2 Corinthians 8

Zande

← Chapter 7 Jump to: Chapter 9 →

1Ku ri gere, awirina, ani nakpi nyemu oni ini waĩ ga Mbori undahe adu ni yuguyugu he fu akanisa Makedonia no.

2Gu bakere rungo i ahi he si aasadi yo gbe, ono rogo ho dunduko gayo ngbarago amoi pai susi, i ki niyugu tiyo ni weneringi yo gbe, ka i avura du na zingo ahe a vurũ.

3Bambiko, mi nga dezirehe, i afuku he ni sa yo ni tiyo, wa rengbe omeyo na ni, ii, susi omeyo a,

4nizungadi rani ni bakere zungaditi tipa gi undahe re na gu ngbanya du rogo manga pa ga Mbori aboro.

5Si adu nga wa gu ani amoi bangirani ti ni te, ono i afu tiyo fu Gbia mbata, na fu rani a wa Mbori akpi nyemu he.

6Wa si adu wa gere ani azúngadi Tito, ya wa ko atona gi pai re mbata, wo ka ko digisi pa gi undahe re rogo roni yo a.

7Ono wa oni namaa pai rogo apai yo dunduko, rogo idapase, na gumbapai, na inahe, na nyakatipai dunduko, na gaoni nyemuse tipa rani, oni bí he ya oni moi pai rogo gi undahe re yo a.

8Mi agumba nga ha wa rugute te, ono si yugu go gu rengo du ti gaoni nyemuse a rogo gu nyakatipai nga ga akurayo.

9Bambiko oni ini gu undahe nga ga gaani Gbia Yesu Kristo ya, ko avura du ni ira ũkumuko vurũ, ko asa tiko ni boro rungo tipa roni, ya oni ye ka du ni aira ũkumuko mbiko gako rungo.

10Mi fu sangbare tipa gi pai re a: bambiko gere ngba fu roni, nga agu yo natona ha ni bambata yo wa garã sa ku sa yo, kina manga ha sa te, ono nikpi nyemu he a.

11Ono awere oni digisi pa manga ha a; ya wa oni adu zaza ti nyemu he, wo ka oni aigisi he a wa rengoe oni na ni.

12Bambiko si ngia gu ni du zaza rogo pa fu gamahe, Mbori aida pa gamahe be boro wa du pa agu ahe du be ni, kuti agu ahe adu nga be ni ya te.

13Mbiko mi agumba nga gere ya i akpurasi kura aboro ki rungosi roni te,

14ono tipa ringbisa pai. Wa ahe ange be roni wa du rago re, oni rengbe na gama ahe tipa gayo zingo ahe. Wa ka ahe nge be yo ku mbata yo, i ki rengbe ka gama ahe tipa gaoni zingo ahe a; apai ki rengbe dagba roni.

15Wa du he ni keke he “Gu ni narogodi he gbe, si anye nga be ni te; gu ni narogodi he ni umba ha zingo he amanga nga ni te.”

16Ono tambuahe du fu Mbori, namaa kina gi kakaka berã pa roni re ku kpoto Tito yo.

17Bambiko ko aida nga kina pa gaani zungaditi te; ono wa ko adu zaza tigako gbe, ko asia pa ndu koyo du oni ni ni tiko.

18Ani nakeda gu wirina na ko a nga gu ko pandeko namerẽ dagba akanisa yo dunduko tipa wene pangbanga.

19Kina gere sa te, ono ko nga gu ko akanisa aringbisi pa ko a ko nungu na ani tipa gi undahe re, nga gu ani namanga paha sa taasa rimo Gbia, na ka yugo gaani pa du zaza;

20nine gi pai re, nga boro ka gbarasa rimorani tipa gi gamunihe re ani namanga paha.

21Mbiko ani nambakada gaani berã tipa irisiirisi apai, ku bangiri Gbia sa te, ono ku bangiri aboro a.

22Ani ki kedi wirinarani na yo, nga gu ko ani aasadi ko ni dungu he ki bi he ya ko zaza rogo dungu apai yo, ono awere ko du zaza susi, mbiko pa gu inida pa roni du ti ko gbe.

23Si ngia gu boro nasana he watadu tipa Tito, ko nga badiare nga gi badia sunge fu roni; na tipa awirinarani, i nga ga akanisa asunge, nga ga Kristo taarimo.

24Oni yugu go gaoni nyemuse fu yo tie ku barangba akanisa, na go gaani sambuati tipa roni.

← Chapter 7 Jump to: Chapter 9 →