1 Kings 5

Chinese TTVR (現代台語譯本羅馬字版)

← Chapter 4 Jump to: Chapter 6 →

1Thài-ní -ông Hi-lân thiaⁿ-tio̍h Só͘-lô-bûn sòa-chiap i ê lāu-pē Tāi-pi̍t, siū soán-li̍p choh-ông, chiū phài jîn-sîn khì kìⁿ i; Hi-lân it-ti̍t sī Tāi-pi̍t ê hó pêng-iú.

2Só͘-lô-bûn mā phài lâng khì kìⁿ Hi-lân, kóng,

3“Lí chai góa ê lāu-pē Tāi-pi̍t bōe-tàng ūi-tio̍h Siōng Chú — i ê Siōng-tè ê miâ khí sèng-tiān, in-ūi i kap sì-ûi ê tùi-te̍k kau-chiàn, tio̍h tán kàu Siōng Chú hō͘ in lóng hâng-ho̍k.

4Taⁿ Siōng Chú — góa ê Siōng-tè í-keng sù góa thian-hā thài-pêng, bô tùi-te̍k, bô chai-hō.

5Só͘-í, góa beh ūi Siōng Chú — góa ê Siōng-tè ê miâ khí sèng-tiān, sī chiàu Siōng Chú tùi góa ê lāu-pē Tāi-pi̍t ê èng-ún, kóng, ‘Góa beh hō͘ lí ê kiáⁿ sòa-chiap lí, chē lí ê ūi, i beh ūi góa ê miâ khí sèng-tiān.’

6Só͘-í chhiáⁿ lí bēng-lēng lâng, khì Lê-pa-lūn ūi góa chhò pek-hiuⁿ-chhiū; góa ê kang-lâng beh kap lí ê kang-lâng chòe-hé chòe kang; góa mā beh chiàu lí tēng ê kang-chîⁿ hō͘ lí ê kang-lâng; lí chai, goán bô lâng chhin-chhiūⁿ lín Se-tùn -lâng hiah-ni̍h gâu chhò-chhiū.”

7Hi-lân thiaⁿ-kìⁿ Só͘-lô-bûn ê ōe, chin hoaⁿ-hí, chiū kóng, “Kin-á-ji̍t Siōng Chú eng-kai siū chheng-chàn, in-ūi I siúⁿ-sù Tāi-pi̍t chi̍t ê ū tì-hūi ê kiáⁿ, tī-lí chin chōe ê jîn-bîn.”

8Hi-lân phài lâng khì kìⁿ Só͘-lô-bûn, kóng, “Góa ū thiaⁿ-kìⁿ lí thoân-ta̍t hō͘ góa ê ōe. Góa ōe chiàu lí ê su-iàu thê-kiong pek-hiuⁿ-chhiū kap siông-chhiū ê chhâ-liāu hō͘ lí.

9Góa ê kang-lâng ōe tùi Lê-pa-lūn ūn bo̍k-châi lo̍h-hái, pa̍k-chòe kui-pâi phû tī hái--ni̍h, thoa kàu lí chí-tēng ê só͘-chāi, tī hia thiah-khui liáu-āu, kau hō͘ lí. Chhiáⁿ lí mā chiàu góa ê su-iàu kiong-kip niû-si̍t hō͘ góa ê ke.”

10Hi-lân chiū chiàu Só͘-lô-bûn ê su-iàu kiong-kip pek-hiuⁿ-chhiū kap siông-chhiū ê chhâ-liāu hō͘ i.

11Só͘-lô-bûn hō͘ Hi-lân nn̄g-chheng kong-tùn ê sió-be̍h, sì-cha̍p-bān kong-seng sûn ê kaⁿ-ná-iû, chòe i ke-lāi ê chia̍h-mi̍h. Só͘-lô-bûn ta̍k-nî lóng chiàu án-ni hō͘ Hi-lân.

12Siōng Chú chiàu I ê èng-ún sù tì-hūi hō͘ Só͘-lô-bûn. Hi-lân kap Só͘-lô-bûn pí-chhú li̍p-iok, hô-pêng siong-chhù.

13Só͘-lô-bûn -ông tùi Í-sek-lia̍t jîn-bîn kiông-chè tiàu lâng-kang saⁿ-bān.

14Ta̍k ge̍h-ji̍t lûn-liû phài chi̍t-bān lâng khì Lê-pa-lūn; in chi̍t kò-ge̍h tī Lê-pa-lūn, nn̄g kò-ge̍h tī chhù--ni̍h; A-to-nî-lân chòe kam-tok.

15Só͘-lô-bûn ū ūn-poaⁿ ê kang-lâng chhit-bān, tī soaⁿ--ni̍h phah-chio̍h--ê ū poeh-bān.

16Lēng-gōa, Só͘-lô-bûn ū tok-kang ê koaⁿ-oân saⁿ-chheng saⁿ-pah lâng, kàm-tok hiah-ê kang-lâng.

17In chiàu ông ê bēng-lēng, phah tōa koh kùi-tiōng ê chio̍h-thâu, ūn-lâi hē chòe tiān ê tōe-ki.

18Só͘-lô-bûn ê sai-hū kap Hi-lân ê sai-hū, í-ki̍p Ka-pa-le̍k -lâng, chòe-hé phah-chio̍h, chún-pī chhâ-liāu kap chio̍h-châi, lâi khí sèng-tiān.

← Chapter 4 Jump to: Chapter 6 →