1 Kings 2 — Chinese TTVR (現代台語譯本羅馬字版)

1Tāi-pi̍t lîm-chiong ê sî, kau-tài i ê kiáⁿ Só͘-lô-bûn kóng,

2“Góa teh-beh kiâⁿ sè-kan-lâng lóng tio̍h kiâⁿ ê lō͘; lí tio̍h kian-kiông, chòe tāi-tiōng-hu.

3Lí tio̍h chun-siú Siōng Chú — lí ê Siōng-tè só͘ hoan-hù--ê, kiâⁿ I ê tō-lō͘; chiàu Mô͘-se lu̍t-hoat só͘ kì-chài, chun-siú I ê kui-lē, kài-bēng, bēng-lēng, kap kà-sī. Án-ni, lí bô-lūn chòe sím-mi̍h, bô-lūn khì tó-ūi, lóng ōe heng-thong;

4Siōng Chú mā ōe si̍t-hiān I tùi góa ê èng-ún, ‘Lí ê kiáⁿ-sun nā kín-sīn seng-oa̍h, chīn-sim chīn-ì chin-sêng tī góa ê bīn-chêng kiâⁿ-chòe, lí ê hō͘-tāi chiū ōe chē Í-sek-lia̍t ê ông-ūi éng bô tn̄g.’

5“Lí mā chai Sé-lō͘-ngá ê kiáⁿ Iok-ap án-chóaⁿ tùi-thāi góa. I ū thâi-sí Nî-ní ê kiáⁿ Ap-nî-ní kap Ek-thiap ê kiáⁿ A-má-sat chit nn̄g ê Í-sek-lia̍t ê goân-sòe; i tī thài-pêng ê sî ēng kau-chiàn ê chhiú-tōaⁿ thâi-sí in, lâu in ê huih, hō͘ huih bak-tio̍h i ê io-tòa kap ôe.

6Só͘-í lí eng-kai chai tio̍h án-chóaⁿ chòe, m̄-thang hō͘ i pe̍h-thâu-mn̂g an-jiân lo̍h Im-kan.

7Lí tio̍h hó khoán-thāi Ki-lia̍t -lâng Pa-se-lâi hiah-ê kiáⁿ, hō͘ in siông-siông kap lí chòe-hé chia̍h; in-ūi góa tô-pī lí ê hiaⁿ-ko Ap-sa-liông ê sî, in ū hó khoán-thāi góa.

8Tio̍h ōe-kì-tit Pa-hō͘-lîm ê Piān-ngá-bín -lâng Ki-la ê kiáⁿ Sī-múi; góa khì Má-hap-liām ê sî, i ū ēng ok-to̍k ê ōe chiù-chó͘ góa. M̄-kú i āu-lâi ū lo̍h-khì Iok-tàn-hô gêng-chiap góa, góa chiū kí Siōng Chú tùi i chiù-chōa kóng, ‘Góa bô beh ēng to thâi lí.’

9Taⁿ lí m̄-thang pàng i soah. Lí sī chhong-bêng ê lâng, eng-kai chai tio̍h án-chóaⁿ chòe; tio̍h kā i thâi-sí, hō͘ i ê pe̍h-thâu-mn̂g bak-tio̍h huih lo̍h Im-kan.”

10Tāi-pi̍t tńg-khì i ê lia̍t-chó͘ hia liáu-āu, an-chòng tī Tāi-pi̍t -siâⁿ.

11Tāi-pi̍t choh-ông thóng-tī Í-sek-lia̍t kiōng sì-cha̍p nî: tī Hi-pek-lûn chhit nî, tī Iâ-lō͘-sat-léng saⁿ-cha̍p-saⁿ nî.

12Só͘-lô-bûn chē i lāu-pē Tāi-pi̍t ê ông-ūi; i ê kok hui-siông ún-kò͘.

13Hap-ki̍p ê kiáⁿ A-to-nî-ngá khì kìⁿ Só͘-lô-bûn ê lāu-bú Poa̍t-sī-pa; Poa̍t-sī-pa mn̄g i kóng, “Lí ū tòa pêng-an lâi bô?” A-to-nî-ngá ìn kóng, “Ū tòa pêng-an.”

14Koh kóng, “Góa ū tāi-chì beh tùi lí chhéng-kiû.” Poa̍t-sī-pa kóng, “Chhiáⁿ kóng.”

15A-to-nî-ngá kóng, “Lí chai chit-ê kok pún-lâi sī góa ê, Í-sek-lia̍t chèng-lâng mā lóng ài góa choh-ông; m̄-kú kok soah kui hō͘ góa ê sió-tī, in-ūi che sī Siōng Chú ê ì-sù.

