1 Kings 4

Chinese TTVR (現代台語譯本羅馬字版)

← Chapter 3 Jump to: Chapter 5 →

1Só͘-lô-bûn -ông chòe choân Í-sek-lia̍t ê ông.

2I ê jîn-sîn kì tī ē-bīn: Sat-tok ê kiáⁿ A-sat-lī-ngá chòe chè-si;

3Sī-sa nn̄g ê kiáⁿ Í-lī-hô-lia̍t kap A-hi-ngá chòe su-kì; A-hi-lu̍t ê kiáⁿ Iok-sa-hoat chòe sú-koaⁿ;

4Iâ-hô-iâ-tāi ê kiáⁿ Pí-ná-ngá chòe goân-sòe; Sat-tok kap A-pí-a-tha chòe chè-si;

5Ná-tan ê kiáⁿ A-sat-lī-ngá chòe chóng-tok-tiúⁿ; Ná-tan ê kiáⁿ Sat-pò͘-tek chòe chè-si, kap ông ê kò͘-būn;

6A-hi-soah chòe kiong-têng chóng-koán; Ap-tāi ê kiáⁿ A-to-nî-lân chòe kiông-chè-lô-kang ê kam-tok.

7Só͘-lô-bûn tī Í-sek-lia̍t choân-tōe siat-li̍p cha̍p-jī ê chóng-tok, ūi-tio̍h ông kap ông ê ka-cho̍k pī-pān chia̍h-mi̍h, múi-nî ta̍k-ê lâng kiong-kip chi̍t kò-ge̍h.

8In ê miâ kì tī ē-bīn: Piān Hō͘-ní tī Í-hoat-liân soaⁿ-khu;

9Piān Tí-kah tī Má-ka-su, Sa-pin, Pek Sī-be̍k, Í-lûn Pek Hap-lâm;

10Piān Hi-sek tī A-ló͘-po̍k, mā koán-lí So-ko kap Hi-hut choân-tōe;

11Piān A-pí-ná-ta̍t tī To-ní ê choân soaⁿ-tōe; i chhōa Só͘-lô-bûn ê cha-bó͘-kiáⁿ Tha-hoat chòe bó͘;

12A-hi-lu̍t ê kiáⁿ Pa-ná tī Tha-la̍p, Bí-kiat-to, kap óa-kūn Sat-la-tàn, Iâ-su-lia̍t ē-pêng ê Pek Siān choân-tōe, tùi Pek Siān kàu A-pek Bí-hô-la, kàu Iok-bián hit-pêng;

13Piān Ki-pia̍t tī Ki-lia̍t ê La-boa̍t -siâⁿ, i mā tī Ki-lia̍t ê Má-ná-se kiáⁿ-sun Gâi-ní hiah-ê siâⁿ, Pa-san ê A-ní-ko-pek -tōe ê tōa-siâⁿ, kiōng la̍k-cha̍p chō siâⁿ, lóng ū siâⁿ-chhiûⁿ kap tâng ê mn̂g-chhòaⁿ;

14E̍k-to ê kiáⁿ A-hi-ná-ta̍t tī Má-hap-liām;

15A-hi-má-su tī Ná-hut-tha-lī; i chhōa Só͘-lô-bûn lēng-gōa chi̍t ê cha-bó͘-kiáⁿ Pa-si̍t-boat chòe bó͘;

16Hō͘-su ê kiáⁿ Pa-ná tī A-siat kap Pí-a-lio̍k;

17Phà-lō͘-a ê kiáⁿ Iok-sa-hoat tī Í-sat-ka;

18Í-la ê kiáⁿ Sī-múi tī Piān-ngá-bín;

19O͘-lī ê kiáⁿ Ki-pia̍t tī Ki-lia̍t -tōe; chiū-sī í-chêng A-mô͘-lī -ông Se-hông kap Pa-san -ông Go̍k ê tōe. Lēng-gōa ū chi̍t ê chóng-tok-tiúⁿ koán-lí só͘-ū ê tōe-khu.

