1 Kings 14

Chinese TTVR (現代台語譯本羅馬字版)

← Chapter 13 Jump to: Chapter 15 →

1Hit-sî, Iâ-lô-pho-an ê kiáⁿ A-pí-ngá phòa-pīⁿ;

2Iâ-lô-pho-an kā i ê bó͘ kóng, “Lí khí-lâi piàn-chong, khì Sī-lô; mài hō͘ lâng chai lí sī Iâ-lô-pho-an ê bó͘. Sian-ti A-hi-ngá tòa tī hia; i bat ū-giân kóng góa beh chòe chiah-ê jîn-bîn ê ông.

3Taⁿ lí tio̍h tòa cha̍p tè mī-pau, chi̍t-kóa piáⁿ, kap chi̍t koàn bi̍t, khì kìⁿ i; i ōe kā lí kóng lán ê kiáⁿ ōe án-chóaⁿ.”

4Iâ-lô-pho-an ê bó͘ chiū chiàu án-ni chhut-hoat khì Sī-lô, lâi kàu A-hi-ngá in tau. A-hi-ngá in-ūi nî-lāu, ba̍k-chiu chhâ-chhâ bô khòaⁿ--kìⁿ.

5Siōng Chú kā A-hi-ngá kóng, “ Iâ-lô-pho-an ê bó͘ lâi, beh ūi-tio̍h i phòa-pīⁿ ê kiáⁿ mn̄g lí; lí tio̍h án-ni án-ni kā i kóng. I lâi ê sî, ōe chng-chòe pa̍t-ê hū-jîn-lâng.”

6I tú-á ji̍p mn̂g, A-hi-ngá thiaⁿ-tio̍h i ê kha-pō͘ siaⁿ, chiū kóng, “ Iâ-lô-pho-an ê bó͘, ji̍p--lâi! Lí sī-án-chóaⁿ chng-chòe pa̍t-ê hū-jîn-lâng? Góa beh kā lí pò chi̍t ê pháiⁿ siau-sit.

7Lí tò-khì kā Iâ-lô-pho-an kóng, ‘Siōng Chú — Í-sek-lia̍t ê Siōng-tè án-ni kóng: Góa tùi jîn-bîn tiong-kan thê-poa̍t lí, siat-li̍p lí chòe góa chú-bîn Í-sek-lia̍t ê thóng-tī-chiá,

8tùi Tāi-pi̍t -ke chiong ông-kok hun-lia̍t siúⁿ-sù hō͘ lí; m̄-kú lí bô chhin-chhiūⁿ góa ê po̍k-jîn Tāi-pi̍t chun-siú góa ê kài-bēng, choân-sim sūn-thàn góa, chòe góa khòaⁿ-chòe chèng-ti̍t ê sū.

9Lí kèng-jiân chòe pháiⁿ chhiau-kè só͘-ū lí í-chêng ê lâng, ūi ka-kī chō pa̍t-ê sîn-bêng, chù ngó͘-siōng, kek góa siū-khì, chiong góa tàn tī lí ê ka-chiah-āu.

10In-ūi án-ni, góa beh hō͘ chai-hō lîm-kàu Iâ-lô-pho-an ê ke, chiong Í-sek-lia̍t tiong sio̍k Iâ-lô-pho-an ê ta-po͘-lâng, bô-lūn chū-iû--ê á-sī bô chū-iû--ê, lóng kā in siau-bia̍t. Góa mā beh chiong Iâ-lô-pho-an ê ke lóng tû-bia̍t, chhin-chhiūⁿ teh sio pùn-sò, kā i sio-chīn.

11Só͘-ū sio̍k Iâ-lô-pho-an ê lâng, sí tī siâⁿ-lāi--ê, káu ōe kā chia̍h; sí tī iá-gōa--ê, khong-tiong ê chiáu ōe pe-lâi chia̍h. Siōng Chú án-ni soan-kò.’

12“Taⁿ lí tò-khì lín tau; lí ê kha chi̍t-ē ta̍h ji̍p-siâⁿ, lí ê kiáⁿ chiū ōe sí.

13Í-sek-lia̍t jîn-bîn ōe ūi-tio̍h i thî-khàu, kā i bâi-chòng; sio̍k Iâ-lô-pho-an ê lâng, chí-ū i tit-tio̍h an-chòng, in-ūi tī Iâ-lô-pho-an ê ke, chí-ū i bat chòe chi̍t-kóa sū hō͘ Siōng Chú — Í-sek-lia̍t ê Siōng-tè hoaⁿ-hí.

14Siōng Chú beh ūi-tio̍h ka-kī heng-khí chi̍t ê ông, thóng-tī Í-sek-lia̍t; i beh siau-bia̍t Iâ-lô-pho-an ê ke. Sím-mi̍h sî ōe hoat-seng? Chiū-sī hiān-chāi!