16Taⁿ góa ū chi̍t kiāⁿ sū chhéng-kiû lí, ǹg-bāng lí m̄-thang kā góa the-sî.” Poa̍t-sī-pa kóng, “Sím-mi̍h tāi-chì?”

17I kóng, “Chhiáⁿ lí tùi Só͘-lô-bûn -ông kóng, chiong Su-liām ê lú-chú Ngá-pí-sa sù góa chòe bó͘, in-ūi ông it-tēng ōe thiaⁿ lí ê ōe.”

18Poa̍t-sī-pa kóng, “Hó, góa thòe lí kā ông kóng.”

19Poa̍t-sī-pa chiū khì kìⁿ Só͘-lô-bûn -ông, beh thòe A-to-nî-ngá chhéng-kiû. Ông khí-lâi gêng-chiap i, tùi i kiok-kiong; ông koh tò-tńg-khì chē i ka-kī ê ūi, hoan-hù lâng ūi i ê lāu-bú an-pâi chē-ūi. Poa̍t-sī-pa chiū chē tī ông ê chiàⁿ-pêng,

20kóng, “Góa ū chi̍t kiāⁿ sió-sū beh chhéng-kiû lí, chhiáⁿ m̄-thang kā góa the-sî.” Ông kā i kóng, “A-bú, chhiáⁿ lí kóng; góa bōe kā lí the-sî.”

21I kóng, “Chhiáⁿ chiong Su-liām ê lú-chú Ngá-pí-sa hō͘ lí ê hiaⁿ-ko A-to-nî-ngá chòe bó͘.”

22Só͘-lô-bûn -ông ìn i ê lāu-bú kóng, “Lí sī-án-chóaⁿ thòe A-to-nî-ngá kiû Su-liām ê lú-chú Ngá-pí-sa? I sī góa ê hiaⁿ-ko, lí kui-khì thòe i kiû ông-ūi; i koh ū chè-si A-pí-a-tha, kap Sé-lō͘-ngá ê kiáⁿ Iok-ap teh kā ióng-hō͘.”

23Só͘-lô-bûn -ông chiū kí Siōng Chú chiù-chōa kóng, “ A-to-nî-ngá kóng chiah-ê ōe, góa nā bô hō͘ i sí, goān Siōng-tè ka-pē chek-hoa̍t góa.

24Siōng Chú soán-li̍p góa, hō͘ góa chē góa ê lāu-pē Tāi-pi̍t ê ông-ūi, chiàu I ê èng-ún kiàn-li̍p góa ê ke; góa kí chit-ūi éng-oa̍h ê Siōng Chú chiù-chōa, A-to-nî-ngá kin-á-ji̍t it-tēng tio̍h sí.”

25Só͘-lô-bûn -ông chiū phài Iâ-hô-iâ-tāi ê kiáⁿ Pí-ná-ngá khì kā A-to-nî-ngá thâi-sí.

26Ông kā chè-si A-pí-a-tha kóng, “Lí tio̍h tò-khì A-ná-tu̍t lí ê ka-hiong. Lí eng-kai tio̍h sí, m̄-kú góa kin-á-ji̍t bô beh thâi lí, in-ūi lí bat tī góa ê lāu-pē Tāi-pi̍t ê bīn-chêng kng Chì-koân Siōng Chú ê iok-kūi, koh kap góa ê lāu-pē tâng siū hoān-lān.”

27Só͘-lô-bûn chiū pak A-pí-a-tha ê chit-ūi, put-chún i chòe Siōng Chú ê chè-si; án-ni chiū èng-giām Siōng Chú tī Sī-lô só͘ kóng iú-koan Í-lī ê ke ê ōe.

28Chit-ê siau-sit thoân kàu Iok-ap, Iok-ap chiū tô-cháu, ji̍p-khì Siōng Chú ê hōe-bō͘, khîⁿ tī chè-tôaⁿ ê kak; in-ūi Iok-ap sui-jiân bô tè Ap-sa-liông, m̄-kú ū ióng-hō͘ A-to-nî-ngá.

29Ū lâng kā Só͘-lô-bûn -ông pò-kò, Iok-ap cháu-khì Siōng Chú ê hōe-bō͘, khîⁿ tī chè-tôaⁿ ê kak; Só͘-lô-bûn chiū phài Iâ-hô-iâ-tāi ê kiáⁿ Pí-ná-ngá beh khì kā i thâi-sí.

30Pí-ná-ngá kàu Siōng Chú ê hōe-bō͘, kā Iok-ap kóng, “Ông kiò lí chhut--lâi.” Iok-ap ìn kóng, “M̄, góa beh sí tī chia.” Pí-ná-ngá khì kā ông hôe-ho̍k kóng, “ Iok-ap án-ni kóng, án-ni ìn góa.”