20Iû-tāi kap Í-sek-lia̍t ê jîn-kháu chōe kah chhin-chhiūⁿ hái-piⁿ ê soa; in niû-si̍t chhiong-chiok, mā chin khoài-lo̍k.

21Só͘-lô-bûn koán-hat tùi Iù-hoat-la-tí-hô kàu Hui-lī-sū -lâng ê tōe, ti̍t-kàu Ai-ki̍p pian-kài hiah-ê kok; Só͘-lô-bûn chāi-siⁿ ê ji̍t, in lóng chìn-kòng kui-sūn i.

22Só͘-lô-bûn ta̍k-ji̍t su-iàu ê niû-si̍t: Iù mī-hún gō͘-chheng kong-seng, chho͘ mī-hún chi̍t-bān kong-seng;

23gû-tiâu lāi chhī ê pûi-gû cha̍p chiah, chháu-po͘ ê gû jī-cha̍p chiah, iûⁿ chi̍t-pah chiah, iáu ū lo̍k, lêng-iûⁿ, chhiah-lo̍k, kap pûi ê khîm-chiáu.

24I thóng-tī Iù-hoat-la-tí-hô sai-pêng só͘-ū tōe-khu, chiū-sī tùi Thê-hut-sat kàu Ka-sat chiah-ê ông-kok; i só͘ koán-hat ê choân-tōe lóng hióng-siū thài-pêng.

25Só͘-lô-bûn oa̍h--teh ê ji̍t, tùi Tān kàu Pia̍t-sī-pa ê Iû-tāi -lâng kap Í-sek-lia̍t -lâng, lóng tī in ê phû-tô-chhiū kap bû-hoa-kó-chhiū kha an-jiân khiā-khí.

26Só͘-lô-bûn ū sì-bān keng thoa chiàn-chhia ê bé ê bé-tiâu, koh ū chi̍t-bān nn̄g-chheng ê bé-peng.

27Hiah-ê chóng-tok, ta̍k-ê chiàu in hū-chek ê ge̍h-hūn, ūi-tio̍h Só͘-lô-bûn -ông kap ông-kiong lāi ê lâng chún-pī chia̍h-mi̍h, liân chi̍t hāng to bô khiàm.

28In koh chiàu in ê chit-chek, ūi-tio̍h chiàn-bé kap kî-tha iōng-tô͘ ê bé ūn-sàng tōa-be̍h kap chháu-liāu khì su-iàu ê só͘-chāi.

29Siōng-tè siúⁿ-sù Só͘-lô-bûn ke̍k-tōa ê tì-hūi chhong-bêng, hō͘ i ê lí-kái-le̍k chhin-chhiūⁿ hái-piⁿ ê soa bōe-niû--tit.

30Só͘-lô-bûn ê tì-hūi chhiau-kè só͘-ū tang-hng-lâng ê tì-hūi kap Ai-ki̍p -lâng it-chhè ê tì-hūi.

31I ê tì-hūi iâⁿ-kè só͘-ū ê lâng, iâⁿ-kè Í-su-la -lâng Í-thàm, kap Má-hat ê kiáⁿ Hi-bān, Kah-kok, Ta̍t-tāi; i ê miâ-siaⁿ thoân kàu sì-ûi ta̍k-kok.

32I chòe chim-giân saⁿ-chheng kù, si-koa chi̍t-chheng khòng gō͘ siú.

33I káng-lūn chháu-ba̍k, tùi Lê-pa-lūn ê pek-hiuⁿ-chhiū kàu chhiûⁿ-á-téng hoat--khí-lâi ê gû-chhek-chháu; mā káng-lūn cháu-siù, pe-chiáu, thâng-thōa, hî-lūi.

34Lia̍t-kok ê ông thiaⁿ-tio̍h Só͘-lô-bûn -ông ê tì-hūi, chiū lóng phài lâng khì thiaⁿ Só͘-lô-bûn tì-hūi ê ōe.

← Chapter 3 Jump to: Chapter 5 →