2 Corinthians 1

Zande

Jump to: Chapter 2 →

1Pauro nga gu ga Kristo Yesu mokedi mbiko Mbori akpi nyemu he wo, na Timoteo wirinarani, Fu gu ga Mbori kanisa du Korinda yo, na gu ga Mbori aboro dunduko du Akaya yo.

2Undahe dú fu roni na zereda be Mbori Barani na Gbia Yesu Kristo.

3I támbua Mbori nga Ba gaani Gbia Yesu Kristo, nga Ba inaapai, nga Mbori wasa dunduko;

4nafu wasa fu rani rogo gaani gberãngbi yo dunduko, ya ani rengbe na fu wasa fu agu yo du rogo gu gberãngbi yo, mbiko gu wasa Mbori angarasi rani na ni.

5Wa du ga Kristo hiapai ni dungu he fu rani, a wo du gaani wasa ni dungu he rogo Kristo yo.

6Ono si ngia i narungosi rani, si tipa gaoni wasa na bata; watadu ka i fu wasa fu rani, oni ki bi wasa a wa sa na ani, ki du nyanyaki. Oni ki rengbe ka hi rungosi wa sa na ani, nga gu ani nahi.

7Gaani maabangirise du nyanyaki tipa roni; niini ya, wa du oni ni abadiahipai, a wo du oni tipa wasa.

8Bambiko ani akpi nga nyemu oni zanga inahe te, awirina, tipa gu gaani rungosi namangi rani Asia yo, ya i arõisi he fu rani bakere gbe, susi omerani, wa ani aberã nga ya ani anye ni ungarani ya.

9Ii, ani adu tigaani na pa kpio ti rani, ya ka ani fu nga tirani ku be rani ya, ono ku be Mbori nazingisa kangba aboro:

10ko nabatasi rani be gi bakere kpio re, ko abátasa rani a; nga gu ko moi ani bangirani ti ko ya ko nikabatasa rani a kindi.

11Oni nimongo unda rani ni gaoni zungadihe; ya, mbiko gu gamahe i afu he fu rani tipa dungu aboro, tambuahe du ni fufu he tipa rani be dungu aboro.

12Bambiko gaani sambuatise nga gere, nga dezire sangba kpotorani yo, ya ani amangi gaani pai zegino na fu roni a kpaima, ni gu ziazia pai na rengo nga ga Mbori, ni gu tatamana nga ga borose te ono ni ga Mbori undahe,

13Bambiko ani ake nga kura apai fu roni te, kina gu rengbe oni na geda ha na ka ruga tironi na ni a, mi ki moi bangire ya oni arúga tironi na ni dati digida ha,

14a wa oni naruga tironi na ni ni kina bete he awere, ya ani nga gaoni ũsambuatise, wa du oni ni gaani a, rago gaani Gbia Yesu.

15Rogo gi berã re, mi aberẽ pa ye koyo du oni ni mbata, ya oni du na wene pai ni ue he;

16ka susa pati roni ku Makedonia yo, ki ye berewe Makedonia yo koyo du oni ni, oni ki gasi re ku mbata vu ni gi nunguro ku Yuda yo.

17Wa mi aberẽ gi pai re mi amangi he ni kina ngbare? na agu apai mi naberã pa manga ha, mi naberã ha wa du pa borose, ya mi ka gumba Ii Ii na Oó Oó?

18Ono wa du Mbori ni irarengo, gaani pai adu nga fu roni ni Ii na Oó te.

19Bambiko Wiri Mbori, Yesu Kristo, nga gu ko i atungusi pa ko dagba roni yo ku ngbarani, kina ngbarani na Siruano na Timoteo, ko adu nga ni Ii na Oó te, ono Ii du rogo ko yo.

20Bambiko wa du ga Mbori kidohe dunduko, kina rogo ko yo du Ii ni. Si du du Amina a ti ni rogo ko yo, sa taasa rimo Mbori rogo rani yo.

21Were gu ko ninanyakasa rani na oni rogo Kristo yo, ki nimbedi rani, nga Mbori;

22nga gu ko nadika rani a, ki fu ngbaánga fu rani nga Ziazia Toro ku kpotorani yo.

23Ono mi yambu Mbori ni dezire mbisimore, ya mi akaraga tire ti ye ku Korinda yo bambiko mi akpi nga nyemu rungosi roni te.

24A nga ani du na pa zoga gaoni idapase te, ono ani nga amounda gaoni ngbarago, bambiko oni naru mbiko gaoni idapase.

Jump to: Chapter 2 →