chun-kùi, hō͘ i ê ông-koân pí lí ê ông-koân koh-khah úi-tāi.’ Ông tī chhn̂g--ni̍h àⁿ lo̍h-khì kèng-pài,

48kî-tó kóng, ‘Siōng Chú — Í-sek-lia̍t ê Siōng-tè eng-kai siū chheng-chàn, in-ūi I ū siúⁿ-sù chi̍t ê lâng kin-á-ji̍t chē góa ê ūi, hō͘ góa chhin-ba̍k khòaⁿ--tio̍h.’”

49Só͘-ū kap A-to-nî-ngá chòe-hé ê lâng-kheh lóng kiaⁿ kah phi̍h-phi̍h-chhoah, sûi-lâng tô-cháu.

50A-to-nî-ngá in-ūi hui-siông kiaⁿ Só͘-lô-bûn, chiū khì khîⁿ chè-tôaⁿ ê kak.

51Ū lâng kā Só͘-lô-bûn kóng, “ A-to-nî-ngá kiaⁿ Só͘-lô-bûn -ông, khì khîⁿ tī chè-tôaⁿ ê kak, kóng, ‘Kiû Só͘-lô-bûn -ông kin-á-ji̍t tùi góa chiù-chōa, it-tēng bô beh ēng to thâi-sí i ê po̍k-jîn.’”

52Só͘-lô-bûn kóng, “I nā tùi góa chīn-tiong, liân chi̍t ki thâu-mn̂g mā bōe lak tī thô͘-kha; i nā choh-ok, it-tēng tio̍h sí.”

53Só͘-lô-bûn -ông chiū chhe lâng tùi chè-tôaⁿ kā i chhōa--lo̍h-lâi, A-to-nî-ngá chiū lâi tī Só͘-lô-bûn -ông bīn-chêng kūi-pài. Só͘-lô-bûn kā i kóng, “Lí tò-khì lín tau.”