15Siōng Chú beh phah Í-sek-lia̍t, hō͘ in iô-tāng, chhin-chhiūⁿ chúi-tiong ê lô͘-úi; koh beh tùi I siúⁿ-sù in lia̍t-chó͘ ê hó thó͘-tōe kā in pu̍ih--chhut-lâi, hō͘ in sì-sòaⁿ tī Iù-hoat-la-tí-hô ê hit-pêng, in-ūi in chō A-sià-la lú-sîn ê thiāu-siōng, kek Siōng Chú siū-khì.

16Iâ-lô-pho-an pún-sin hoān-chōe, koh hō͘ Í-sek-lia̍t -lâng hām-lo̍h chōe, só͘-í Siōng Chú beh khì-sak Í-sek-lia̍t.”

17Iâ-lô-pho-an ê bó͘ khí-sin tò-khì Tek-sat; tú-á kàu chhù ê hō͘-tēng, i ê kiáⁿ chiū sí.

18Í-sek-lia̍t jîn-bîn ūi-tio̍h i thî-khàu, kā i bâi-chòng, tú-tú chiàu Siōng Chú thong-kè I ê po̍k-jîn sian-ti A-hi-ngá só͘ kóng ê ōe.

19Iâ-lô-pho-an kî-tha ê sū-chek, i án-chóaⁿ kau-chiàn, án-chóaⁿ choh-ông, lóng kì-chài tī Í-sek-lia̍t Lia̍t-ông-sú.

20Iâ-lô-pho-an choh-ông kiōng jī-cha̍p-jī nî, chiū tńg-khì i ê lia̍t-chó͘ hia; i ê kiáⁿ Ná-tap sòa-chiap i choh-ông.

21Só͘-lô-bûn ê kiáⁿ Lô-pho-an tī Iû-tāi choh-ông. Lô-pho-an chē-ūi ê sî sì-cha̍p-it hè. I tī Iâ-lō͘-sat-léng choh-ông cha̍p-chhit nî; Iâ-lō͘-sat-léng sī Siōng Chú tùi Í-sek-lia̍t chèng chi-cho̍k tiong kéng-soán hō͘ lâng lâi kèng-pài I ê siâⁿ. Lô-pho-an ê lāu-bú kiò-chòe Ná-má, sī A-bûn -lâng.

22Iû-tāi jîn-bîn chòe Siōng Chú khòaⁿ-chòe pháiⁿ ê sū, in hoān ê chōe pí in lia̍t-chó͘ só͘ hoān--ê koh-khah tāng, kek-tōng Siōng Chú oàn-tò͘.

23In-ūi in tī ta̍k-ê koân ê soaⁿ-lûn-á, ta̍k-châng chhiⁿ-chhùi ê chhiū ē-bīn, khí soaⁿ-thâu-tôaⁿ, chō chio̍h-thiāu-siōng kap A-sià-la lú-sîn.

24Kok-lāi koh ū loân-tông; Í-sek-lia̍t -lâng o̍h Siōng Chú tī in bīn-chêng kóaⁿ-chhut ê gōa-cho̍k-lâng só͘ chòe khó-ò͘ⁿ ê sū.

25Lô-pho-an -ông tē-gō͘ nî, Ai-ki̍p -ông Sī-sat chiūⁿ-lâi kong-kek Iâ-lō͘-sat-léng,

26chiong Siōng Chú sèng-tiān kap ông-kiong ê pó-mi̍h lóng chhiúⁿ--khì, koh chhiúⁿ Só͘-lô-bûn só͘ chòe hiah-ê kim ê tún-pâi.

27Lô-pho-an -ông chòe tâng ê tún-pâi tāi-thòe hiah-ê kim tún-pâi, kau hō͘ kò͘ ông-kiong tōa-mn̂g ê sī-ōe-tiúⁿ kò͘-siú.

28Ông ta̍k-piàn ji̍p Siōng Chú ê tiān, sī-ōe chiū giâ chiah-ê tún-pâi, āu-lâi koh tòa tò-tńg hē tī sī-ōe-sek.

29Lô-pho-an kî-tha ê sū-chek, kap i só͘ chòe it-chhè ê sū lóng kì-chài tī Iû-tāi Lia̍t-ông-sú.

30Lô-pho-an kap Iâ-lô-pho-an siông-siông kau-chiàn.

31Lô-pho-an tńg-khì i ê lia̍t-chó͘ hia, kap i ê lia̍t-chó͘ an-chòng tī Tāi-pi̍t -siâⁿ. I ê lāu-bú kiò-chòe Ná-má, sī A-bûn -lâng. Lô-pho-an ê kiáⁿ A-pí-ngá sòa-chiap i choh-ông.

← Chapter 13 Jump to: Chapter 15 →