2 Corinthians 11

Zande

← Chapter 10 Jump to: Chapter 12 →

1Ka oni idi ka hi wiri mumungo pai fere. Ako, oni hi nga ha fere tie!

2Bambiko mi nade ringo roni ni gu deringo du na sino Mbori, mbiko mi apazua roni fu kumba sa, mi yugu roni wa ziazia ngasu de fu Kristo.

3Ono mi nagunde, gu pai ka irasi gaoni aberã ti gu rurupai na gu ziaziapai du koyo du Kristo ni, wa wo anangi Awa ni gau biriki.

4Bambiko si ngia gu ni ka ye ka tungusa pa kura Yesu, nga gu ko ani atungusa nga pa ko ya, na ka oni di toro akia, nga gu ko oni adia nga ko ya, na wene pangbanga akia, nga gu oni aida nga ha ya, oni ki idi he fu ni wenengaĩ.

5Bambiko mi aya nga mi du ku sa yo fu agu amokedi du ni ndikidi bakumba yo wa sa te.

6Ono ka fugore avura gbera vurũ, mi adu nga wo rogo inahe yo te. Ni rengo ani ayugu he dagba aboro dunduko koyo du oni ni rogo apai yo dunduko.

7Watadu mi aingi pai wa mi aumbasi tire oni du ni kiisikiisi roni, mbiko wa mi atungusi pa ga Mbori wene pangbanga fu roni gbua?

8Mi atuka ahe be kura akanisa, nirogo mosoro sunge be yo ya mi mangi pa roni.

9Ho ani adu ni na oni zingohe ki mangi re, mi ambusa nga gu boro wa sa te; bambiko awirina, ho i aye ni Makedonia yo, i afuku ahe rengbe na gi zingohe. Mi ki banda tire rogo apai yo dunduko ka mi adu nga ni umbusa fu roni ya, a wo mi nikabanda tire.

10Wa du ga Kristo rengo ti re, a nga boro ka za re ti gi sambuatise re roeo agu arago nga ga Akaya wa sa te.

11Tipagine? mbiko nyemuroni ti re te? Mbori ini he.

12Ono gu mangi mi, kina ha mi amánga kindi a, mi kisi gene fu agu yo nakpi nyemu ka sambua tiyo, na ka yugo ho ya i namanga sunge ni kpia rani.

13Bambiko ngbatunga agi aboro re nga zire amokedi, nga irabiriki amangisunge, nambakadi tiyo ni ga Kristo amokedi.

14A nga iiriwo pai nga ha te, mbiko kina Satana a nambakada tiko ni maraika imarago.

15A nga bakere pai tie, ka gako amoyambu mbakadi tiyo a ni amoyambu rurupai; digidayo nikarengba na gayo apai.

16Ya mi berewe, Ka gu boro yá nga mi mungo wa sa ya, ono zavura ka oni berẽ he wo, oni dí re wa du mi na mungo, mi sambua tire a toni.

17Gu pai gumba mi, mi agumba nga ha ku sangba Gbia yo te, ono wa ka si du ni mungo, ni gi nyanyaki sambuatise re.

18Wa dungu aboro nasambua tiyo wa du Da borose, mi asambua tire a.

19Bambiko oni nahi pa mumungo aboro ni ngbarago, wa du oni ni airatatamana.

20Bambiko oni nahi pa boro ka ni sa roni ni akanga, ka ni riti roni, ka ni zi roni, ka ni kiisi tini, ka ni nari roni ti kpakpuroni.

21Mi nagumba ha rogo zee, ani yugu pa gaani rungbura fu roni. Ono ho du gu boro zikazika ni ― mi nagumba ha ni mungo ― mi du zikazika a.

22AEbere nga yo? Wo du mi. AYisaraere nga yo? Wo du mi. Angbatunga Abarayama nga yo? Wo du mi.

23Ga Kristo amoyambu nga yo? ― Mi nagumba ha wa gu boro du na nzanga ― mi susi yo; rogo manga asunge gai susi, rogo abambukisa yo ni dungu he, amandoro susi gu ka i ringbisi he, rogo kpio yo dedede.

24Bara bisue mi ahi atere be aYudo 40 kpa koyo sa.

25I ataki re ni angbondo bara Diata, i asopo re na ambia bara sa, bara biata mi ahi pa gberã bakurungba, mi adu rogo baime yo ti yuru sa na uru sa;

26rogo anunguro dedede. Mi adu ngba pai be adi, ngba pai be abatuka, ngba pai be angbatungare, ngba pai be aGendiria, ngba pai bakporo yo, ngba pai ngbakungba yo, ngba pai rogo baime yo, ngba pai dagba zire awirina.

27Mi amangi sunge na kenapai, nipida he dedede, ni gomoro na gomoro ime, nigina ahe dedede, rogo zere na zingo roko.

28Gbia kuti agu apai du zegi vo re, gu kina ho narõasa re na uru, nga baka bangirise tipa akanisa dunduko.

29Da du dokoyo, ka mi adu nga dokoyo ya? Da i amangi ni ni koto, ka ngbadure aima nga ya?

30Si ngia ka mi sambua tire, mi asambua tire ti agu apai nayugo gi rungbura.

31Mbori nga Ba Gbia Yesu, du ni betedi ko nye anye kindi, ko ini ya zire mi agumba te.

32Damaseke yo gu bazogo nadu ku tii Areta nga bakindo, ko amoi gu bakporo nga ga aboro Damaseke, ka zia re.

33I ki zogo re ti bangiri bambu rogo buma yo ri ngapa bakporo, mi ki bati be ko.

← Chapter 10 Jump to: Chapter 12 →