31Ông kā i kóng, “Lí thang chiàu i ê ōe kā i thâi-sí, koh kā i bâi-chòng, hō͘ Iok-ap lâu bû-ko͘ ê lâng ê huih hit-ê chōe bô kui tī góa kap góa ê lāu-pē ê ke.

32Siōng Chú beh hō͘ i ka-kī taⁿ bô͘-sat lâng ê chōe, in-ūi i bô hō͘ góa ê lāu-pē Tāi-pi̍t chai, chiū khì thâi-sí pí i khah hó khah chèng-ti̍t ê nn̄g ê lâng, Nî-ní ê kiáⁿ Í-sek-lia̍t ê goân-sòe Ap-nî-ní, kap Ek-thiap ê kiáⁿ Iû-tāi ê goân-sòe A-má-sat.

33Goān Iok-ap bô͘-sat lâng ê chōe éng-oán kui tī i kap i ê hō͘-tāi; m̄-kú Tāi-pi̍t kap i ê hō͘-tāi, i ê ke, í-ki̍p i ê ūi, beh éng-oán tùi Siōng Chú tit-tio̍h pêng-an hoân-êng.”

34Iâ-hô-iâ-tāi ê kiáⁿ Pí-ná-ngá chiū chiūⁿ--khì, thâi-sí Iok-ap; lâng kā i bâi-chòng tī khòng-iá hù-kūn i ka-kī ê chhù.

35Ông chiū siat-li̍p Iâ-hô-iâ-tāi ê kiáⁿ Pí-ná-ngá tāi-thòe Iok-ap chòe goân-sòe; koh siat-li̍p chè-si Sat-tok tāi-thòe A-pí-a-tha.

36Ông phài lâng kiò Sī-múi lâi, kā i kóng, “Lí tio̍h tī Iâ-lō͘-sat-léng khí chhù, tòa tī hia, bōe-ēng-tit chhut-khì pa̍t-ūi.

37Lí tio̍h ōe-kì--tit, lí kè Khip-lûn Khoe-kok hit-ji̍t it-tēng tio̍h sí, che sī lí ka-kī chòe-tit-lâi--ê.”

38Sī-múi ìn ông kóng, “Án-ni hó. Góa ê chú góa ê ông só͘ kóng--ê, lí ê po̍k-jîn chun-bēng.” Sī-múi chiū tòa tī Iâ-lō͘-sat-léng chin kú.

39Kè saⁿ nî, Sī-múi nn̄g ê lô͘-lē tô-cháu khì Má-ka ê kiáⁿ Ka-te̍k -ông A-kiat hia. Ū lâng kā Sī-múi kóng, “Lí ê lô͘-lē thau-cháu khì Ka-te̍k.”

40Sī-múi chiū chún-pī lû, khì Ka-te̍k -ông A-kiat hia, chhē i ê lô͘-lē. Sī-múi khì Ka-te̍k chhōa i ê lô͘-lē tò--lâi.

41Ū lâng kā Só͘-lô-bûn pò-kò, kóng, “ Sī-múi chhut Iâ-lō͘-sat-léng khì Ka-te̍k koh tò-tńg--lâi.”

42Ông chiū phài lâng kiò Sī-múi lâi, tùi i kóng, “Góa kiám m̄-sī kiò lí kí Siōng Chú chiù-chōa, koh kéng-kài lí kóng, ‘Lí tio̍h ōe-kì--tit, lí lī-khui Iâ-lō͘-sat-léng hit-ji̍t it-tēng tio̍h sí.’ Lí ìn góa kóng, ‘Án-ni hó, chun-bēng.’

43Taⁿ lí sī-án-chóaⁿ bô chun-siú tùi Siōng Chú só͘ chiù ê chōa, í-ki̍p góa kéng-kài lí ê bēng-lēng?”

44Ông koh kā Sī-múi kóng, “Lí chin chheng-chhó, lí tùi góa ê lāu-pē Tāi-pi̍t só͘ chòe it-chhè ê pháiⁿ, Siōng Chú beh in-ūi lí ê pháiⁿ kā lí hêng-hoa̍t.

45M̄-kú Siōng Chú beh chiok-hok góa, koh Tāi-pi̍t ê ông-ūi ōe éng-oán ún-kò͘.”

46Ông hā-lēng, Iâ-hô-iâ-tāi ê kiáⁿ Pí-ná-ngá chiū chhut--khì, thâi-sí Sī-múi. Tùi án-ni Só͘-lô-bûn ê ông-kok chiū chin ún-kò͘.